Afɔ mi yɛ La Ceiba, yɛ Honduras, afɔ wɔyi enumɔ ni miji naagbee mɔ kɛ nuu kome yɛ amɛteŋ. Mi pɛ ji mumui yɛ weku lɛ mli. Awuiyeli fa yɛ akutso mli ni wɔhi lɛ mli waa, ni ohiafoi ji wɔ hu. Be ni miye aaafee afii ejwɛ lɛ, mipapa ná oshara yɛ nitsumɔhe ni egbo, ni no hã nibii amli bawa waa kɛhã wɔ.

 Mimami bɔ mɔdɛŋ efee nɔ ni ebaanyɛ kɛkwɛ mi kɛ minyɛmimɛi lɛ. Shi bei pii lɛ, enaaa shika ni fa bɔ ni sa ni ekɛbaahe atade ehã mi. Kɛ́ nugbɔ nɛ lɛ fɛ̃i yeɔ mi ejaakɛ mibɛ atade ni awoɔ kɛgbeɔ fɛ̃i.

 Be ni midaa lɛ, mikase Honduras Mumuii Awiemɔ (LESHO) lɛ, ni no ye ebua mi ni minyɛ mikɛ mumuii krokomɛi gba sane. Shi mimami kɛ minyɛmimɛi lɛ nuuu LESHO, no hewɔ lɛ, amɛsɔ̃ amɛ diɛŋtsɛ amɛmumui awiemɔ koni amɛnyɛ amɛkɛ mi agba sane. Kɛ̃lɛ mimami sumɔɔ misane ni ebu mihe kɛje nibii ni baanyɛ aye mi awui lɛ ahe. Etsɔ mumuii awiemɔ fioo ni ele lɛ nɔ ebɔ mi kɔkɔ yɛ sigaret loo wii shɛremɔ kɛ dãatɔɔ he. Eŋɔɔ minaa waa akɛ mikɛ nibii nɛɛ eko tsuuu nii yɛ mishihilɛ mli kɛbashi ŋmɛnɛ.

 Be ni miji gbekɛ lɛ, mimami kɛ mi yaa Catholic Sɔlemɔ lɛ, shi minuuu nibii ni atsɔɔ yɛ jɛmɛ lɛ eko eko shishi, ejaakɛ mɔ ko etsɔɔɔ shishi kɛyaaa mumuii awiemɔ lɛ mli kɛhãaa mi. Agbɛnɛ hu, be ni miye afii nyɔŋma lɛ shihilɛ je mitsine, no hewɔ lɛ, mikpa sɔlemɔ lɛ yaa. Kɛ̃lɛ, mishwe lolo ni male Nyɔŋmɔ he saji babaoo.

 Yɛ afi 1999 be ni miye afii 23 lɛ, mikɛ yoo ko ni jɛ United States ni yaa evangelical sɔlemɔ ko lɛ kpe. Etsɔɔ mi Biblia mli saji, ni eye ebua mi ni mikase America Mumuii Awiemɔ lɛ (ASL). Minya Biblia mli saji ni etsɔɔ mi lɛ ahe aahu akɛ mikpɛ miyiŋ akɛ matsɔ osɔfo. No hewɔ lɛ mifã kɛtee Puerto Rico koni manyɛ maya Kristofoi askul ni afeɔ ahãa mumuii lɛ eko. Afi 2002 be ni miku misɛɛ kɛba La Ceiba lɛ minanemɛi lɛ ye amɛbua mi ni mitse mumuii asɔlemɔ. Sɛɛ mli lɛ, mikɛ minanemɛi nɛɛ ateŋ mɔ kome ni atsɛɔ lɛ Patricia lɛ bote gbalashihilɛ mli.

