Virginia, ni eji Yehowa Odasefonyo lɛ miiye hela ko ni Blɔfo tsɛɔ lɛ locked-in syndrome. Enyɛɛɛ etsi ehe. Enyɛɔ enaa nii, enuɔ nii, ni egbeleɔ ehiŋmɛi, ni etsiɔ eyitso fiofio. Shi enyɛɛɛ ewie loo eye nii. Be ko ni eho lɛ, eyɛ hewalɛ waa ni enyɛɔ efeɔ nɔ fɛɛ nɔ ehãa ehe. Gbi ko leebi yɛ afi 1997 mli lɛ, enu he akɛ eyitso sɛɛ miiwa ehe ni ekpaaa. Ewu kɛ lɛ tee helatsamɔhe ni nakai gbɛkɛ lɛ etee koma, no ji nɔ nyɔ enɔ kwraa. Otsii enyɔ sɛɛ lɛ, ehiɛ tsɛ̃ yɛ he ni akwɛɔ mɛi ni hela mli wa waa yɛ, ni Blɔfo tsɛɔ lɛ intensive-care unit lɛ, no mli lɛ ekumɔ ni akɛ ɔsijin ema enɔ. Gbii fioo komɛi ho ni ekaiii nɔ ko nɔ ko, ni ekaiii mɔ ni eji hu.

Virginia tsɔɔ nɔ ni tee nɔ yɛ no sɛɛ. Ewie akɛ: “Fiofio lɛ, mibɔi nibii kaimɔ. Misɔle waa. Misumɔɔɔ ni magbo mashi mibi nuu fioo lɛ koni ekatsɔ mɔ ko ni bɛ mami. Bɔ ni afee ni maná ekãa babaoo kɛdamɔ mishihilɛ nɛɛ naa lɛ, mibɔ mɔdɛŋ mikai Biblia ŋmalɛi abɔ ni manyɛ.

 “Naagbee mli aahu lɛ, ajie mi kɛje he ni akwɛɔ mɛi ni hela mli wa waa yɛ lɛ. Miye nyɔji ekpaa yɛ helatsamɔhei srɔtoi kɛ he ko hu ni akwɛɔ mɛi ni ená gbɔmɔtsoŋ naagba yɛ, ni no sɛɛ lɛ, akɛ mi tee shĩa. No mli fɛɛ lɛ, mikumɔ lolo, ni ehe bahia ni afee nɔ fɛɛ nɔ kwraa ahã mi. Minijiaŋ je wui waa! Minu he akɛ mihe bɛ sɛɛnamɔ kɛhã mɛi krokomɛi kɛ Yehowa hu. Mibi nuu fioo lɛ hu sane baye mitsui waa, ejaakɛ minyɛɛɛ makwɛ lɛ.

 “Mibɔi Yehowa Odasefoi komɛi ni miiye hela ni tamɔ minɔ lɛ aniiashikpamɔ kanemɔ, ni nibii ni miyɔse akɛ amɛnyɛɔ amɛfeɔ amɛhãa Yehowa lɛ hã minaa kpɛ mihe waa. Enɛ hã miná jwɛŋmɔ ni ja yɛ mishihilɛ lɛ he, mifee enɛ kɛtsɔ nibii ni manyɛ mafee ni mikɛ mijwɛŋmɔ ma nɔ lɛ anɔ. Dani hela lɛ mɔ mi lɛ, no mli lɛ, mináaa be tsɔ kɛhã nibii tamɔ nikasemɔ, shiɛmɔ kɛ sɔlemɔ. Agbɛnɛ, mibaná gbi muu lɛ fɛɛ kɛhã mihe be fɛɛ be. No hewɔ lɛ, nɔ najiaŋ ni minijiaŋ baaje wui lɛ, mikɛ mijwɛŋmɔ ma sɔɔmɔ ni mikɛhãa Yehowa lɛ nɔ.

