Afɔ mi yɛ Ciudad Obregón ni yɔɔ Mexico wuoyigbɛ lɛ, afɔ wɔyi nɛɛhu ni mi ji enumɔ nɔ. Wɔhi maŋtiase lɛ klotia, ni mipapa fee ŋmɔ bibioo ko yɛ jɛmɛ. Jɛmɛ shihilɛ ŋɔɔ waa, ni miishɛɛ kɛ ekomefeemɔ yɛ wɔweku lɛ mli. Awerɛho sane ji akɛ, be ni miye afii enumɔ lɛ, kɔɔyɔɔ wulu ko tswa ni efite wɔ ŋmɔ lɛ, ni ehe bahia ni wɔfã kɛshi wɔmaŋ lɛ mli.

 Mipapa baná shika fioo. Shi nakai beiaŋ nɔŋŋ lɛ, ebatsɔ dãatɔlɔ. Enɛ sa egbalashihilɛ lɛ, kɛ wɔ ni ji ebii lɛ ahe waa. Mikɛ minyɛmimɛi hii lɛ juɔ wɔpapa sigaretii ni wɔshɛreɔ. Be ni miye afii ekpaa pɛ lɛ, mibɔi dãatɔɔ. No sɛɛ etsɛɛɛ lɛ, béi ba mifɔlɔi ateŋ ni amɛmli gbála ni mijeŋba gbonyo lɛ mli wo wu.

 Mimami kɛ nuu kroko yahi shi ni ehã wɔhi eŋɔɔ. Ehãaa wɔmami shika ni shika ni wɔmami náa lɛ hu shɛɛɛ wɔ. No hewɔ lɛ, mikɛ minyɛmimɛi lɛ tsu nitsumɔ fɛɛ nitsumɔ ni wɔbaaná, shi fɛɛ sɛɛ lɛ, shika ni wɔnáa lɛ shɛɛɛ wɔ. Mipɔlish mɛi atokotai ahe, mihɔɔ nibii tamɔ blodo, adafitswaa woji, chewing gum, kɛ nibii krokomɛi. Miyanyiɛ shikatsɛmɛi abɔɔlai anɔ ni miitao niyenii.

 Be ni miye afii nyɔŋma lɛ, nuu ko kɛɛ mibafata ehe koni wɔtsu nii yɛ he ko ni atsiɔ jwɛi ashwieɔ. Mikpɛlɛ nɔ, mikpa skulyaa, ni mishi shĩa. Nyɔmɔ ni ewoɔ mi gbi kome lɛ shɛɛɛ dɔla kome ni ehãa mi niyenii ni eloɔ yɛ bɔɔla lɛ nɔ lɛ eko. Mikɛ nibii ni miloo yɛ bɔɔla lɛ nɔ lɛ fee tsũ ni mihi mli. Mɛi ni mikɛshãra lɛ kɛ wiemɔ sha tsu nii ni amɛkɛ amɛhe wo bɔlɛnamɔ jeŋba sha hu mli. Amɛteŋ mɛi pii tɔɔ dãa ni amɛkɛ tsofai tsuɔ nii yɛ gbɛ ni esaaa nɔ. Eji be ko ni minaaa nibii mlɛo kwraa yɛ shihilɛ mli, mifoɔ daa gbɛkɛ ni gbeyei mɔɔ mi. Akɛni mibɛ shika ni miskulyaa faaa hu hewɔ lɛ, mishihilɛ fee mi hiɛgbele. Mihi bɔɔla lɛ nɔ aaafee afii etɛ kɛyashi mifã kɛtee Mexico maŋ kroko nɔ. Be ni mitee jɛmɛ lɛ, miyatsu nii yɛ ŋmɔ ko mli ni mihalaa fɔfɔi kɛ odonti, mifolɔ shɛ̃, ni mifamɔ atomoi hu.

 Afii ejwɛ sɛɛ lɛ, mifã kɛtee Ciudad Obregón ekoŋŋ. Mipapa nyɛmiyoo onukpa ko ni ji tsofatsɛ lɛ hã mibahi eshĩa lɛ mli. Mibabɔi lamɔi gbohii lamɔ ni mihao aahu akɛ minu he akɛ migbe mihe. Gbɛkɛ ko lɛ, misɔle mikɛɛ Nyɔŋmɔ akɛ: “Nuŋtsɔ, kɛ́ oyɛ lɛ hã male bo, ni masɔmɔ bo kɛya naanɔ. Kɛ́ anɔkwa jamɔ ko yɛ lɛ, hã male.”

 Be fɛɛ be lɛ, mishweɔ akɛ male nibii babaoo ni kɔɔ Nyɔŋmɔ he. Eyɛ mli akɛ no mli lɛ midako moŋ, shi mitee sɔlemɔi srɔtoi, shi mináaa eko eko he miishɛɛ. Amɛteŋ eko eko ewieee Biblia lɛ he tsɔ ni amɛyeee amɛbuaaa mi ni male Nyɔŋmɔ tamɔ bɔ ni mishweɔ lɛ. Sɔlemɔi lɛ ekomɛi kɛ amɛjwɛŋmɔ maa shika nɔ tsɔ, ni sɔlemɔbii lɛ ekomɛi kɛ amɛhe woɔ bɔlɛnamɔ jeŋba sha mli.

