“Mileee wiemɔi ni mikɛbaatsɔɔ miishɛɛ ni miná yɛ sɔɔmɔ ni miyasɔmɔ yɛ he ni hiamɔ lɛ da yɛ lɛ mli!” Nakai ji bɔ ni Joshua ni yɔɔ United States ni yasɔmɔ be ko yɛ Guyana lɛ nu he ehã. Yehowa Odasefoi krokomɛi hu ni eyasɔmɔ yɛ Amerika Wuoyi maŋ nɛɛ mli lɛ kɛɔ akɛ amɛná miishɛɛ waa; mɛi boɔ Biblia mli sane lɛ toi waa yɛ jɛmɛ. a Mɛni obaanyɛ okase yɛ mɛi ni yasɔmɔ yɛ he ni hiamɔ lɛ da yɛ nɛɛ adɛŋ? Mɛɛ gbɛ nɔ nibii ni obaanyɛ okase yɛ mli nɛɛ baaye abua bo ni bo hu oyasɔmɔ yɛ maŋsɛɛ kɛ́ oosumɔ ni ofee nakai?

 Dani nyɛminuu ko ni atsɛɔ lɛ Linel lɛ baaya Guyana lɛ, no mli lɛ eyashiɛɔ yɛ shikpɔŋkuku ko ni afɔɔɔ shiɛmɔ yɛ jɛmɛ yɛ emaŋ ni ji United States lɛ mli. Ewie akɛ: “Atsu wɔyi 20 kɛtee West Virginia akrowa ko. Shiɛmɔ nitsumɔ lɛ kɛ mɛi ni mikɛshãra yɛ jɛmɛ otsii enyɔ lɛ hã mimii shɛ mihe, ni mishihilɛ hu tsake kwraa! Ehã mitswa mifai shi akɛ mikɛ minyɛmɔ fɛɛ baasɔmɔ Yehowa fe tsutsu lɛ.”

 Garth kɛ Erica, ni ji wu kɛ ŋa lɛ susu bɔ ni amɛbaafee amɛyasɔmɔ yɛ maŋsɛɛ lɛ he waa, no hewɔ lɛ amɛhala akɛ amɛbaaya Guyana. Mɛni hewɔ amɛkpɛ amɛyiŋ nakai? Erica kɛɛ akɛ: “Mikɛ miwu le nyɛmi nuu ko kɛ eŋa ni efã kɛtee jɛmɛ. Ekãa kɛ suɔmɔ ni amɛkɛtsuɔ nitsumɔ nɛɛ ji nɔ ni wo wɔ hewalɛ ni wɔ hu wɔtee jɛmɛ lɛ.” Erica kɛ Garth kɛ miishɛɛ tsu nitsumɔ ni amɛsumɔɔ waa nɛɛ afii etɛ sɔŋŋ.” Garth kɛɛ akɛ: “Wɔsa maŋsɛɛ sɔɔmɔ nitsumɔ lɛ naa wɔkwɛ, ni wɔna akɛ ehi.” Ekɛ eŋa lɛ tee Gilead Skul lɛ eko, ni amrɔ nɛɛ amɛmiisɔmɔ yɛ Bolivia.

 Kɛ́ wɔkɛ Biblia mli shishitoo mlai tsu nii lɛ, ehãa wɔshihilɛ feɔ mlɛo. (Hebribii 13:5) Awoɔ wɔ hewalɛ koni wɔsusu nii ahe jogbaŋŋ dani wɔkpɛ yiŋ ko ni he hiaa waa. (Luka 14:26-33) Yiŋ ni wɔkpɛɔ akɛ wɔbaayashiɛ yɛ maŋsɛɛ lɛ hu fata he! Garth ŋma akɛ: “Dani wɔbaashi kɛya Guyana lɛ, ehe bahia ni wɔhã wɔshihilɛ afee mlɛo. Enɛ bi ni wɔhɔɔ wɔnitsumɔ lɛ, wɔshĩa lɛ, kɛ wɔnibii krokomɛi fɛɛ ni yɔɔ wɔshĩa lɛ ni he ehiaaa wɔ tsɔ lɛ. Enɛ hé wɔ afii fioo. Nakai beiaŋ nɔŋŋ lɛ, wɔhã suɔmɔ ni wɔyɔɔ akɛ wɔbaayasɔmɔ yɛ Guyana lɛ hi wɔjwɛŋmɔŋ be fɛɛ be, ni daa afi lɛ wɔyaa jɛmɛ.”

