“Kɛ́ ootao ni okase Nyɔŋmɔ he nii lɛɛlɛŋ lɛ, no lɛ yaa nɔ okɛ Yehowa Odasefoi abɔ.” Be ni minu nakai sane lɛ, minaa kpɛ mihe. Nakai beiaŋ lɛ, mikɛ Yehowa Odasefoi ebɔi nikasemɔ. Shi bɔ ni afee ni onu bɔ ni minu he mihã lɛ shishi lɛ, hã magba bo mishihilɛ mli sane fioo.

 Afɔ mi yɛ maŋ ko ni yɔɔ El Salvador ni atsɛɔ lɛ Quezaltepeque lɛ mli. Afɔ wɔyi 15, ni miji bi ni ji 6 nɔ. Mifɔlɔi bɔ mɔdɛŋ akɛ amɛbaatsɔse mi ni maye anɔkwa ni maye mla nɔ. Kɛfata he lɛ, bei komɛi lɛ, Leonardo kɛ Yehowa Odasefoi krokomɛi baa amɛkɛ wɔ bakaseɔ Biblia lɛ. Shi mikɛ nɔ ni amɛtsɔɔ wɔ lɛ tsuuu nii, ni mikpɛ yiŋ komɛi ni esaaa yɛ mishihilɛ mli. Be ni miye afii 14 lɛ, mikɛ minanemɛi ni mikɛyaa skul lɛ bɔi daanumɔ ni wɔkɛ tsofai hu tsu nii yɛ gbɛ ni ejaaa nɔ. Amɛ fɛɛ amɛshi skul lɛ ni amɛkɛ amɛhe yabɔ kui komɛi ahe ni mi hu minyiɛ amɛnɔkwɛmɔnɔ gbonyo lɛ sɛɛ. Wɔkɛ gbɛjegbɛi lɛ ahe fee wɔshihilɛhe, ni wɔbaa shika yɛ mɛi adɛŋ, ni wɔju hu koni wɔkɛhe dãa kɛ tsofai lɛ.

 Kuu nɛɛ batsɔ miweku. Minu he akɛ esa akɛ maye amɛ anɔkwa. Akɛ nɔkwɛmɔnɔ lɛ, be ko lɛ, kuu lɛ mli nyo ko ni kɛ tsofai lɛ eko etsu nii ni eba ehiɛ waa lɛ yatutua mɔ ko ni mikɛ lɛ yɔɔ akutso mli. Be ni amɛnɔɔ lɛ, mɔ ni mikɛyɔɔ akutso mli lɛ nine gbe minaanyo lɛ ni etswa polisi. Mimli fu waa ni mikɛ tsokpoti ko bɔi mikutsoŋnyo lɛ lɔle lɛ fitemɔ bɔ ni afee ni eŋmɛɛ minaanyo lɛ he. Be ni mijwaraa mikutsoŋnyo lɛ lɔle lɛ shinai lɛ glasei lɛ, ekpa mi fai koni mikpa, shi mikpaaa.

 Be ni miye afii 18 lɛ, kuu ni miyɔɔ mli lɛ kɛ polisifoi yanɔ. No mli lɛ, mihiɛ bɔmbu ni miitao mafɔ, nɔŋŋ ni efɛ yɛ midɛŋ​—mileee bɔ ni fee ni eba lɛ nakai. Nɔ ni mikaiɔ nɔŋŋ ji, minine fɛɛ gbɛ ni nɔ nyɔ minɔ. Be ni mihiɛtserɛ mi yɛ helatsamɔhe lɛ, mina akɛ minine kome bɛ jɛmɛ, ni mitoi jurɔ nuuu nii, ni mihiŋmɛi jurɔ hu enaaa nii jogbaŋŋ.

 Enɛ fɛɛ sɛɛ lɛ, be ni ajie mi lɛ, miyafata mikuu lɛ he ekoŋŋ. No sɛɛ etsɛɛɛ lɛ, polisifoi bamɔ mi ni amɛyawo mi tsuŋ. Bɔ ni mikɛ mikuu lɛ mli bii lɛ yɔɔ hãa lɛ mli bawa waa yɛ tsuŋwoohe lɛ. Wɔfeɔ ekome kɛfeɔ nii gbi muu fɛɛ​—wɔyeɔ leebi niyenii, wɔshɛreɔ wii, ni wɔhiɛɔ mli nakai aahu kɛyashiɔ wɔyaboteɔ saa mli.

 Be ni miyɔɔ tsuŋwoohe lɛ, Leonardo basara mi. Be ni wɔgbaa sane lɛ, ekɛ enine tsɔɔ tatuu ko ni yɔɔ minine jurɔ he lɛ ni ebi mi akɛ. “Ani ole nɔ ni tatuu etɛ nɛɛ tsɔɔ?” Mikɛɛ lɛ akɛ, “Hɛɛ, mile, bɔlɛnamɔ, tsofai ni akɛtsuɔ nii yɛ gbɛ ni ejaaa nɔ, kɛ rock and roll.” Shi Leonardo kɛɛ lɛ akɛ: “Enɛɛmɛi damɔ shi kɛhã helatsamɔhe, tsuŋwoohe, kɛ gbele. Oyakã helatsamɔhe, ni amrɔ nɛɛ awo bo tsuŋ. Bɛ ole nɔ ni eshwɛ?”