 Be ni miye afii 19 lɛ, minyɛmimɛi yei lɛ ateŋ mɔ kome wu kɛɛ mi akɛ Yehowa Odasefoi tsɔɔ lɛ nɔ ni Biblia lɛ kɛɔ yɛ okadii ni akɛtsuɔ nii yɛ jamɔ mli lɛ he. Ekane 2 Mose 20:4, 5 lɛ etsɔɔ mi. Jɛmɛ hãa wɔleɔ akɛ, esaaa akɛ wɔfeɔ amagai. Kuku 5 lɛ kaneɔ akɛ: “Kaakoto amɛ, ni kaahã alaka bo ni osɔmɔ amɛ hu, ejaakɛ mi, Yehowa, o-Nyɔŋmɔ lɛ, miji Nyɔŋmɔ ni biɔ ni ajá mikome too pɛ.” No sɛɛ lɛ, ebi mi akɛ, “Kɛ́ Nyɔŋmɔ tsɔɔ okadii loo amagai anɔ efeɔ naakpɛɛ nibii, loo eesumɔ ni wɔkɛ okadii loo amagai atsu nii yɛ jamɔ mli lɛ, mɛni hewɔ ekɛɛ wɔkajá amɛ lɛ mɔ?” Sanebimɔ nɛɛ hã misusu nii ahe kɛtee shɔŋŋ. No sɛɛ lɛ, wɔgba Biblia mli saji krokomɛi. Minya nakai sanegbaa lɛ he aahu akɛ be ni wɔkɛwie he lɛ ho oya yɛ mihiɛ.

 Sɛɛ mli lɛ, ekɛ mi tee kpee ni Yehowa Odasefoi feɔ lɛ. Nibii ni mina kɛ nibii ni minu yɛ jɛmɛ lɛ hã minaa kpɛ mihe waa. Oblahii kɛ oblayei po kɛ amɛhe wo nifeemɔ lɛ mli, ni amɛteŋ mɛi komɛi fee kpee lɛ shishi nifeemɔi lɛ eko! Mishwie miyiŋ akɛ, ‘Mɛɛ tsɔsemɔ po mɛi anine shɛɔ nɔ yɛ biɛ nɛkɛ!’ Yɛ bɔ ni miyiteŋ kɛ mihiɛ fɛɛ etsa lɛ fɛɛ sɛɛ lɛ, Odasefoi lɛ here mi hiɛmɛɛ. Ni akpa kpee lɛ, weku ko po hã mifata amɛhe kɛyaye gbɛkɛ niyenii!

 Biblia lɛ ni Odasefoi lɛ kɛ mi kase lɛ hã mina akɛ Yehowa Nyɔŋmɔ ji Tsɛ ni sumɔɔ wɔ ni susuɔ wɔhe ekɔɔɔ he eko shika ni wɔyɔɔ, maŋ nɔ ni wɔjɛ, loo he ni wɔtee skul kɛshɛ. Eji anɔkwale akɛ ekwɛɛɛ mɛi ahiɛiaŋ. (Bɔfoi 10:34, 35) Naagbee mli aahu lɛ, mina akɛ mile Nyɔŋmɔ tamɔ bɔ ni mishwe lɛ. Mimii shɛ mihe, ni minuuu he dɔŋŋ akɛ nɔ ko ni he yɔɔ sɛɛnamɔ waa he miihia mi.

 Mishihilɛ bɔi tsakemɔ fiofio! Mikpa sigareti shɛremɔ, mikpa dãatɔɔ, ni mikɛ wiemɔi sha kpa nitsumɔ. Minyɛ miye mimli ni fuɔ mramra kɛjɛ migbekɛbiiashi tɔ̃ɔ lɛ nɔ fiofio, ni mikpa lamɔi fɔji lɛ hu lamɔ. Agbɛnɛ hu, akɛni mikɛ naagbai kpe yɛ migbekɛbiiashi ni miskulyaa hu shɛɛɛ shɔŋŋ hewɔ lɛ, minu he akɛ mihe bɛ sɛɛnamɔ, shi Biblia lɛ ni mikase lɛ ye ebua mi ni miye susumɔ nɛɛ nɔ.

 Miŋa ni mikɛyɔɔ lɛ nɔ bɛ kwraa, esumɔɔ Yehowa ni eyeɔ ebuaa mi waa. Amrɔ nɛɛ, nɔkwɛlɔ gbɛfalɔ ji mi yɛ Yehowa Odasefoi asafo lɛ mli, misaraa asafoi lɛ, miwoɔ amɛ hewalɛ, ni mitsɔɔ minyɛmimɛi hii kɛ yei lɛ Yehowa he nii. Miida Nyɔŋmɔ shi yɛ e-Wiemɔ lɛ ni tsaa mɔ kɛ tsɔsemɔ ni nɔ bɛ ni ekɛhãa wɔ lɛ hewɔ, amrɔ nɛɛ mishihilɛ efeee mi hiɛgbele dɔŋŋ.