Mida yɛ Finland maŋ ko, ni mli jɔɔ waa ni atsɛɔ lɛ Tampere lɛ klotia lɛ mli. Mifɔlɔi bɛ Nyɔŋmɔ jamɔ he miishɛɛ tsɔ, shi amɛnyaa skulyaa kɛ jeŋba kpakpa he waa. Mimami jɛ Germany, ni be ni midako lɛ, mifɔɔ efɔlɔi aŋɔɔ yaa yɛ West Germany.

 Misumɔɔ sports kɛjɛ migbekɛbiiashi tɔ̃ɔ. Mifee sports srɔtoi babaoo, shi be ni miye afii 14 lɛ, mikɛ mijwɛŋmɔ fɛɛ ma tɛnistswaa nɔ. Be ni miye afii 16 lɛ, miyaa treniŋ shii enyɔ loo shii etɛ yɛ gbi kome mli​—mɛi tsɔɔ mi enyɔ, ni mi diɛŋtsɛ mifeɔ ekome gbɛkɛ. Tɛnistswaa hãa mináa miishɛɛ waa; eyeɔ ebuaa mi yɛ jwɛŋmɔŋ kɛ gbɔmɔtsoŋ fɛɛ. Eyɛ mli akɛ mikɛ minanemɛi lɛ náa wɔhe miishɛɛ ni wɔnuɔ beer bei komɛi moŋ, shi mináaa sane ejaakɛ mikɛ tsofai loo dãa tsuuu nii bɔ ni esaaa. Tɛnistswaa bafee nɔ ni he hiaa mi fe fɛɛ yɛ shihilɛ mli.

 Be ni miye afii 17 lɛ, miyafata tɛnistswaa akaŋshii ni ATP lɛ toɔ he gbɛjianɔ lɛ he. a Be ni miye kunim babaoo lɛ, mihé gbɛ́i waa. Be ni miye afii 22 lɛ, abu mi afata tɛnistswalɔi 50 ni bɔɔ mɔdɛŋ yɛ jeŋ fɛɛ lɛ ahe.

 Mikɛ afii babaoo fã gbɛ kɛtee je lɛŋ hei srɔtoi ni miitswa tɛnis. Mina hei srɔtoi ni yɔɔ fɛo waa, ni, miyɔse naagbai babaoo ni miiya nɔ yɛ je lɛŋ hei srɔtoi fɛɛ lɛ hu, ekomɛi ji nibii ni mla eŋmɛɛɛ gbɛ ni mɛi feɔ, tsofai ni akɛtsuɔ nii yɛ gbɛ ni esaaa nɔ, kɛ gbɛi srɔtoi ni mɛi tsɔɔ nɔ amɛfiteɔ shikpɔŋ lɛ. Akɛ nɔkwɛmɔnɔ lɛ, be ni wɔtee United States lɛ, atsɔɔ wɔ hei komɛi ni wɔkaya yɛ nɔ fɔŋ ni afeɔ yɛ jɛmɛ lɛ hewɔ. Enɛɛmɛi hao mi waa. Eyɛ mli akɛ no mli lɛ, miinya nɔ ni mifeɔ lɛ he moŋ, shi kɛ́ je na lɛ mináaa miishɛɛ.

 No mli lɛ, oblayoo ni mikɛyɔɔ shi mikɛ lɛ boteko gbalashihilɛ mli ni atsɛɔ lɛ Sanna lɛ kɛ Yehowa Odasefoi ebɔi Biblia lɛ kasemɔ. Minaa kpɛ mihe akɛ ekɛ amɛ miikase Biblia lɛ, shi mibɛ naagba yɛ he. Yɛ 1990 mli lɛ, wɔbote gbalashihilɛ mli ni enɔ afi lɛ abaptisi lɛ akɛ Yehowa Odasefonyo. Mi lɛ no mli lɛ, mibɛ jamɔ he miishɛɛ, shi nakai beiaŋ nɔŋŋ lɛ, miheɔ miyeɔ akɛ Nyɔŋmɔ ko yɛ. Mikaiɔ akɛ mimami mami ni no mli lɛ miyaa eŋɔɔ yɛ Germany lɛ kaneɔ Biblia lɛ waa ni etsɔɔ mi bɔ ni asɔleɔ po.

