Yɛ afi 2011 lɛ, nuu ko jɛ Eritrea eyaba abo yɛ Norway. Be ni Yehowa Odasefoi kɛ lɛ gba sane lɛ, ekɛɛ amɛ akɛ no mli lɛ, ekɛ Odasefoi gbaa sane yɛ emaŋ. Ekɛɛ amɛ akɛ be ni eji asraafonyo yɛ jɛmɛ lɛ, ena akɛ Odasefoi ni awoɔ amɛ tsuŋ yɛ amɛhemɔkɛyeli hewɔ lɛ kɛ amɛhe wooo asraafoi anitsumɔ lɛ mli yɛ amɛnɔ ni anyɛ kɛ bɔ ni akɛ amɛye dɛŋdɛŋ ahã lɛ fɛɛ sɛɛ.

 Trukaa lɛ, nɔ ko ba ni amɔ lɛ awo lɛ tsuŋ. Ekɛ Odasefoi etɛ komɛi yaje tsuŋwoohe kome mli, amɛ ji Paulos Eyasu, Negede Teklemariam, kɛ Isaac Mogos​—awo amɛtsuŋ kɛjɛ 1994 yɛ amɛhemɔkɛyeli hewɔ.

 Be ni nuu nɛɛ yɔɔ tsuŋwoohe lɛ, lɛ diɛŋtsɛ ena akɛ Odasefoi lɛ hiɔ shi yɛ nibii ni amɛtsɔɔ mɛi lɛ anaa. Ena akɛ, Odasefoi etɛ nɛɛ yeɔ anɔkwa ni amɛhãa mɛi ni amɛkɛyɔɔ tsuŋwoohe lɛ amɛniyenii lɛ eko. Ena bɔ ni Odasefoi ni ekɛ amɛ yɔɔ tsuŋwoohe lɛ feɔ ekome kɛkaseɔ Biblia lɛ daa gbi, ni amɛhãa mɛi krokomɛi bafataa amɛhe kɛkaseɔ Biblia lɛ. Be fɛɛ be ni abaakɛɛ amɛ akɛ kɛ́ amɛsain wolo ni tsɔɔ akɛ amɛsɔmɔɔɔ Yehowa dɔŋŋ lɛ abaaŋmɛɛ amɛhe lɛ, amɛkpoɔ.

 Nyɛmimɛi nɛɛ anifeemɔ lɛ ná nuu nɛɛ nɔ hewalɛ waa aahu akɛ be ni etee Norway lɛ, etao koni ele nɔ hewɔ ni Yehowa Odasefoi ahemɔkɛyeli mli wa waa nakai lɛ. No hewɔ lɛ, be ni Yehowa Odasefoi lɛ kɛ lɛ bɔi sane gbaa lɛ, oya nɔŋŋ ni ekpɛlɛ ni ehã akɛ lɛ bɔi Biblia lɛ kasemɔ ni ebɔi amɛsafoŋ kpeei lɛ yaa.

 Yɛ September 2018 lɛ, abaptisi lɛ ni ebatsɔ Yehowa Odasefonyo. Amrɔ nɛɛ ekɛ hegbɛ fɛɛ hegbɛ ni enáa lɛ yeɔ mɛi ni jɛ Eritrea kɛ Sudan lɛ odase, ni ewoɔ amɛ hewalɛ koni amɛkase Biblia lɛ bɔ ni afee ni amɛná hemɔkɛyeli ni mli wa.