 Akɛ osɔfo lɛ, mishiɛ yɛ LESHO mumuii awiemɔ lɛ mli, mikɛ Biblia mli saji ahe mfonirii tsɔɔ amɛ, ni mifee ekomɛi tamɔ dramai mihã amɛ koni amɛnu shishi. Agbɛnɛ hu, miyasara mumuii yɛ maji ni bɛŋkɛ wɔ lɛ amli koni mawo amɛ hewalɛ ni maye mabua amɛ kɛtsu amɛnaagbai lɛ ahe nii. Mitee United States kɛ Zambia po miyashiɛ. Shi yɛ anɔkwale mli lɛ, mileee Biblia lɛ mli tsɔ. Mikɛɔ amɛ nibii ni atsɔɔ mi lɛ kɛ bɔ ni mi diɛŋtsɛ minuɔ mfonirii lɛ ashishi mihãa lɛ pɛ. Yɛ anɔkwale mli lɛ, miyɛ sanebimɔi babaoo.

 Gbi ko lɛ, misɔlemɔbii lɛ ekomɛi bɔi mihe malemɔ kɛ mɛi hãmɔ. Amɛkɛɛ dãatɔlɔ ji mi ni miyeee mihefatalɔ lɛ anɔkwa. Egba minaa waa ni mimli fu. No sɛɛ etsɛɛɛ lɛ, mi kɛ Patricia fɛɛ kpa sɔlemɔ lɛ yaa.

 Yehowa Odasefoi ba mi kɛ Patricia ŋɔɔ shii abɔ, shi wɔhãaa amɛ hiɛ. Kɛ̃lɛ, be ni wɔkpa sɔlemɔ lɛ yaa lɛ, Patricia kpɛlɛ ni Odasefonyo ko ni atsɛɔ lɛ Liccy lɛ kɛ ewu Thomas kɛ lɛ bɔi Biblia lɛ kasemɔ. Mihiɛ sɔ amɛ waa, ejaakɛ eyɛ mli akɛ jeee mumuii ji amɛ moŋ, shi amɛle mumuii awiemɔ. No hewɔ lɛ, etsɛɛɛ ni miyafata Patricia he koni akɛwɔ fɛɛ akase Biblia lɛ.

 Amɛkɛ vidioi ni afee yɛ ASL mli tsu nii kɛtsɔɔ wɔ nii. Shi be ni wɔnanemɛi lɛ ekomɛi wie akɛ gbɔmɛi ji Yehowa Odasefoi lɛ ahiɛnyiɛlɔi lɛ, wɔhã amɛkɛ wɔ kpa Biblia lɛ kasemɔ. Eyɛ mli akɛ Thomas hã mina odaseyeli ni tsɔɔ akɛ jeee gbɔmɛi ji Yehowa Odasefoi lɛ ahiɛnyiɛlɔi moŋ, shi miheee lɛ miyeee.

 Nyɔji fioo komɛi asɛɛ be ni Patricia hao waa lɛ, esɔle ehã Nyɔŋmɔ koni ehã Yehowa Odasefoi aba eŋɔɔ ekoŋŋ. No sɛɛ etsɛɛɛ lɛ, wɔkutsoŋnyo ko ni ji Yehowa Odasefonyo lɛ basara Patricia ni ekɛɛ lɛ akɛ ebaakɛɛ Liccy ni ebasara lɛ. Liccy tsɔɔ akɛ eji naanyo kpakpa lɛɛlɛŋ. Ebasaraa Patricia daa otsi ni ewoɔ lɛ hewalɛ, ni ekɛ lɛ kaseɔ Biblia lɛ. Loloolo lɛ, miheee Odasefoi lɛ miyeee.

 Yɛ afi 2012 lɛ, Yehowa Odasefoi fã ta krɛdɛɛ ko ni amɛjara vidio ni ji Ani Obaasumɔ Ni Ole Anɔkwale Lɛ? yɛ LESHO mli. Liccy bahã wɔ vidio lɛ eko. Be ni mikwɛ lɛ minaa kpɛ mihe waa, ejaakɛ miyɔse akɛ tsɔɔmɔi babaoo ni be ko ni eho lɛ mitsɔɔ mɛi, tamɔ hɛl la kɛ susuma ni gbooo tsɔɔmɔ lɛ bɛ Biblia lɛ mli.