 Nɔ ni Leonardo wie lɛ hã mihiɛ fee mi yaa. Esane ja. No mli lɛ, miitsɔ bɔ ni mihiɔ shi mihãa lɛ nɔ miitsa mi diɛŋtsɛ migbonyobu. Leonardo bi mi kɛ́ masumɔ ni ekɛ mi akase Biblia lɛ, ni mikpɛlɛ. Nɔ ni mikase yɛ Biblia lɛ mli lɛ hã mitsake mishihilɛ. Akɛ nɔkwɛmɔnɔ lɛ, Biblia lɛ kɛɔ akɛ “naanyobɔɔ gbonyo fiteɔ jeŋba kpakpa.” (1 Korintobii 15:33, shishigbɛ niŋmaa) No hewɔ lɛ, nɔ klɛŋklɛŋ ni ebi ni mafee ji mi matao nanemɛi hei. Enɛ hewɔ lɛ, mikpa kpeei ni kuu lɛ feɔ lɛ yaa, ni mibɔi Yehowa Odasefoi akpeei ni afeɔ yɛ tsuŋwoohe lɛ moŋ yaa. Mikɛ mɔ ko ni mikɛyɔɔ tsuŋwoohe lɛ ni atsɛɔ lɛ Andrés, ni no mli lɛ abaptisi lɛ yɛ tsuŋwoohe lɛ ni etsɔ Yehowa Odasefonyo lɛ kpe yɛ Odasefoi lɛ akpee lɛ eko shishi. Ekɛɛ mi koni mibafata ehe kɛye leebi niyenii. Kɛjɛ no nɔ kɛbaa lɛ, agbɛnɛ, mishɛreee wii kɛjeee gbi lɛ shishi dɔŋŋ. Moŋ lɛ, daa leebi lɛ Andrés kɛ mi kaneɔ Biblia lɛ kuku kome, ni wɔsusuɔ he.

 Etsɛɛɛ nɔŋŋ ni mikuu lɛ mli bii lɛ na akɛ miitsake. No hewɔ lɛ, kuu lɛ hiɛnyiɛlɔi lɛ ateŋ mɔ kome kɛɛ eetao ekɛ mi awie. Mitsui fã. Ejaakɛ kɛ́ mikɛɛ lɛ nɔ ni mikpɛ miyiŋ akɛ mafee lɛ mileee nɔ ni ebaafee mi, ebɛ mlɛo akɛ mɔ ko baashi kuu lɛ mli. Ekɛɛ mi akɛ: “Wɔna akɛ gbii etɛ nɛɛ obaaa wɔkpeei lɛ, shi oyaa Yehowa Odasefoi akpeei lɛ moŋ. Mɛni okpɛ oyiŋ akɛ obaafee?” Mikɛɛ lɛ akɛ miitao maya nɔ makase Biblia lɛ koni mishihilɛ atsake. Ekɛɛ mi akɛ, kuu lɛ efeŋ mi efɔŋ ko gbii abɔ ni mikɛɛ miitao matsɔ Yehowa Odasefonyo, enɛ hã minaa kpɛ mihe waa. Kɛkɛ ni ekɛfata he akɛ: “Kɛ́ ootao ni okase Nyɔŋmɔ he nii lɛɛlɛŋ lɛ, no lɛ yaa nɔ okɛ Yehowa Odasefoi abɔ. Wɔmiikpa gbɛ akɛ obaakpa nibii fɔji feemɔ. Obɔ mɔdɛŋ. Onyiɛ gbɛ kpakpa lɛ nɔ. Odasefoi lɛ baanyɛ amɛwa bo. Be ni miyɔɔ United States lɛ, Yehowa Odasefoi kɛ mi kase nii, ni miyɛ wekumɛi komɛi hu ni ji Yehowa Odasefoi. Kaashe gbeyei. Yaa nɔ okɛ amɛ abɔ.” Be ni ewieɔ lɛ, miishe gbeyei, shi eŋɔɔ minaa hu. Mida Yehowa Nyɔŋmɔ shi yɛ mitsui mli. Minu he tamɔ loofɔlɔ ko ni aŋmɛɛ ehe, ni minu Yesu wiemɔi nɛɛ shishi, ekɛɛ akɛ: “Nyɛbaale anɔkwale lɛ, ni anɔkwale lɛ baahã nyɛye nyɛhe.”​—Yohane 8:32.

 Shi mitsutsu nanemɛi lɛ ekomɛi kɛ tsofãi fɔji bɔi mi kaa. Anɔkwa, bei komɛi lɛ amɛnine shɛɔ minɔ. Shi be ni be shwie mli lɛ, naagbee mli aahu lɛ minyɛ miye sui gbohii nɛɛ anɔ.​—Lala 51:10, 11.

