Atsɔse mi akɛ Katoliknyo yɛ Rochester, yɛ New York. Mifɔlɔi lɛ ateŋ gbala be ni miye afii kpaanyɔ. Mihiɔ mimami ŋɔɔ yɛ otsi lɛ mli yɛ he ko ni afee ahã ohiafoi, ni otsii lɛ anaagbee lɛ miyaa mipapa ŋɔɔ, eyɛ he ko ni niiatsɛmɛi yɔɔ. Be ni mina bɔ ni mimami tsomloɔ kɛkwɛɔ wɔ, ni ji ebii ekpaa lɛ, ehã minu he akɛ esa akɛ mabatsɔ niiatsɛ koni mikɛye mabua kɛkwɛ miweku lɛ.

 No mli lɛ, mipapa miitao ni maná nii waa, no hewɔ lɛ, eto gbɛjianɔ ni miyasara skul ko ni ehe gbɛ́i waa ni atsɔɔ hotɛl he nii yɛ jɛmɛ. Mibanya he, ni mibɔi skul nɛɛ yaa kɛsusumɔ akɛ, Nyɔŋmɔ miihã misɔlemɔ ni misɔleɔ ni matsɔ niiatsɛ ni maná miishɛɛ lɛ hetoo. Mikɛ afii enumɔ kase bɔ ni akwɛɔ hotɛl nɔ ahãa, mlai ni akɛkudɔɔ nitsumɔi, kɛ bɔ ni esa akɛ nitsumɔi kɛ amɛshikai atsu nii ahã. Nakai beiaŋ nɔŋŋ lɛ miitsu nii yɛ hotɛl ko ni ashwɛɔ asɔ yɛ jɛmɛ yɛ Las Vegas ni yɔɔ Nevada.

 Be ni miye afii 22 lɛ, no mli lɛ, mibatsɔ hotɛl ko ni ashwɛɔ asɔ yɛ jɛmɛ lɛ nɔkwɛlɔ lɛ sɛɛmɔ. Abana mi akɛ niiatsɛ ni eye omanye, miyeɔ niyenii kpakpai lɛ fɛɛ eko, ni minuɔ dãji ni jara wala. Minanemɛi nitsulɔi lɛ kɛɔ mi akɛ, “Kaimɔ akɛ shika ji nɔ ni he hiaa fe fɛɛ yɛ je lɛ mli.” Yɛ amɛsusumɔ naa lɛ, shika ji nɔ titri ni hãa mɔ náa miishɛɛ diɛŋtsɛ.

 Minitsumɔ ni mitsuɔ lɛ biɔ ni makwɛ ni niiatsɛmɛi kpanaa ni baa Las Vegas amɛbashwɛɔ asɔ lɛ aná nibii ni amɛtaoɔ kɛ nɔ fɛɛ nɔ ni he hiaa amɛ yɛ jɛmɛ. Amɛyɛ shika waa moŋ, shi minaa amɛ akɛ amɛbɛ miishɛɛ. Ebashɛ he ko lɛ, mi hu mináaa miishɛɛ. Mibaná shika babaoo, mibatsɔ niiatsɛ kpanaa, shi mináaa miishɛɛ ni mináaa wɔ kpakpa mawɔ hu. Mibɔi miyiŋ shwiemɔ akɛ, ehi akɛ magbo moŋ fe ni mahi wala mli. Minijiaŋ baje wui waa, no hewɔ lɛ misɔle mibi Nyɔŋmɔ akɛ, “Te mafee tɛŋŋ maná miishɛɛ diɛŋtsɛ lɛ?”

 Nakai beiaŋ nɔŋŋ lɛ, minyɛmimɛi yei enyɔ ni ebatsɔmɔ odasefoi lɛ fã ni amɛbahi Las Vegas. Eyɛ mli akɛ mikpoo akɛ makane amɛwoji lɛ moŋ, shi mikpɛlɛ akɛ yɛ mikɛ amɛsanegbaa mli lɛ masumɔ ni makane mi diɛŋtsɛ mi-Biblia lɛ. Yɛ mi-Biblia lɛ mli lɛ, aŋmala Yesu wiemɔ lɛ fɛɛ kɛ iŋki tsuru. Akɛni mikpɛlɛɔ nɔ fɛɛ nɔ ni Yesu wie lɛ nɔ hewɔ lɛ, minyɛmimɛi yei lɛ kɛ mi susu Yesu he titri. Mikometoo hu mikaneɔ mi-Biblia lɛ.

