Kpokpaa nɔkwɛlɔ ko ni sɔmɔɔ yɛ Armenia ni atsɛɔ lɛ Artur lɛ etee eyaasara Yehowa Odasefoi asafo ko. Ena akɛ amɛkɛ amɛhe wooo maŋ odaseyeli nitsumɔ lɛ fã ni akɛ Biblia kasemɔ woji shwieɔ shwiilii anɔ kɛyeɔ odase lɛ mli. Bɔ ni afee ni amɛwo Odasefoi ni yɔɔ jɛmɛ lɛ hewalɛ ni amɛkɛ amɛhe awo shiɛmɔ nitsumɔ lɛ fã nɛɛ mli lɛ, lɛ kɛ eŋa Anna kɛ odasefonyo kroko ni atsɛɔ lɛ Jirayr kɛ odaseyeli shwiili lɛ eko yama maŋ bibioo ko mli. Amɛhala he ko ni mɛi fɔɔ tsɔmɔ waa.

 Oya nɔŋŋ ni mɛi ni hoɔ lɛ ajwɛŋmɔ ba woji lɛ anɔ ni amɛbɔi kɔlɔmɔ. Shi etsɛɛɛ ni shiteekɛwolɔi hu ajwɛŋmɔ ba nɔ. Osɔfoi enyɔ ba shwiili lɛ he, ni amɛteŋ mɔ kome biii nɔ ko kwraa ni etsi shwiili lɛ yisɛɛ etswa shi. Egba Artur hiɛ ma ni ehiŋmɛi glase lɛ yagbee shikpɔŋ. Artur, Anna, kɛ Jirayr bɔ mɔdɛŋ akɛ amɛbaajɔɔ nuu lɛ tsui he, shi ekpɛlɛɛɛ. Osɔfoi lɛ naanaa shwiili lɛ nɔ, ni woji lɛ fɛɛ gbɛ eshwa. Osɔfoi lɛ jɛ Odasefoi lɛ ni amɛwo amɛhe gbeyei, ni amɛshi amɛ.

 Artur, Anna, kɛ Jirayr tee polis steshɛŋ ni amɛya ripɔtu. Amɛtsɔɔ nɔ hewɔ ni amɛba jɛmɛ lɛ, ni no sɛɛ lɛ, amɛkɛ polisifoi babaoo kɛ mɛi krokomɛi ni tsuɔ nii yɛ jɛmɛ lɛ gba Biblia lɛ mli sane. No sɛɛ lɛ, akɛ Odasefoi etɛ lɛ tee polisi onukpa lɛ ɔfis lɛ. Shishijee lɛ, eetao ni ele bɔ ni sane lɛ ba lɛ ehã kɛkɛ. Shi be ni ena akɛ Artur je oblaŋ, shi be ni nuu lɛ gba lɛ ma lɛ, egbaaa lɛ eko lɛ, ekpa amɛ saji lɛ bimɔ ni ebi amɛ ni amɛgba lɛ Odasefoi lɛ ahemɔkɛyelii lɛ ahe sane moŋ. Enɛ hã amɛgba sane ŋmɛlɛtswai ejwɛ sɔŋŋ! Polisifonyo lɛ hiɛ sɔ nɔ ni enu lɛ aahu, ni ebó ekɛɛ: “Mɛɛ jamɔ nɛ! Masumɔ mabafata nyɛhe!”

 Enɔ jetsɛremɔ be ni Artur tee maŋ odaseyeli lɛ, nuu ko ni na nɔ ni osɔfoi lɛ fee lɛ ba eŋɔɔ. Nuu lɛ jie Artur yi waa akɛ enyɛ eye ehe nɔ ni efooo osɔfoi lɛ adaaŋ. Nuu lɛ kɛfata he akɛ nɔ ni osɔfoi lɛ fee lɛ ehã bulɛ ni eyɔɔ kɛhã amɛ lɛ etã.

 Polisi onukpa lɛ saa etsɛ Artur kɛba polis steshɛŋ lɛ ekoŋŋ. Shi nɔ najiaŋ ni ebaabi lɛ nɔ ni ba lɛ he sane lɛ, ebi lɛ saji babaoo ni kɔɔ Biblia lɛ he lɛ moŋ. Polisifoi enyɔ krokomɛi hu bafata amɛhe kɛgba sane lɛ.

 Enɔ jetsɛremɔ lɛ, Artur tee polisi onukpa lɛ ŋɔɔ ekoŋŋ ni eyajie wɔvidioi lɛ eko etsɔɔ lɛ. Polisi onukpa lɛ tsɛ polisifoi krokomɛi ni amɛ hu amɛbakwɛ vidio lɛ eko.

 Jeŋba gbonyo ni osɔfoi lɛ jie lɛ kpo lɛ hã aye polisifoi babaoo odase klɛŋklɛŋ kwraa. Enɛ hã amɛná Yehowa Odasefoi ahe jwɛŋmɔ kpakpa.