Eheɔ mɛi komɛi bei kplaŋŋ dani amɛkaseɔ nii kɛjɛɔ gbɛ ko ni amɛkɔ ni ejaaa lɛ mli. Nakai ji bɔ ni eba lɛ yɛ migbɛfaŋ. Afɔ mi yɛ Barcelona, eji maŋtiase ni da waa ni ji enyɔ yɛ Spain, ni jɛmɛ nɔŋŋ mida yɛ. Miweku lɛ hi Somorrostro, eji ŋshɔnaa maŋ. Juu kɛ fɔ̃, kɛ kokein kɛ ehenɔi lɛ ahɔɔmɔ ehe shi waa yɛ jɛmɛ.

 Mifɔlɔi fɔ bii nɛɛhu, ni mi ji amɛteŋ onukpa. Akɛni ohiafoi ji wɔ hewɔ lɛ, be ni midako beebe ni mipapa kɛ mi tee he ko ni atswaa tɛnɛs yɛ koni miyatsu nii yɛ jɛmɛ akɛ mɔ ni kɔlɔɔ bɔɔlu lɛ ehãa mɛi ni tswaa tɛnɛs lɛ. No mli lɛ, miye afii nyɔŋma, ni daa gbi lɛ, mikɛ ŋmɛlɛtswai nyɔŋma tsuɔ nii. No hewɔ lɛ, minyɛɛɛ maya skul tamɔ mitipɛŋfoi lɛ yaa lɛ. Be ni miye afii 14 lɛ, miyabɔi nitsumɔ yɛ metal shop ko.

 Yɛ afi 1975 lɛ, ahã miyatsu asraafoi lɛ anitsumɔ, ejaakɛ nakai beiaŋ yɛ Spain lɛ, afi ko yɛ ni kɛ́ oye lɛ, esa akɛ oyasɔmɔ akɛ asraafonyo. No mli lɛ, miitao maka nibii hei makwɛ, no hewɔ lɛ, miyafata Spanish Foreign Legion ni yɔɔ Melilla lɛ he. Melilla ji Spanish kpokpaa ko ni yɔɔ North Africa. Nakai beiaŋ ni mikɛ tsofãi bɔi nitsumɔ yɛ gbɛ ni ejaaa nɔ, ni mibɔi dãatɔɔ hu.

 Be ni mishi Legion lɛ, miku misɛɛ kɛba Barcelona ni mibatse gangi ko. Wɔjuɔ nɔ fɛɛ nɔ ni wɔnine baashɛ nɔ. Wɔhɔ̃ɔ nibii ni wɔjuɔ lɛ koni wɔná shika kɛhé tsofãi ni amɛkɛ nitsumɔ eka wɔ he lɛ. Mikɛ tsofãi bɔi nitsumɔ yɛ gbɛ ni ejaaa nɔ, ni mikɛ bɔlɛnamɔ, asɔshwɛmɔ, kɛ dãatɔɔ bafee tamɔ faa ni miwuɔ. Jeŋba gbonyo nɛɛ hã mibatsɔ yiwalɔ kpanaa. Be fɛɛ be lɛ, mihiɛ kakla, lema, loo klante yɛ mihe, ni misheee gbeyei akɛ mikɛ baaye awui kɛ́ hegbɛ lɛ ba.

 Gbi ko lɛ, mikɛ migangi lɛ yaju lɔle, ni polisifoi lɛ tsa wɔ shi aaafee ŋmɛlɛtswai etɛ sɔŋŋ. Efee tamɔ aajie sini. Polisifoi lɛ tsa wɔ shi aaafee kilomitai 30, kɛkɛ ni amɛbɔi wɔ tu tswiamɔ. Naagbee mli aahu lɛ, wɔdraiva lɛ kɛ tsɔne lɛ yashi nɔ ko, kɛkɛ ni wɔ fɛɛ wɔjo foi wɔtee. Be ni mipapa ná ele nɔ ni miyafee lɛ, eshwie mi kɛje shĩa lɛ.

