Afɔ mi yɛ Calgary yɛ Alberta ni yɔɔ Canada lɛ. Be mifɔlɔi tse gbãla lɛ, gbekɛ bibioo ji mi, ni mimami kɛ mi yahi efɔlɔi ashĩa. Mimami fɔlɔi lɛ sumɔɔ mi kɛ mimami sane waa, ni mimii shɛɔ mihe hu. Ŋmɛnɛ po lɛ, kɛ́ mikai bɔ ni no mli lɛ miyɔɔ toiŋjɔlɛ nakai beiaŋ lɛ, mináa miishɛɛ waa.

 Be ni miye afii kpawo lɛ, mimami kɛ mipapa yahi shi ekoŋŋ, ni wɔfã kɛtee St. Louis, yɛ Missouri, ni yɔɔ United States lɛ; enɛ hã mishihilɛ fite kwraa. Eyeee be ko ni miyɔse akɛ asomoaŋ lɛ, mipapa yitsoŋ wa waa diɛŋtsɛ. Akɛ nɔkwɛmɔnɔ lɛ, gbi klɛŋklɛŋ ni mitee miskul hee lɛ, be ni akpa ni miba shĩa lɛ, mipapa ná ele akɛ skulbii lɛ yi mi shi miyiii amɛ eko. Emli fu waa, ni egba mi ma waa fe bɔ ni skulbii lɛ fee mi lɛ po! Mikase su gbonyo nɛɛ, ni be ni miye afii kpawo pɛ lɛ mikɛ skulbii lɛ eko nɔ klɛŋklɛŋ kwraa.

 Akɛni mipapa tsui baa mramra hewɔ lɛ, mimami náaa miishɛɛ ni bei pii lɛ amɛtaa saji anaa ni amɛnɔɔ. Be ni miye afii 11 lɛ, mibɔi dãa tɔɔ, ni mikɛ tsofai hu bɔi nitsumɔ yɛ gbɛ ni esaaa nɔ. Mihiɛ bafee laŋlaŋ, ni daa nɛɛ mikɛ mɛi miinɔ yɛ gbɛjegbɛi ahe. Be ni migbeɔ sɛkɛndre skul naa lɛ, mibatsɔ mɔ ko ni sumɔɔ yiwalɛ nifeemɔ waa.

 Be ni miye afii 18 lɛ, ahe mi afata Amerika asraafoi ni atsɛɔ amɛ Marine Corps lɛ ahe. Nibii ni atsɔɔ mi lɛ eko ji bɔ ni agbeɔ gbɔmɔ. Afii enumɔ sɛɛ lɛ, mikpa asraafoi anitsumɔ lɛ, ni miyakase bɔ ni gbɔmɔ jwɛŋmɔ lɛ tsuɔ nii ehãa kɛ nɔ hewɔ ni efeɔ enii yɛ gbɛ ko nɔ, koni manyɛ mikɛ nitsumɔhe (Federal Bureau of Investigation) ni taoɔ juu kɛ fɔ̃ saji amli lɛ ayatsu nii. Mije nikasemɔ lɛ shishi yɛ yunivɛsiti ko ni yɔɔ United States lɛ, ni be mifã kɛtee Canada lɛ, miyatsa nɔ yɛ jɛmɛ.

 Be ni miyaa yunivɛsiti lɛ, mɛi anifeemɔi je minijiaŋ wui waa. Miyɔse akɛ mɛi fóɔ amɛ pɛ amɛnɔ mli be fɛɛ be, etamɔ nɔ ni nɔ ko kpakpa ko kwraa bɛ je nɛɛ mli, ni tsabaa ko kwraa bɛ kɛhã naagbai ni adesai kɛkpeɔ lɛ. Kulɛ misusuɔ akɛ adesai baanyɛ ahã je nɛŋ shihilɛ ahi kwraa fe bɔ ni eyɔɔ lɛ, shi mina akɛ enyɛŋ eba lɛ nakai.

 Akɛni mihiɛnɔkamɔ fɛɛ batã hewɔ lɛ, mibɔi dãa tɔɔ, ni wii, kokeŋ kɛ amɛhenɔi, shika sɛɛ tiumɔ, kɛ bɔlɛnamɔ bafee nibii ni mikɛshɛjeɔ mimii. Nibii ni mijwɛŋɔ he nɔŋŋ ji, paati ni maya kɛ yoo ni mikɛ lɛ baaná bɔlɛ. Tsɔsemɔ ni miná yɛ asraafoi anitsumɔ lɛ mli lɛ hã daa nɛɛ mikɛ mɛi miinɔ. Ni akɛni midamɔɔ misusumɔ nɔ mikpɛɔ yiŋ yɛ nɔ ni ja kɛ nɔ ni ejaaa he lɛ hewɔ lɛ, kɛ́ minu he akɛ mɔ ko sane ejaaa lɛ, mihãaa eye ehe. Asomoaŋ mibatsɔ nyɔŋ diɛŋtsɛ mihã yiwalɛ nifeemɔ.