 Nibii ni mikane lɛ babaoo hã minaa kpɛ mihe waa. Akɛ nɔkwɛmɔnɔ lɛ, Yesu wie akɛ: “Kɛ́ oosɔle lɛ, kaawie wiemɔ kome too lɛ nɔŋŋ shii abɔ, tamɔ bɔ ni jeŋmajiaŋbii lɛ feɔ lɛ, ejaakɛ amɛsusuɔ akɛ amɛwiemɔ babaoo lɛ baahã abo amɛ toi.” (Mateo 6:7) Shi no mli lɛ, osɔfo ko ehã mi Yesu he mfoniri, ni ekɛɛ mi akɛ, kɛ́ misɔle mihã mfoniri lɛ, ni mikɛɛ Wɔ-Tsɛ ni yɔɔ ŋwɛi lɛ shii nyɔŋma, kɛ Hail Mary shii nyɔŋma lɛ, Nyɔŋmɔ baahã mi shika abɔ fɛɛ shika abɔ ni mitaoɔ. Shi miyɔse akɛ, kɛ́ miti wiemɔ kome too nɛɛ nɔŋŋ mli shii abɔ lɛ, belɛ, miiku Yesu wiemɔ nɛɛ mli. Mikane Yesu wiemɔi nɛɛ hu akɛ: “Nyɛkatsɛa mɔ ko nyɛtsɛ yɛ shikpɔŋ lɛ nɔ, ejaakɛ mɔ kome ji nyɛ-Tsɛ, mɔ ni yɔɔ ŋwɛi lɛ.” (Mateo 23:9) Hewɔ lɛ mibi mihe akɛ, ‘Mɛni hewɔ ni mi kɛ minyɛmimɛi Katolikbii krokomɛi lɛ tsɛɔ wɔ-osɔfo lɛ akɛ “Father” loo Tsɛ lɛ?’

 Be ni mikane Biblia wolo ni ji Yakobo lɛ, ehã mibajwɛŋ nɔ ni mikɛ miwala tsuɔ yɛ je nɛɛ mli lɛ nɔ jogbaŋŋ. Yɛ Yakobo yitso 4 kuku 4 lɛ, Yakobo ŋma akɛ: “Ani nyɛleee akɛ naanyo ni akɛ je lɛ bɔɔ lɛ ji nyɛɛ ni anyɛɔ Nyɔŋmɔ? No hewɔ lɛ, mɔ fɛɛ mɔ ni sumɔɔ akɛ etsɔ je lɛ naanyo lɛ, eetsɔ ehe Nyɔŋmɔ henyɛlɔ.” (Yakobo 4:4) Kuku 17 lɛ po ni ta mitsuiŋ waa lɛ. Ekɛɛ: “Kɛ́ mɔ ko le bɔ ni eeefee efee nɔ ni ja, shi efeee lɛ, esha ji no hã lɛ.” No hewɔ lɛ, mitsɛ minyɛmimɛi yei lɛ ni mikɛɛ amɛ akɛ, miikpa nitsumɔ ni mitsuɔ yɛ hotɛl lɛ ejaakɛ ehãa mikɛ mihe woɔ nibii ni esaaa Nyɔŋmɔ hiɛ lɛ amli, asɔshwɛmɔ kɛ hiɛkɔ̃ɔ fata nibii nɛɛ ahe.

 No hewɔ lɛ, mikpɛ miyiŋ akɛ mafee nibii ni baahã naanyobɔɔ ni kã mikɛ Nyɔŋmɔ teŋ lɛ mli awa, ni mabɔ mɔdɛŋ mahã wekukpaa ni kã mikɛ mifɔlɔi kɛ minyɛmimɛi lɛ ateŋ lɛ hu mli awa. Enɛ hã mibafee tsakemɔi yɛ mishihilɛ mli, ni mishihilɛ fee mlɛo koni maná be kɛfee nibii nɛɛ. Shi mináaa tsakemɔi nɛɛ afeemɔ mlɛo kwraa. Akɛ nɔkwɛmɔnɔ lɛ, akɛɛ mi akɛ abaawó minɔ yɛ asɔshwɛmɔ nitsumɔ lɛ mli, ni no baahã abɔ minyɔmɔwoo lɛ he toi enyɔ loo etɛ sɔŋŋ. Shi be ni misɔle yɛ sane lɛ he sɛɛ lɛ, mikpɛ mli akɛ, mikɛ mihe woŋ shihilɛ nɛɛ mli dɔŋŋ; enɛ hewɔ lɛ mikpoo hegbɛ nɛɛ. Mikpa nitsumɔ lɛ ni mishi mitee mimami shĩa lɛ, misaa garage lɛ, ni mikɛ bɔi nitsumɔ fioo ko tsumɔ, no ji milaminatiɔ mfonirii ni niyelihei loo restaurants lɛ printiɔ kɛhã amɛnitsumɔ lɛ.