 Afii enumɔ ni nyiɛ sɛɛ lɛ, gbɛjegbɛi lɛ anɔ batsɔ mishĩa. Miwɔɔ mɛi ashinai ashi, tsɔji amli, shwɛmɔhei, kɛ gɔɔi amli po. Miyahi tɛkplo ko mli bei fioo ko. Mikɛ oti ko kwraa emaaa mihiɛ, ni minu he akɛ migbo jio, miyɛ wala mli jio, jeee mihe sane. Mikaiɔ akɛ be ko be ni kokein kɛ ehenɔi lɛ ni mifuɔ ba mihiɛ lɛ, mifɔlɔ minijiaŋ ashi kɛ miniji ahe kakla. Atswãi lɛ yɛ mihe lolo.

 Be ni miye afii 28 lɛ, mimami batao mi ni ekɛɛ mi akɛ miku misɛɛ kɛba shĩa. Mikpɛlɛ, ni miwo lɛ shi akɛ majaje migbɛi, shi ehe mi be kplaŋŋ dani minyɛ miye nakai shiwoo lɛ nɔ.

 Gbi ko shwane lɛ, Yehowa Odasefoi enyɔ komɛi batswa wɔshinaa lɛ. Be ni miboɔ amɛ toi lɛ, mipapa bɔlɔ ewo mi kɛjɛ tsũ lɛ mli akɛ, miŋa shinaa lɛ ni mishi amɛhiɛ. Akɛni misumɔɔɔ ni mɔ ko tsɔɔ mi nɔ ni mifeɔ hewɔ lɛ, mifooo edãŋ. Amɛhã mi woji bibii etɛ, ni mikɛ miishɛɛ hé. Mibi amɛ he ni amɛkpeɔ yɛ, ni amɛtsɔɔ mi, ni gbii fioo komɛi asɛɛ lɛ mitee Maŋtsɛyeli Asa lɛ nɔ.

 Nɔ klɛŋklɛŋ ni miyɔse ji akɛ, mɔ fɛɛ mɔ esaa ehe jogbaŋŋ. No mli lɛ, miyiteŋ kɛ mihiɛ fɛɛ etsa kusuu, ni miwo atade ko kɛkɛ. Mina faŋŋ akɛ, misaaa jɛmɛ, no hewɔ lɛ, miboteee Asa lɛ nɔ. Shi nɔ ko ni hã minaa kpɛ mihe waa ji, mina minaanyo ko ni kulɛ mikɛ lɛ yɔɔ gangi lɛ mli, esaa ehe jogbaŋŋ ni ewo kootu. Sɛɛ mli lɛ, mibaná mile akɛ, ebatsɔ Yehowa Odasefonyo afi kome pɛ nɛ. Akɛni mina lɛ hewɔ lɛ, miná ekãa kɛbote Asa lɛ nɔ ni miyabo kpee lɛ toi. Enɛ ji nɔ ni hã mibɔi tsakemɔi feemɔ.

 Mikpɛlɛ ni akɛ mi bɔi Biblia lɛ kasemɔ. Etsɛɛɛ ni mibayɔse akɛ, kɛ́ miitao ni Yehowa akpɛlɛ minɔ lɛ, esa akɛ makpa basabasafeemɔ kɛ mijeŋba gbohii krokomɛi lɛ. Mináaa enɛ feemɔ mlɛo kwraa. Shi mibaná mile akɛ, dani masa Yehowa Nyɔŋmɔ hiɛ lɛ, esa akɛ ‘matsake misubaŋ kɛtsɔ mijwɛŋmɔ ni maya nɔ matsake lɛ nɔ.’ (Romabii 12:2) Nyɔŋmɔ mɔbɔnalɛ lɛ ta mitsuiŋ waa. Miyɔse akɛ, yɛ mitɔ̃mɔi lɛ fɛɛ sɛɛ lɛ, ehã mi hegbɛ ni mafee tsakemɔ. Nibii ni mikase yɛ Yehowa Nyɔŋmɔ he lɛ bote mitsui mli tɔ̃ɔ. Ebafee faŋŋ kɛhã mi akɛ, Bɔlɔ ko yɛ ni jwɛŋɔ mihe.​—1 Petro 5:6, 7.

 Enɛ hã mibɔi tsakemɔi feemɔ. Akɛ nɔkwɛmɔnɔ lɛ, be ko ni akɛ mi miikase nii ni awie tawashɛremɔ kɛ ehenɔi lɛ ahe lɛ, mikɛɛ mihe akɛ, ‘Kɛ́ Yehowa miitao ni matsi mihe kɛje nɔ fɛɛ nɔ ni woɔ mihe muji yɛ heloo kɛ jwɛŋmɔŋ lɛ he lɛ, belɛ esa akɛ makpa zigareti nɛɛ shɛremɔ!’ (2 Korintobii 7:12) Kɛkɛ ni mishɛrɛ zigaretii lɛ miwo jwɛi nii lɛ amli!