 Nɔ kroko ni ebi ni wɔsusu he ji, shika. Mɛi komɛi ni miisɔmɔ yɛ maji ni shiɛlɔi ahe ehia waa yɛ jɛmɛ lɛ nyɛɔ amɛtsuɔ nii yɛ jɛmɛ kɛkwɛɔ amɛhe kɛji maŋ mla ŋmɛɔ amɛ gbɛ nakai. Mɛi komɛi hu tsɔɔ intanɛt lɛ nɔ amɛtsuɔ nitsumɔ ni amɛtsuɔ yɛ amɛmaŋ lɛ mli lɛ nɔŋŋ. Mɛi komɛi hu halaa akɛ amɛbaaya amɛmaŋ be kɛ beiaŋ koni amɛyatsu nii yɛ jɛmɛ. Be ni wu ko kɛ eŋa ni atsɛɔ amɛ Paul kɛ Sinead lɛ sɔmɔɔ yɛ maŋsɛɛ lɛ, amɛyaa Ireland shi kome daa afi amɛyatsuɔ nii yɛ jɛmɛ. Enɛ ye ebua amɛ ni amɛnyɛ amɛkɛ miishɛɛ sɔmɔ afii 18 sɔŋŋ yɛ Guyana, ni be ni amɛfɔ amɛbiyoo lɛ po lɛ amɛkɛ lɛ hi jɛmɛ kɛyashi eye afii kpawo.

 Lala 37:5 lɛ kɛɛ akɛ: “Okɛ gbɛ ni onyiɛ nɔ lɛ afɔ̃ Yehowa hiɛ; okɛ ohiɛ afɔ̃ enɔ, ni ebaatsu nibii ahe nii ehã bo.” Christopher kɛ Lorissa ni jɛ United States lɛ sɔle waa yɛ oti ni amɛkɛma amɛhiɛ akɛ amɛbaayasɔmɔ yɛ maŋsɛɛ lɛ he. Agbɛnɛ hu kɛ́ amɛmiifee weku jamɔ lɛ, amɛsusuɔ bɔ ni amɛbaafee koni amɛnyɛ amɛyashɛ jɛmɛ lɛ he, ni amɛŋmalaa sɛɛnamɔi ni baajɛ mli kɛba kɛ nibii hu ni baanyɛ aŋmɛɛ amɛ lɛ amɛshwieɔ shi. Akɛni amɛmiitao amɛyasɔmɔ yɛ he ko ni amɛnuɔ jɛmɛ wiemɔ hewɔ lɛ, amɛhala Guyana, ejaakɛ Blɔfo ji wiemɔ titri ni awieɔ yɛ jɛmɛ.

 No sɛɛ lɛ, amɛkɛ shishitoo mla ni yɔɔ Abɛi 15:22 lɛ tsu nii, ekɛɔ akɛ: “Kɛ́ ajinatoo bɛ lɛ, yiŋtoi feɔ efolo, Shi kɛ́ ŋaawolɔi pii yɛ lɛ, nibii yaa nɔ jogbaŋŋ.” Amɛŋma wolo kɛmaje nitsumɔhe nine ni yɔɔ Guyana lɛ, b ni amɛtsɔɔ akɛ amɛmiisumɔ ni amɛkɛ amɛhe ahã kɛsɔmɔ, ni amɛtsɔɔ nitsumɔi ni amɛbaanyɛ amɛtsu. Nakai beiaŋ nɔŋŋ lɛ, amɛbi ni atsɔɔ amɛ helatsamɔ gbɛjianɔtoi, kɔɔyɔŋ tsakemɔ, kɛ kusumii ni yɔɔ jɛmɛ. Nitsumɔhe nine lɛ hã amɛsanebimɔi lɛ ahetoo, ni akɛ onukpai akuu ni yɔɔ he ni amɛbaayasɔmɔ yɛ lɛ atɛlifoŋ nɔmba kɛ adrɛs hã amɛ.