 Gbi ko be ni mi kɛ Sanna tee wɔyasara Yehowa Odasefoi gbalashihilɛ hefatalɔi komɛi lɛ, nuu lɛ ni egbɛ́i ji, Kari lɛ kɛ mi susu Biblia mli gbalɛ ni kɔɔ “naagbee gbii lɛ” he lɛ he. (2 Timoteo 3:​1-5) Enɛ ná minɔ hewalɛ waa ni ehã mina nɔ hewɔ ni nibii gbohii yaa nɔ yɛ je lɛ mli lɛ. Nakai gbi lɛ, wɔwieee jamɔ he sane dɔŋŋ. Kɛjɛ nakai gbi lɛ nɔ kɛbaa lɛ, mihã Kari kɛ mi bɔi Biblia lɛ kasemɔ, ni miyɔse akɛ jwɛŋmɔ yɛ nibii ni etsɔɔ mi lɛ fɛɛ mli. Akɛni no mli lɛ mibɛ dekã ni mifɔɔ gbɛfaa waa hu hewɔ lɛ, enyɛɛɛ ekɛ mi akase nii lɛ kɛtsara nɔ, shi enijiaŋ ejeee wui. Eŋmalaa mi lɛtai kɛhãa saji ni mibiɔ lɛ kɛ́ wɔmiikase nii lɛ ahetoo. Ejɛ Biblia lɛ mli ehã shihilɛ mli sanebimɔi ni mli kwɔlɔ lɛ fɛɛ ahetoo, ni fiofio lɛ, miyɔse sane oti ni Biblia lɛ wieɔ he lɛ​—ni ji, Nyɔŋmɔ Maŋtsɛyeli lɛ baahã afee Nyɔŋmɔ suɔmɔnaa nii lɛ. Mibale Nyɔŋmɔ gbɛ́i, ni ji Yehowa lɛ, ni be ni mina nibii ni efee ehã wɔ lɛ, miná miishɛɛ waa. (Lala 83:18) Nɔ ni ná minɔ hewalɛ waa ji kpɔmɔ afɔle lɛ ni ekɛhã wɔ lɛ​—ejeee gbɛjianɔ kɛkɛ ni eto koni ekɛhã wɔye wɔhe kɛjɛ esha kɛ gbele mli, shi moŋ etsɔɔ akɛ esumɔɔ wɔ waa. (Yohane 3:​16) Mibayɔse hu akɛ miná hegbɛ akɛ matsɔ Nyɔŋmɔ naanyo ni mahi shi kɛya naanɔ yɛ paradeiso ni toiŋjɔlɛ yɔɔ mli lɛ mli. (Yakobo 4:8) Mibi mihe akɛ, “Mɛni mafee kɛda shi?”

 Misusu bɔ ni mihiɔ shi mihãa lɛ he waa. Mikase yɛ Biblia lɛ mli akɛ nɔhamɔ ji nɔ ko ni hãa mɔ mii shɛɔ ehe waa, no hewɔ lɛ, miná shwelɛ akɛ mikɛ mɛi krokomɛi baagba nibii ni mikaseɔ lɛ ahe sane. (Bɔfoi 20:35) Tɛnis lɛ tswaa lɛ hewɔ lɛ, daa afi lɛ miyeɔ aaafee gbii 200 yɛ maji krokomɛi anɔ kɛshĩɔ akaŋ. Akɛni miweku lɛ shihilɛ fɛɛ damɔ minɔ, ni daa nɛɛ, miitreni, ni miifã gbɛ kɛmiiya kɛmiiba yɛ minitsumɔ lɛ he hewɔ lɛ, minaaa be kɛhã amɛ. Mina akɛ esa akɛ mafee tsakemɔi.

