Afɔ mi yɛ Montreal, ni ji maŋtiase wulu ni fe fɛɛ ni yɔɔ Canada kpokpaa ni ji Quebec lɛ mli. Mifɔlɔi ni yɔɔ suɔmɔ waa lɛ tsɔse mi kɛ minyɛmimɛi etɛ lɛ yɛ Rosemont akutso ko ni yɔɔ fɛo waa lɛ mli. Wɔfee ekome kɛhi shi kpoo yɛ toiŋjɔlɛ mli.

 Be ni miji gbekɛ lɛ, misumɔɔ Biblia lɛ waa. Mikaiɔ akɛ be ni miye afii 12 lɛ, mikane Yesu he sane yɛ Kpaŋmɔ Hee lɛ mli ni minya he waa diɛŋtsɛ. Suɔmɔ kɛ musuŋtsɔlɛ kpo ni ejie etsɔɔ mɛi lɛ ta mitsuiŋ waa, ni mikpɛ miyiŋ akɛ makase lɛ. Awerɛho sane ji akɛ, be ni midaa lɛ, shwelɛ ni miná nɛɛ je mijwɛŋmɔ mli akɛni mikɛ mɛi ni ná minɔ hewalɛ gbonyo bɔi bɔɔ lɛ hewɔ.

 Mipapa kpãa saŋku ni esumɔɔ lala waa, no hewɔ lɛ, ekɛ esaŋku lɛ hã mi ni mi hu mibasumɔ lala waa ni mikɛ mijwɛŋmɔ fɛɛ ma nɔ. Misumɔɔ lala aahu akɛ, eheee mi be ko ni mikase gitai tswaa. Sɛɛ mli lɛ, mikɛ minanemɛi fioo komɛi tse lalatswaa kuu, ni wɔtswa lala yɛ henaabuamɔi babaoo ashishi. Mɛi komɛi ni ehe gbɛ́i waa ni yeɔ amɛbuaa lalafolɔi lɛ yɔse enɛ, no hewɔ lɛ, amɛbakɛɛ mi akɛ amɛbaasumɔ ni amɛye amɛbua mi. Mikɛ nitsumɔhe wulu ko ni rekɔdiɔ lalai lɛ yabɔi nitsumɔ. Mɛi banya milalai lɛ ahe waa, no hewɔ lɛ, afɔɔ tswaa yɛ Quebec redio steshɛŋ.

 Etamɔ nɔ ni mináa nɔ fɛɛ nɔ ni mitaoɔ. No mli lɛ, mi ji oblanyo ni ehe gbɛ́i, ni miiná shika yɛ nɔ ni misumɔɔ feemɔ waa lɛ mli. Leebi lɛ miyagbɔleɔ mikpɔiaŋ, mɛi babibiɔ mi saji, misaiŋɔ mɛi anibii ahe, ni ashaa mi kɛbaa TV nɔ. Kɛ́ je na lɛ, miyatswaa lala ni miyaa paati. Bɔ ni afee ni manyɛ madamɔ mɛi babaoo ni eba amɛbaakwɛ mi lɛ naa lɛ, mibɔi dãanumɔ be ni miji oblanyo, ni sɛɛ mli lɛ, mikɛ tsofai ni akɛtsuɔ nii yɛ gbɛ ni ejaaa nɔ hu bɔi nitsumɔ. Miba mijeŋ kɛkɛ ni mikɛ miihe wo jeŋba sha mli.

 Mɛi komɛi ná kulɛ amɛ tamɔ mi ejaakɛ daanɛɛ amɛnaa akɛ miyɛ miishɛɛ. Shi yɛ anɔkwale mli lɛ, miji mɔ ni bɛ miishɛɛ kwraa, titri lɛ, kɛ́ mi kome miyɛ he ko. Mihao ni mifee yeyeeye. Mɔbɔ sane ji akɛ, be ni mishɛ shɔŋŋ yɛ lalafoo lɛ mli lɛ, AIDS gbe mɛi ni yeɔ amɛbuaa lalafolɔi ni mikɛtsuɔ nii lɛ ateŋ mɛi enyɔ. Minaa kpɛ mihe! Eyɛ mli akɛ misumɔɔ lala waa moŋ, shi jeŋba ni lalafolɔi kɛ amɛhe woɔ mli lɛ fee mi taŋ waa.

 Eyɛ mli akɛ miiye omanye yɛ shihilɛ mli moŋ, shi mile akɛ nɔ ko eyaaa nɔ jogbaŋŋ yɛ je lɛ mli. Mɛni hewɔ ayeee jalɛsane kwraa nakai? Minaaa nɔ hewɔ ni Nyɔŋmɔ efeko nɔ ko yɛ he lolo lɛ. Anɔkwa, bei pii lɛ, misɔleɔ koni Nyɔŋmɔ ahã mana hetoi lɛ. Be ko be ni mitee shisharamɔ ni mita shi fioo koni majɔɔ mihe lɛ, mibɔi Biblia lɛ kanemɔ ekoŋŋ. Eyɛ mli akɛ minuuu nibii ni mikane lɛ babaoo shishi jogbaŋŋ moŋ, shi miyɔse akɛ je nɛɛ naagbee lɛ eshɛ etã.