 Agbɛnɛ hu lɛ, ehe bahia ni makpa kokein kɛ ehenɔi lɛ kɛ nitsumɔ, ni makpa hɔɔmɔ hu. Enɛ hé mi bei babaoo kɛ mɔdɛŋbɔɔ diɛŋtsɛ. Bɔ ni afee ni manyɛ mashɛ oti nɛɛ he lɛ, miyɔse akɛ, esa akɛ mikɛ mitsutsu nanemɛi kɛ migangi lɛ mli bii lɛ akpa bɔɔ. Ejaakɛ, amɛ ni mikɛshãraa lolo lɛ hewɔ ni minyɛɛɛ mafee tsakemɔi ni sa Nyɔŋmɔ hiɛ lɛ. Be ni be shwie mli lɛ, mikɛ mihe bafɔ̃ Nyɔŋmɔ nɔ waa fe tsutsu lɛ, ni nanemɛi ni miná yɛ asafo lɛ mli lɛ ye amɛbua mi. Suɔmɔ ni amɛjie lɛ kpo amɛtsɔɔ mi, kɛ bɔ ni amɛná mihe miishɛɛ lɛ fee mi naakpɛɛ waa, ejaakɛ mikɛ eko ekpeko dã. Nyɔji komɛi asɛɛ lɛ, mikpa tsofãi ni mikɛtsuɔ nii yɛ gbɛ ni ejaaa nɔ lɛ, ni “miwo subaŋ hee lɛ,” ejaakɛ no baaye abua mi ni masa Nyɔŋmɔ hiɛ. (Efesobii 4:24) Yɛ August 1985 lɛ, abaptisi mi ni mibatsɔ Yehowa Odasefonyo.

 Biblia lɛ tsake mishihilɛ. Biblia lɛ hã miye mihe kɛje jeŋba gbonyo ni kulɛ eefite migbɔmɔtso kɛ minunyam lɛ he. Anɔkwa, helai komɛi ni anáa kɛjɛɔ tsofãi ni akɛtsuɔ bɔ ni esaaa lɛ amli kɛ AIDS gbe minanemɛi 30 kɛ sɛɛ be ni amɛdarako tsɔ. Eji mikɛ Biblia shishitoo mlai tsuuu nii kulɛ, benɛ mi hu migbo, miida Yehowa shi waa.

 Bianɛ lɛ, mikɛ kaklai kɛ lemai yeee mɛi awui dɔŋŋ. Misusuuu po akɛ be ko baaba ni mahiɛ Biblia kɛye mabua mɛi. Ŋmɛnɛ lɛ, mikɛ miŋa fɛɛ lɛ, Yehowa Odasefoi ji wɔ, ni wɔsɔmɔɔ akɛ bei fɛɛ esɔɔlɔi, no ji wɔkɛ wɔbei pii shiɛɔ sanekpakpa lɛ.

 Mifɔlɔi ebatsɔmɔɔɔ Yehowa Odasefoi, shi amɛhiɛ sɔ bɔ ni miná Biblia lɛ ni mikase lɛ he sɛɛ lɛ waa. Anɔkwa, mipapa fã Odasefoi lɛ ahe po yɛ enanemɛi fɛɛ ahiɛ. Mina faŋŋ akɛ, hemɔkɛyeli hee ni miná lɛ etsake mi, ni mibatsɔ gbɔmɔ kpakpa. No mli lɛ, mimami fɔɔ kɛɛmɔ akɛ, kulɛ, esa akɛ makase Biblia lɛ mra mli tɔ̃ɔ. Mikɛ lɛ kpãa gbee waa diɛŋtsɛ!

 Nilee bɛ mli kwraa akɛ mɔ ko baasusu akɛ, kɛ́ ekɛ tsofãi tsu nii yɛ gbɛ ni ejaaa nɔ, ni ekɛ ehe wo jeŋbai gbohii amli lɛ, etsui baanyɔ emli. Bianɛ lɛ, kɛ́ miitsɔɔ mɛi Biblia mli anɔkwalei lɛ, ni ji anɔkwalei ni here miyiwala lɛ, mitsui nyɔɔ mimli naakpa.