 Mile akɛ kɛ́ mikpa nitsumɔ ni shika yɔɔ mli waa nɛɛ yɛ jamɔ hewɔ lɛ, mɛi babaoo nuŋ mi shishi. Shi Yehowa ni male lɛ jogbaŋŋ, kɛ naanɔ wala hu ni maná lɛ ji hegbɛ kpele diɛŋtsɛ kɛhã mi, enɛɛmɛi ahe yɛ sɛɛnamɔ kwraa fe jweremɔnɔ fɛɛ jweremɔnɔ ni maná yɛ tɛnistswaa mli, no hewɔ lɛ, ewaaa hãaa mi kwraa akɛ makpɛ miyiŋ. Mikpɛ miyiŋ akɛ miboŋ nɔ ni mɛi krokomɛi baawie lɛ toi​—esa akɛ mi diɛŋtsɛ makpɛ miyiŋ. Ŋmalɛ ko ni wo mi hewalɛ ni minyɛ mikpee nɔnyɛɛ nɛɛ naa ji Lala 118:6 lɛ ni kɛɔ akɛ: “Yehowa yɛ mimasɛi; misheee gbeyei. Mɛni gbɔmɔ baanyɛ afee mi?”

 Nɛkɛ be nɛɛ mli lɛ, mɛi komɛi kɛɛ amɛbaahã mi shika kɛ nibii krokomɛi babaoo ni baaye abua mi ni mikɛ maji krokomɛi anɔ bii ayatswa tɛnis afii babaoo. Shi no mli lɛ, mikpɛ miyiŋ momo, no hewɔ lɛ, mikpoo, ni sɛɛ mli lɛ, mikpa akaŋshii ni ATP lɛ toɔ he gbɛjianɔ lɛ. Mitee nɔ mikase Biblia lɛ, ni yɛ July 2, 1994 lɛ abaptisi mi akɛ Yehowa Odasefonyo.

 Yɛ migbɛfaŋ lɛ, miná lɛ mlɛo akɛ male Nyɔŋmɔ. Ni minaaa mihe akɛ mɔ ko ni tao anɔkwale lɛ. Minuɔ he akɛ nibii tee lɛ jogbaŋŋ kɛhã mi, ni nɔ ko kwraa bɛ ni masumɔ ni afee ahã mi kɛfata he. Kɛ̃lɛ, be ko lɛ, nɔ ko ni mikpaaa gbɛ ba, efee mi tamɔ nɔ ni Biblia mli anɔkwalei lɛ kã shi eemɛ mi, miyɔse akɛ Nyɔŋmɔ bɔ wɔ ni wɔhi shi kɛya naanɔ, ni amrɔ nɛɛ mishihilɛ ehi kwraa fe bɔ ni mikpa gbɛ lɛ! Amrɔ nɛɛ miweku lɛ yɛ miishɛɛ, ni wɔfee ekome fe bei fɛɛ ni eho. Ni eŋɔɔ minaa akɛ mibihii etɛ lɛ ekɔ minane​—jeee mɛi ni feɔ sports, shi akɛ Kristofoi.

 Mitswaa tɛnis lolo. Mikɛ afii babaoo etsu nitsumɔi srɔtoi ni kɔɔ tɛnistswaa he, akɛ nɔkwɛmɔnɔ lɛ, akɛ kootsi loo akɛ nɔkwɛlɔ yɛ he ko ni atswaa tɛnis yɛ. Shi amrɔ nɛɛ, jeee sports ji nɔ ni he hiaa mi yɛ shihilɛ mli. Be ko ni eho lɛ, mikɛ ŋmɛlɛtswai babaoo treniɔ daa otsi koni maya mihiɛ yɛ tɛnistswaa mli, koni mihe asa waa fe mɔ fɛɛ mɔ. Amrɔ nɛɛ, mikɛ be babaoo shiɛɔ sanekpakpa lɛ, ni eŋɔɔ minaa akɛ mikɛ mibe miitsu nii kɛmiiye miibua mɛi koni amɛkase Biblia mli anɔkwalei ni tsake mi lɛ, ni amɛkɛtsu nii yɛ amɛshihilɛ mli. Wekukpaa ni yɔɔ mi kɛ Nyɔŋmɔ teŋ kɛ mihiɛnɔkamɔ ni kɔɔ wɔsɛɛ shihilɛ kpakpa he lɛ ni migbaa mɛi krokomɛi lɛ kã mitsui nɔ waa, ni no ji nɔ ni hãa mimii shɛɔ mihe waa ŋmɛnɛ.​—1 Timoteo 6:​19.