 Be ni mikaneɔ Biblia lɛ, mina akɛ be ko lɛ, Yesu hi ŋmaa gbii 40 yɛ ŋa lɛ nɔ. (Mateo 4:​1, 2) Mikɛɛ mihe akɛ, kɛ́ mi hu mifee nakai lɛ, ekolɛ, Nyɔŋmɔ baajie ehe kpo etsɔɔ mi, no hewɔ lɛ, mito be ni mikɛbaaje ŋmaahilɛ lɛ shishi. Be ni eshwɛ otsii enyɔ ni maje shishi lɛ, Yehowa Odasefoi enyɔ batswa mishinaa lɛ ni mikɛɛ amɛ akɛ amɛba mli tamɔ nɔ ni no mli lɛ, miikpa amɛ gbɛ. Mikwɛ amɛteŋ mɔ kome ni atsɛɔ lɛ Jacques lɛ hiɛ gãa ni mibi lɛ akɛ, “Te wɔfeɔ tɛŋŋ wɔleɔ akɛ je nɛŋ naagbee gbii lɛ amli wɔyɔɔ lɛ?” Ekane 2 Timoteo 3:​1-5 lɛ kɛhã mi hetoo. Mibi amɛ saji krokomɛi babaoo kɛtsara nɔ, ni hetoi ni jwɛŋmɔ yɔɔ mli ni amɛhã mi lɛ hã minaa kpɛ miihe ni miná miishɛɛ waa, ejaakɛ fɛɛ jɛ Biblia lɛ mli. Be ni amɛkɛ mi kase nii gbii fioo lɛ, mina akɛ ehe ehiaaa ni mahi ŋmaa.

 Mikɛ Odasefoi lɛ bɔi Biblia lɛ kasemɔ kwraa agbɛnɛ. Naagbee lɛ, miku miyitsɔi kakadaŋŋ lɛ, ni mibɔi kpee yaa yɛ Maŋtsɛyeli Asa lɛ nɔ. Bɔ ni amɛhere mi yɛ kpee lɛ shishi lɛ hã miná nɔmimaa akɛ, mina anɔkwa jamɔ lɛ.

 Anɔkwa, ehe bahia ni mafee tsakemɔi wuji yɛ mishihilɛ mli kɛtsɔɔ akɛ mikɛ nibii ni mikaseɔ yɛ Biblia lɛ mli lɛ miitsu nii. Eko ji, esa akɛ mikɛ tsofai akpa nitsumɔ yɛ gbɛ ni ejaaa nɔ, ni matsi mihe kɛje jeŋba sha hu he. Agbɛnɛ hu, ehe bahia ni makpa mipɛ minɔ mli fomɔ ni masusu mɛi krokomɛi ahe waa. Akɛni mikome mitsɔseɔ mibii enyɔ lɛ hewɔ lɛ, ebabi ni mabɔ mɔdɛŋ mahã amɛná miishɛɛ ni matsɔɔ amɛ Nyɔŋmɔ he nii hu. No hewɔ lɛ, mikpa lala feemɔ ni miyatao nitsumɔ ko ni nyɔmɔwoo lɛ faaa.

 Mináaa tsakemɔi nɛɛ afeemɔ mlɛo. Be ni mimiaa mihiɛ koni makpa tsofai kɛnitsumɔ yɛ gbɛ ni ejaaa nɔ lɛ, hela mɔ mi bei komɛi, ni miku misɛɛ kɛtee miyɛlɛ ŋmɔ lɛ mli ekoŋŋ. (Romabii 7:​19, 21-​24) Nɔ ni kpamɔ wa kɛhã mi fe fɛɛ ji, mijeŋba gbonyo lɛ. Agbɛnɛ hu, minitsumɔ hee lɛ gbala mimli, ni nyɔmɔ ni awoɔ mi ni faaa lɛ hu hao mi waa. Shika ni no mli lɛ minaa kɛ́ mikɛ ŋmɛlɛtswai enyɔ tswa lala lɛ, amrɔ nɛɛ eheɔ mi nyɔji etɛ dani minaa.

 Sɔlemɔ ye ebua mi ni minyɛ mikpee tsakemɔi ni bɛ mlɛo nɛɛ anaa. Biblia lɛ ni mikaneɔ daa lɛ hu ye ebua mi waa. Ŋmalɛi pɔtɛɛ komɛi wo mi hewalɛ waa. Eko ji 2 Korintobii 7:1, ni woɔ Kristofoi hewalɛ ni “amɛjie nɔ fɛɛ nɔ ni woɔ mɔ he muji yɛ heloŋ kɛ jwɛŋmɔ mli lɛ kɛje amɛhe” lɛ. Ŋmalɛ kroko ni hã miná nɔmimaa akɛ manyɛ majie sui gbohii nɛɛ kɛje mihe ji Filipibii 4:​13 lɛ ni kɛɔ akɛ: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ” lɛ. Yehowa Nyɔŋmɔ hã misɔlemɔi lɛ ahetoo ni eye ebua mi ni minu Biblia mli anɔkwalei lɛ ashishi ni mikɛtsu nii. Enɛ tsirɛ mi ni mijɔɔ miwala nɔ mihã lɛ. (1 Petro 4:​1, 2) Yɛ afi 1997 lɛ, abaptisi mi akɛ Yehowa Odasefonyo.

 Miheɔ miyeɔ akɛ, eji mitsakeee kulɛ, benɛ nɛɛ migbo. Amrɔ nɛɛ po lɛ, miyɛ miishɛɛ waa yɛ shihilɛ mli! Miŋa ni misumɔɔ lɛ ni atsɛɔ lɛ Elvie lɛ ye ebua mi waa. Amrɔ nɛɛ, mi kɛ lɛ fɛɛ yɛ be fɛɛ sɔɔmɔ lɛ mli ni wɔkɛ miishɛɛ miitsɔɔ mɛi Biblia mli anɔkwale lɛ. Enɛ hãa mimii shɛɔ mihe ni mitsui hu nyɔɔ mimli. Miida Yehowa shi waa akɛ egbala mi kɛba emasɛi.​—Yohane 6:​44.