 Gbi ko be ni mikɛ minaanyo ko eshɛre wii, ni wɔmiito eko he gbɛjianɔ ni wɔyahɔ̃ɔ lɛ, ebi mi kɛji miheɔ Nyɔŋmɔ nɔ miyeɔ. Mikɛɛ lɛ akɛ, “Kɛji Nyɔŋmɔ ji mɔ ni hãa mɛi naa nɔ yɛ je lɛ mli lɛ, no lɛ misumɔŋ male lɛ!” Enɔ jetsɛremɔ, ni ji klɛŋklɛŋ gbi ni mije minitsumɔ hee lɛ shishi lɛ, minaanyo nitsulɔ ko ni eji Yehowa Odasefonyo lɛ bi mi akɛ, “Ani osusuɔ akɛ Nyɔŋmɔ ji mɔ ni hãa wɔnaa nɔ yɛ je lɛ mli?” Akɛni miwie sane nɛɛ he etsɛko tsɔ hewɔ lɛ, minaa kpɛ mihe waa akɛ ebi mi nakai sane; hewɔ mikpɛ miyiŋ akɛ makase Nyɔŋmɔ he nii. Wɔkase nibii babaoo yɛ nyɔji ekpaa ni nyiɛ sɛɛ lɛ mli, ni ejɛ Biblia lɛ mli ehã sanebimɔi ni gbaa minaa waa yɛ shihilɛ mli lɛ ekomɛi ahetoo.

 Mijɔle ni no mli lɛ mikɛyɔɔ shĩa lɛ ekpɛlɛɛɛ ni migbaa lɛ nibii ni mikaseɔ lɛ he sane. Hɔgbaa ko lɛ, mikɛɛ lɛ akɛ mifɔ̃ Odasefoi lɛ nine koni amɛba wɔshĩa lɛ ni amɛkɛ wɔ abakase Biblia lɛ. Enɔ jetsɛremɔ be ni mijɛ nitsumɔ kɛba shĩa lɛ, miyɔse akɛ eto nibii fɛɛ ni yɔɔ shĩa lɛ kɛtee. Mije kpo kɛtee agbo lɛ naa ni miyafó. Misɔle mikpa Nyɔŋmɔ fai hu koni eye ebua mi. Be nɛɛ ji gbi klɛŋklɛŋ ni mikɛ Nyɔŋmɔ gbɛ́i, Yehowa lɛ, tsu nii yɛ sɔlemɔ mli.​—Lala 83:18.

 Gbii enyɔ sɛɛ lɛ, Odasefonyo ko kɛ eŋa ba miŋɔɔ ni amɛkɛ mi bakase Biblia lɛ klɛŋklɛŋ kwraa. Be ni amɛshi lɛ, mitee nɔ mikane wolo ni amɛkɛ mi bakase lɛ, ni ji, Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ; mikane migbe naa nakai gbi lɛ gbɛkɛ. a Nibii ni mikase yɛ Yehowa Nyɔŋmɔ kɛ e-Bi Yesu Kristo he lɛ ta mitsuiŋ waa diɛŋtsɛ. Miyɔse akɛ Yehowa musuŋ tsɔɔ lɛ, ni kɛ́ ena akɛ wɔmiipiŋ lɛ edɔɔ lɛ waa. (Yesaia 63:9) Nɔ ni ná minɔ hewalɛ titri ji suɔmɔ ni Nyɔŋmɔ yɔɔ kɛhã mi lɛ, kɛ afɔle ni ebi lɛ shã yɛ mihewɔ lɛ. (1 Yohane 4:10) Mimu sane naa akɛ Yehowa to etsui shi ehã mi “ejaakɛ esumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui.” (2 Petro 3:9) Minu he akɛ no mli lɛ, Yehowa miitao matsɔ enaanyo.​—Yohane 6:44.

 Nakai otsi lɛ nɔŋŋ lɛ mibɔi asafoŋ kpeei yaa. No mli lɛ, miyitsɔi etsa ni ekɛlɛ, miwoɔ toiaŋnii, ni mihiɛ wo mɛi ahe gbeyei waa, shi Odasefoi lɛ kɛ mi ye tamɔ amɛwekunyo ko ni amɛna lɛ etsɛ waa. Bɔ ni amɛfee amɛnii amɛhã lɛ tsɔɔ akɛ anɔkwa Kristofoi ji amɛ. Minu he tamɔ nɔ ni miku misɛɛ kɛba minii kɛ minaa ŋɔɔ ekoŋŋ, shi amrɔ nɛɛ toiŋjɔlɛ kɛ miishɛɛ lɛ po fa fe tsutsu lɛ.