 Enɔ otsi lɛ, mitee Yehowa Odasefoi a-Maŋtsɛyeli Asa lɛ nɔ mikɛ Thomas yawie. Mikɛɛ lɛ akɛ miitao matsɔɔ mumui lɛ Biblia mli anɔkwalei lɛ, shi jeee akɛ matsɔ Yehowa Odasefonyo. Miyiŋtoo ji ni matse sɔlemɔ hee mahã mumuii lɛ. Thomas jie miyi yɛ ekãa ni miná lɛ hewɔ, ni ekɛmi kane Efesobii 4:5 lɛ. Ŋmalɛ nɛɛ maa nɔ hewɔ ni esa akɛ ekomefeemɔ ahi Kristofoi asafo lɛ mli lɛ nɔ mi.

 Thomas hã mi vidio ni ji Jehovah’s Witnesses​—Faith in Action, Part 1: Out of Darkness lɛ yɛ ASL mli. Vidio nɛɛ tsɔɔ bɔ ni hii komɛi fee ekome kɛpɛi Biblia lɛ mli jogbaŋŋ koni amɛnu Biblia mli shishijee tsɔɔmɔi lɛ ashishi. Be ni mikwɛɔ vidio lɛ, mina bɔ ni amɛnu he amɛhã lɛ. Mina akɛ amɛ hu amɛmiitao anɔkwale lɛ tamɔ mi nɔŋŋ. Vidio lɛ hã miná nɔmimaa akɛ Odasefoi lɛ ni tsɔɔ anɔkwale lɛ, ejaakɛ amɛkɛ amɛhemɔkɛyeli lɛ damɔɔ Biblia lɛ nɔ. No hewɔ lɛ, mihã amɛkɛ mi bɔi Biblia lɛ kasemɔ ekoŋŋ, ni yɛ afi 2014 lɛ, abaptisi mi kɛ Patricia fɛɛ akɛ Yehowa Odasefoi.

 Misumɔɔ Yehowa Odasefoi asafo lɛ waa ejaakɛ ehe tse tamɔ bɔ ni Nyɔŋmɔ he tse lɛ nɔŋŋ. Amɛwiemɔ he tse ni amɛkɛ mɛi yeɔ jogbaŋŋ. Amɛhe jɔ ni amɛyeɔ amɛbuaa amɛhe. Ekomefeemɔ yɛ amɛteŋ ni srɔto bɛ Biblia mli anɔkwalei ni amɛshiɛɔ lɛ mli, ekɔɔɔ he eko maŋ nɔ ni amɛyɔɔ loo wiemɔ ni amɛwieɔ.

 Minya nibii ni mikase yɛ Biblia lɛ mli lɛ ahe waa. Akɛ nɔkwɛmɔnɔ lɛ, mikase akɛ Yehowa ji Nyɔŋmɔ Ofe lɛ, ni ji shikpɔŋ lɛ fɛɛ Nɔyelɔ lɛ. Esumɔɔ mumuii kɛ mɛi ni jeee mumuii fɛɛ. Mihiɛ sɔɔ suɔmɔ ni Nyɔŋmɔ yɔɔ kɛhã mi lɛ waa. Mikase hu akɛ shikpɔŋ lɛ baatsɔ paradeiso fɛfɛo, ni wɔbaaná gbɔmɔtsoŋ hewalɛ kpakpa ni wɔhi shi kɛya naanɔ. Miikwɛ be ni nibii nɛɛ baaba mli lɛ gbɛ waa!

 Eŋɔɔ mi kɛ Patricia fɛɛ naa akɛ wɔmiishiɛ Biblia mli anɔkwalei lɛ wɔmiihã mumuii krokomɛi. Amrɔ nɛɛ wɔkɛ mɛi ni yɔɔ wɔtsutsu sɔlemɔ lɛ mli lɛ ekomɛi kaseɔ Biblia lɛ. Amrɔ nɛɛ mibɛ sanebimɔi yɛ nibii ni mitsɔɔ mɛi lɛ ahe dɔŋŋ, tamɔ eji be ni miji osɔfo lɛ. Bianɛ, Biblia lɛ ni Yehowa Odasefoi kɛ mi kase lɛ eye ebua mi ni miná misanebimɔi lɛ ahetoo.