 Be ni ajie mi yɛ tsuŋwoohe lɛ sɛɛ lɛ, minanemɛi babaoo susu akɛ maku misɛɛ kɛya mitsutsu shihilɛ gbonyo mli ekoŋŋ shi eyabaaa lɛ nakai. Moŋ lɛ, miku misɛɛ kɛtee tsuŋwoohe lɛ ni mikɛ mɛi ni kulɛ mikɛyɔɔ jɛmɛ lɛ yagba nibii ni mikase yɛ Biblia lɛ mli lɛ ahe sane. Agbɛnɛ mitsutsu nanemɛi lɛ bahe amɛye akɛ mitsake lɛɛlɛŋ. Dɔlɛ sane ji akɛ, jeee nakai mitsutsu henyɛlɔi lɛ nu he amɛhã.

 Gbi ko be ni mikɛ nyɛminuu ko nyiɛ shiɛmɔ nɔ lɛ, trukaa lɛ, kuu ko ni be ko ni eho lɛ amɛkɛ kuu ni kulɛ mikɛbɔɔ lɛ tswaa lɛ bagba amɛbɔle wɔ kɛ tui ni amɛmiitao ni amɛgbe mi. Mɔ ni mikɛnyiɛ shiɛmɔ nɔ lɛ fee ekãa ni ejɛ mlijɔlɛ mli egbala mli etsɔɔ amɛ akɛ, mibɛ nakai kuu lɛ mli dɔŋŋ. Be ni enɛ yaa nɔ lɛ, midamɔ shi diŋŋ. Amɛyi mi ni amɛbɔ mi kɔkɔ akɛ mikaba jɛmɛ dɔŋŋ, no sɛɛ lɛ, amɛba amɛtui lɛ ashi ni amɛŋmɛɛ wɔhe akɛ wɔya. Biblia lɛ etsake mi lɛɛlɛŋ. Be ko ni eho lɛ kulɛ, mikɛ amɛ baanɔ. Shi amrɔ nɛɛ, mikɛ Biblia ŋaawoo ni yɔɔ 1 Tesalonikabii 5:​15 lɛ tsuɔ nii, jɛmɛ kɛɛ: “Nyɛkwɛa ni mɔ ko kɛ efɔŋ akato efɔŋ najiaŋ, shi moŋ be fɛɛ be lɛ, nyɛtiua ekpakpa sɛɛ nyɛhãa nyɛhe kɛ mɛi krokomɛi fɛɛ.”

 Kɛjɛ be ni mibatsɔ Yehowa Odasefonyo nɛɛ miimia mihiɛ koni maye anɔkwa be fɛɛ be. Mináaa lɛ mlɛo. Kɛ̃lɛ, Yehowa Nyɔŋmɔ kɛ Biblia mli ŋaawoi kɛ minanemɛi hei lɛ eye ebua mi ni miye omanye. Misumɔɔɔ ni maku misɛɛ kɛya miyɛlɛ ŋmɔ lɛ mli dɔŋŋ kɔkɔɔkɔ.​—2 Petro 2:​22.

 Be ko ni eho lɛ, mifeɔ yiwalɛ nii ni mimli fuɔ waa. Mile jogbaŋŋ akɛ, eji mitsakeee kulɛ, benɛ mibɛ wala mli. Nibii ni mikase kɛjɛ Biblia lɛ mli lɛ etsake mi. Mikpa nibii gbohii ni mifeɔ lɛ. Amrɔ nɛɛ toiŋjɔlɛ yɛ mikɛ mitsutsu henyɛlɔi lɛ ateŋ. (Luka 6:​27) Nanemɛi ni miyɔɔ amrɔ nɛɛ eye ebua mi ni miná sui kpakpai. (Abɛi 13:20) Miná miishɛɛ yɛ shihilɛ mli, ejaakɛ miisɔmɔ Nyɔŋmɔ, mɔ ni kɛ eshai fɛɛ ni miifee lɛ eke mi lɛ.​—Yesaia 1:​18.

 Yɛ 2006 mli lɛ, mitee skul krɛdɛɛ ni afeɔ ahãa Kristofoi ni boteko gbalashihilɛ mli ni shiɛɔ sanekpakpa lɛ. Afii komɛi asɛɛ lɛ, mikɛ yoo ni misumɔɔ waa lɛ bote gbalashihilɛ mli, ni amrɔ nɛɛ wɔyɛ biyoo kome ni wɔmiitsɔse lɛ. Bianɛ lɛ, mikɛ be babaoo tsɔɔ mɛi Biblia mli shishitoo mlai ni ye ebua mi lɛ. Miisɔmɔ akɛ asafoŋ onukpa hu yɛ misafo lɛ mli, ni mibɔɔ mɔdɛŋ akɛ maye mabua oblahii lɛ koni amɛkakɔ gbɛ gbonyo ni mikɔ be ni mitamɔ amɛ lɛ. Nɔ najiaŋ ni matsa mi diɛŋtsɛ migbonyo bu lɛ, amrɔ nɛɛ miifee nibii ni baahã wɔsɛɛ lɛ, maná Nyɔŋmɔ shiwoi ni yɔɔ Biblia lɛ mli lɛ ahe sɛɛ.