 Etsɛɛɛ tsɔ ni nibii ni mikaseɔ yɛ Biblia lɛ mli lɛ bɔi mi tsakemɔ. Miku miyitsɔi lɛ, mikpa bɔlɛnamɔ jeŋba sha srɔtoi lɛ fɛɛ, mikpa dãa tɔɔ, kɛ wii shɛremɔ kɛ ehenɔi lɛ hu. (1 Korintobii 6:9, 10; 11:14) Miitao masa Yehowa hiɛ. No hewɔ lɛ, kɛ́ miná mile akɛ Yehowa sumɔɔɔ nɔ ko ni mifeɔ lɛ, mitaooo nɔ ko kɛjieee minaa. Moŋ lɛ, edɔɔ mi waa akɛ mifee nɔ ko nakai. Mikɛɔ mihe akɛ, ‘mifeee nakai dɔŋŋ.’ Oya nɔŋŋ lɛ, mikpaa nakai nii lɛ feemɔ ni mitsakeɔ misusumɔ. No hewɔ lɛ, etsɛɛɛ ni miyɔse akɛ kɛ́ mifee nɔ ni Yehowa taoɔ mi mafee lɛ, mishihilɛ hiɔ jogbaŋŋ. Yɛ July 29, 1989, ni ji be ni akɛ mi je Biblia mli nikasemɔ lɛ shishi lɛ sɛɛ nyɔji ekpaa lɛ, abaptisi mi ni mibatsɔ Yehowa Odasefonyo.

 Biblia lɛ eye ebua mi ni mitsake misu gbonyo lɛ. Be ko ni eho lɛ, kɛ́ mɔ ko batsɔ minaa lɛ, mikɛ lɛ nɔɔ. Shi amrɔ nɛɛ, mibɔɔ mɔdɛŋ akɛ mahã ‘toiŋjɔlɛ ahi mi kɛ mɛi fɛɛ ateŋ.’ (Romabii 12:18) Miŋɔɔɔ enɛ he yijiemɔ lɛ mihãaa mihe, moŋ lɛ miida Yehowa shi akɛ etsɔ hewalɛ ni e-Wiemɔ lɛ yɔɔ lɛ kɛ emumɔ krɔŋkrɔŋ lɛ nɔ eye ebua mi ni mitsake.​—Galatiabii 5:22, 23; Hebribii 4:12.

 Nɔ najiaŋ ni matsɔ nyɔŋ mahã wii, kokeŋ kɛ ehenɔi, yiwalɛ nifeemɔi, kɛ jeŋba sha lɛ, mibɔɔ mɔdɛŋ akɛ mafee nibii ni baasa Yehowa Nyɔŋmɔ hiɛ, ni mikɛ mitsui fɛɛ asɔmɔ lɛ. Mɔdɛŋ ni mibɔɔ lɛ eko ji, ni maye mabua mɛi koni amɛbale lɛ. Be ni abaptisi mi lɛ, afii fioo komɛi asɛɛ lɛ, mifã gbɛ kɛtee maŋ kroko nɔ miyashiɛ yɛ he ni shiɛlɔi ahe miihia waa yɛ. Yɛ afii ni eho lɛ amli lɛ, minyɛ mishiɛ mihã mɛi babaoo, ni mina bɔ ni Biblia lɛ eye ebua amɛ ni amɛ hu amɛnyɛ amɛtsake amɛshihilɛ. Eŋɔɔ minaa waa hu akɛ, tsakemɔi kpakpai ni mifee yɛ mishihilɛ mli ni mimami na lɛ hu fata he ni ebatsɔ Yehowa Odasefonyo.

 Migbe skul ni amrɔ nɛɛ atsɛɔ lɛ Skul Kɛhã Maŋtsɛyeli Sane Kpakpa Jajelɔi lɛ naa afi 1999 yɛ El Salvador. Skul lɛ tsɔse mi, ni eye ebua mi koni manyɛ manyiɛ hiɛ yɛ shiɛmɔ nitsumɔ lɛ mli, matsɔɔ nii yɛ asafo lɛ mli, ni masara asafoŋbii. Nakai afi lɛ naagbee gbɛ lɛ, mikɛ yoo ni misumɔɔ lɛ waa ni atsɛɔ lɛ Eugenia lɛ, bote gbalashihilɛ mli. Bianɛ lɛ, wɔkɛ wɔbe fɛɛ miishiɛ sanekpakpa lɛ yɛ Guatemala.

 Amrɔ nɛɛ, mihãaa nibii ni yaa nɔ yɛ shihilɛ mli lɛ aje minijiaŋ wui, miyɛ miishɛɛ waa. Biblia tsɔɔmɔi ni mihiɔ shi yɛ naa lɛ ehã miye mihe kɛje bɔlɛnamɔ jeŋba sha kɛ yiwalɛ nifeemɔi ahe, ni miná anɔkwa suɔmɔ kɛ toiŋjɔlɛ yɛ shihilɛ mli.