 Eyɛ mli akɛ no mli lɛ, Biblia lɛ miiye eebua mi ni miikpɛ yiŋ ni ja moŋ nɛ, shi miyaaa Yehowa Odasefoi lɛ akpeei. Minyɛmimɛi yei lɛ bi mi akɛ, “Mɛni hewɔ osumɔɔɔ Yehowa Odasefoi lɛ asane lɛ?” Mihã amɛ hetoo akɛ: “Ejaakɛ Yehowa, nyɛ-Nyɔŋmɔ lɛ kɛ mligbalamɔi baa wekui amli. Bei pɛ ni maná ni mikɛ weku lɛ ata shi ni wɔgba sane kɛná wɔhe miishɛɛ ji Blonya kɛ fɔmɔgbiyeli nɛkɛ, shi nyɛ lɛ, nyɛkɛ nyɛhe wooo gbii juji nɛɛ amli.” Minyɛmimɛi yei lɛ ateŋ mɔ kome bɔi yaafo ni ebi mi akɛ: “Ni afii lɛ mli gbii krokomɛi lɛ mɛni ofeɔ? Wɔ lɛ, wɔmiisumɔ ni wɔna bo yɛ biɛ be fɛɛ be. Shi bo lɛ, osumɔɔ ni oba biɛ yɛ nakai gbii juji lɛ anɔ pɛ, ni ofeɔ nakai hu akɛni onuɔ he akɛ esa akɛ oba lɛ hewɔ.” Nɔ ni ekɛɛ mli lɛ bote mitsui mli waa, ni mi hu mibɔi yaafo.

 Be ni mibayɔse akɛ Yehowa Odasefoi sumɔɔ amɛwekui waa ni susumɔ ni mihiɛ yɛ amɛhe lɛ ejaaa lɛ, mikpɛ mli akɛ maya amɛkpeei lɛ eko yɛ Maŋtsɛyeli Asa lɛ nɔ. Beni mitee lɛ mikɛ nuu ko ni atsɛɔ lɛ Kevin kpe yɛ jɛmɛ, eji Biblia tsɔɔlɔ ko ni le nitsɔɔmɔ waa. Sɛɛ mli lɛ ekɛ mi bɔi nikasemɔ.

 Kevin kɛ eŋa lɛ efee amɛshihilɛ mlɛo bɔ ni afee ni amɛná be saŋŋ kɛye abua mɛi ni amɛnu Biblia lɛ shishi. Nitsumɔ ni amɛtsuɔ lɛ hãa amɛnáa shika bɔ ni sa kɛkwɛɔ amɛhe ni amɛkɛ eko fãa gbɛ kɛyaa Afrika kɛ Central Amerika, koni amɛyaye amɛbua kɛmamɔ Yehowa Odasefoi anitsumɔhe niji. Amɛyɛ miishɛɛ waa ni amɛsumɔɔ amɛhe hu. Mikɛɛ mihe akɛ, ‘Nɛkɛ ji bɔ ni mishweɔ ni mahi shi.’

 Kevin kɛ vidio ko tsɔɔ mi, ni ehã mina miishɛɛ ni yɔɔ maŋsɛɛ sɔɔmɔ nitsumɔ lɛ mli. No hewɔ lɛ, mikpɛ mli akɛ nitsumɔ nɛɛ ji nɔ ni masumɔ ni matsu. Yɛ afi 1995, be ni akɛ mi ekase Biblia lɛ nyɔji ekpaa ni mitsɔɔ akɛ mihiɛ dɔɔ nikasemɔ lɛ he, ni misumɔɔ waa lɛ, abaptisi mi akɛ Yehowa Odasefonyo. Nɔ najiaŋ ni mabi Nyɔŋmɔ ni ehã maná nii lɛ, misɔle mikɛɛ lɛ akɛ: “Kaahã miye ohia, ni kaahã miná nii hu.”​—Abɛi 30:8.

 Amrɔ nɛɛ, niiatsɛ diɛŋtsɛ ji mi​—jeee yɛ shika gbɛfaŋ, shi yɛ mikɛ Nyɔŋmɔ teŋ naanyobɔɔ lɛ kɛ miishɛɛ ni miyɔɔ yɛ shihilɛ mli lɛ hewɔ. Mikɛ miŋa Nuria ni misumɔɔ lɛ waa lɛ kpe yɛ Honduras, ni wɔsɔmɔ akɛ maŋsɛɛ sɔɔlɔi yɛ Panama ni amrɔ nɛɛ wɔmiisɔmɔ akɛ maŋsɛɛ sɔɔlɔi yɛ Mexico. Kwɛ bɔ ni Biblia mli sane nɛɛ ji anɔkwale hã akɛ: “Yehowa jɔɔmɔ lɛ, no feɔ mɔ niiatsɛ, ni ekɛ piŋmɔ ko fataaa he”!​—Abɛi 10:22.