 Linel, ni wɔtsĩ etã kɛtsɔ hiɛ lɛ miisɔmɔ amrɔ nɛɛ akɛ kpokpaa nɔkwɛlɔ yɛ Guyana. Dani ebaashi kɛya jɛmɛ lɛ, ekɛ shishitoo mla ni yɔɔ Abɛi 15:22 lɛ tsu nii. Ewie akɛ, “Yɛ shika ni mikɛto kɛhã gbɛfãa lɛ sɛɛ lɛ, mikɛ mɛi ni eyasɔmɔ yɛ maŋsɛɛ dã lɛ hu gba sane. Mikɛ miweku lɛ, misafoŋ onukpai lɛ, kɛ wɔkpokpaa nɔkwɛlɔ lɛ gba he sane. Ni mikane sane fɛɛ sane ni minaa yɛ wɔwoji amli ni kɔɔ sɔɔmɔ yɛ he ni hiamɔ lɛ da yɛ lɛ he lɛ.”

 Mɛi ni miisumɔ akɛ amɛyasɔmɔ yɛ maŋsɛɛ lɛ ateŋ mɛi babaoo sumɔɔ akɛ amɛyasara jɛmɛ dani be ni amɛbaaya lɛ ashɛ, ni enɛ hi waa. Wu kɛ ŋa ko ni atsɛɔ amɛ Joseph kɛ Christina lɛ wie akɛ: “Be klɛŋklɛŋ ni wɔtee Guyana lɛ, wɔye nyɔji etɛ yɛ jɛmɛ. Be nɛɛ fa bɔ ni wɔbaanyɛ wɔle bɔ ni nibii baaya lɛ ahã yɛ jɛmɛ. No sɛɛ lɛ, wɔku wɔsɛɛ kɛtee shĩa ni wɔyato gbɛjianɔ ni wɔfã kɛtee.”

 Dani mɛi ni yasɔmɔɔ yɛ hei ni hiamɔ lɛ da yɛ lɛ baanyɛ asɔmɔ Nyɔŋmɔ jogbaŋŋ lɛ, ebiɔ ni amɛná hekɛafɔleshãa mumɔ, ni amɛnyɛ amɛtsake amɛhe amɛwo shihilɛi ni yɔɔ jɛmɛ lɛ amli. Akɛ nɔkwɛmɔ nɔ lɛ, bei pii lɛ mɛi ni fãa kɛjɛɔ hei ni snoo nɛɔ waa yɛ kɛyaa hei ni hulu tsoɔ waa yɛ lɛ, yɔseɔ akɛ filikilɔi srɔtoi pii yɛ he ni amɛyaahi lɛ. Joshua ni wɔtsĩ etã kɛtsɔ hiɛ lɛ wie akɛ: “He ni mijɛ lɛ filikilɔi babaoo bɛ jɛmɛ nɛkɛ. Ni etamɔ nɔ ni filikilɔi ni yɔɔ Guyana lɛ dara waa! Shi be ni be shwie mli lɛ, minaaa amɛ nɔ ko dɔŋŋ. Mikpa shi mina hu akɛ kɛ́ mihã mishĩa lɛ fee falefale lɛ, filikilɔi nɛɛ babaoo baaa jɛmɛ. No ji, esa akɛ masha tsɛnsii amli, matsi jwɛi mashwie, ni mafɔ shĩa lɛ saamɔ.”