 “Mikase bɔ ni akɛ kɔmpiuta tsuɔ nii. Mikɛ kɔmpiuta sɔftwɛɛ ko ni kɛ́ mitsi miyitso lɛ, enyɛɔ enaa lɛ bɔi taipimɔ. Mináaa lɛ mlɛo kwraa, shi bɔ ni afee lɛ ahã lɛ hewɔ lɛ minyɛɔ mikaseɔ Biblia lɛ ni mishiɛɔ mihiɛnɔkamɔ lɛ mitsɔɔ mɛi krokomɛi kɛtsɔ lɛtaŋmaa kɛ e-mail nɔ. Bɔ ni afee ni manyɛ mikɛ mɛi ni baa mimasɛi lɛ agba sane lɛ, miyɛ bɔd ko ni aprinti alfabɛtai lɛ yɛ nɔ. Mɔ ni yɔɔ mimasɛi lɛ kɛ enine tsɔɔ alfabɛtai lɛ eko. Kɛ́ nɔ ni etsɔɔ lɛ jeee no ni lɛ, migbeleɔ mihiŋmɛi waa, kɛ́ ekɛ enine tsɔɔ nɔ ni ja lɛ, miŋaa mihiŋmɛi. Wɔfeɔ nakai aahu kɛyashi wɔnáa wiemɔ kulibii loo sane muu. Nyɛmimɛi yei lɛ ekomɛi ni bayeɔ be babaoo yɛ mimasɛi lɛ bale nɔ ni mitaoɔ mawie lɛ po dani mitsɔɔ migbeɔ naa. Bei komɛi lɛ, kɛ́ amɛka akɛ amɛbaatsɔɔ nɔ ni mitaoɔ matsɔɔ lɛ, ni amɛtɔ̃ lɛ, wɔkɛfeɔ ŋmɔlɔ.

 “Misumɔɔ ni mikɛ mihe awo asafo lɛ nifeemɔi amli. Mitsɔɔ vidiokɔnfrɛnsin nɔ mikɔnɛtiɔ kɛhã asafoŋ kpee. Mitaipiɔ hetoo ni mahã lɛ, kɛkɛ lɛ kɛ́ aafee kpee lɛ fã ko ni ji sanebimɔ kɛ hetoo lɛ, mɔ ko ekane ehã mi. Agbɛnɛ hu, kɛ́ shiɛmɔyaa kuu lɛ to gbɛjianɔ ni akwɛ daa nyɔɔŋ nɔ JW Broadcasting nifeemɔ lɛ, mikɔnɛtiɔ ni mikɛ amɛkwɛɔ. a

 “Miye nɛkɛ kuumɔ hela nɛɛ afii 23 sɔŋŋ nɛ. Bei komɛi lɛ, miwerɛ hoɔ mihe waa. Shi kɛtsɔ sɔlemɔ, nyɛmimɛi ni mikɛshãraa, kɛ mihe ni mikɛwoɔ Yehowa sɔɔmɔ mli jogbaŋŋ lɛ nɔ lɛ, minyɛɔ miyeɔ nɛkɛ shihilɛ ni hãa miwerɛ hoɔ mihe nɛɛ nɔ. Anɔkwa, yelikɛbuamɔ ni nyɛmimɛi ni yɔɔ asafo lɛ mli lɛ kɛhãa mi lɛ hewɔ lɛ, minyɛ misɔmɔ akɛ gbɛgbalɔi awalɔ afii ekpaa kɛ sɛɛ sɔŋŋ nɛ. Mibɔ mɔdɛŋ mifee nɔkwɛmɔnɔ kpakpa mihã mibi nuu, Alessandro. Amrɔ nɛɛ ebote gbalashihilɛ mli ni eesɔmɔ akɛ asafoŋ onukpa. Ekɛ eŋa fɛɛ misɔmɔ akɛ daa gbɛgbalɔi.

 “Mifɔɔ nibii ni masumɔ ni mafee wɔsɛɛ yɛ paradeiso lɛ mli lɛ anɔ jwɛŋmɔ. Klɛŋklɛŋ nɔ ni masumɔ mafee ji, ni mikɛ mi diɛŋtsɛ migbee awie Yehowa he. Masumɔ mayashara shi kɛnyiɛ faa ko ni miiho yɛ koo ko mli toi koni mikɛkwɛ bɔ ni jɛmɛ yɔɔ fɛo hã. Akɛni afii 20 sɔŋŋ nɛ lɛ, akɛ niyenii tsɔɔ rɔba mli kɛwoɔ mimli lɛ hewɔ lɛ, miikpa gbi ni matse apol ni makɔmɔ lɛ gbɛ waa. Akɛni Italynyo ji mi hewɔ lɛ, miikpa be ni mi diɛŋtsɛ mafee Italy niyenii srɔtoi, ni piza fata he lɛ eko maye lɛ gbɛ waa!

 “Yiwalaheremɔ lɛ he hiɛnɔkamɔ lɛ eye ebua kɛbu mijwɛŋmɔ he. (1 Tesalonikabii 5:8) Yɛ mikumɔ hela nɛɛ fɛɛ sɛɛ lɛ, kɛ́ mifee he mfoniri akɛ miyɛ jeŋ hee lɛ mli lɛ, mimii shɛɔ mihe waa, ejaakɛ miyɛ hekɛnɔfɔ̃ɔ akɛ etsɛŋ ebaaba. Hɛɛ, miikpa be ni maná wala diɛŋtsɛ ni Yehowa ewo he shi kɛtsɔ e-Maŋtsɛyeli lɛ nɔ lɛ gbɛ waa.”​—1 Timoteo 6:19; Mateo 6:9, 10.