 Kɛ́ obaatsake ohe owo shihilɛ ni yɔɔ maŋ kroko nɔ lɛ mli lɛ, ekolɛ ebaabi ni okase bɔ ni ahoɔ jɛmɛ niyenii ahãa kɛ bɔ ni ayeɔ lɛ hu. Joshua wie akɛ “Mikɛ nyɛmi ni mikɛyɔɔ lɛ kɛɛ nyɛmimɛi ni yɔɔ jɛmɛ lɛ koni amɛtsɔɔ wɔ bɔ ni ahoɔ jɛmɛ niyenii lɛ ahãa. Kɛ́ wɔhoo niyenii lɛ bɔ ni amɛtsɔɔ wɔ lɛ, wɔfɔ̃ɔ asafoŋbii lɛ ekomɛi nine koni amɛkɛ wɔ abaye. Enɛ ye ebua wɔ ni wɔnyɛ wɔle amɛ jogbaŋŋ ni wɔkɛ amɛ bɔ naanyo.”

 Yɛ jɛmɛ kusumii agbɛfaŋ lɛ, Paul kɛ Kathleen wie akɛ: “Ehe bahia ni wɔkase nibii ni kɛ́ afee lɛ etsɔɔ akɛ wɔmiijie bulɛ kpo, kɛ atadei ni sa ni esa akɛ wɔwo yɛ jɛmɛ, enɛ bafee nɔ ko hee kwraa kɛhã wɔ. No hewɔ lɛ, ehe bahia ni wɔba wɔhe shi ni wɔfee tsakemɔi, ni nakai beiaŋ nɔŋŋ lɛ, wɔkuuu wɔhiɛ wɔshwieee Biblia mli shishitoo mla ko nɔ. Tsakemɔi nɛɛ ye ebua wɔ ni wɔnyɛ wɔkɛ wɔnyɛmimɛi lɛ bɔ jogbaŋŋ, ni ehã mɛi ni yɔɔ shikpɔŋkuku lɛ mli lɛ hu bo sane ni wɔshiɛɔ lɛ toi.”

 Bɔ ni Joseph kɛ Christina nu he amɛhã lɛ, nakai mɛi babaoo ni yasɔmɔɔ yɛ hei ni hiamɔ lɛ da yɛ lɛ hu nuɔ he, amɛkɛɛ akɛ: “Emli jɔɔmɔi lɛ fa kwraa fe naagbai ni wɔkɛkpe lɛ. Eye ebua wɔ ni wɔfee tsakemɔi yɛ nibii ni wɔkɛyeɔ klɛŋklɛŋ gbɛhe lɛ amli. Nibii ni kulɛ wɔbuɔ amɛ akɛ amɛhe hiaa waa lɛ, batsɔmɔ nibii ni he ehiaaa wɔ tsɔ. Niiashikpamɔi ni wɔná lɛ eko fɛɛ eko wo wɔ hewalɛ koni wɔya nɔ wɔkɛ wɔnyɛmɔ fɛɛ asɔmɔ Yehowa. Ehã wɔmii shɛ nii ni wɔyɔɔ lɛ ahe waa.”

 Erica, ni wɔwie ehe kɛtsɔ hiɛ lɛ wie akɛ: “Akɛɔ akɛ, wɔkɛ wɔhiɛ afɔ̃ Yehowa nɔ, shi sɔɔmɔ ni mi kɛ miwu yasɔmɔ yɛ he ni hiamɔ lɛ da yɛ lɛ, hã wɔnu nakai sane lɛ shishi jogbaŋŋ. Wɔna akɛ eye ebua wɔ waa bɔ ni wɔnako eko dã. Ni be ni wɔgbaa wɔhe niiashikpamɔi ni wɔnáa lɛ, ehãa wɔbɛŋkɛɔ wɔhe kpaakpa akɛ wu kɛ ŋa.”