Té Wén 9

Lema nde hio wantom be So a doung ne dedea fet

Ha wén ge lema nde o doung ne dedea fet a zang mo fet e nde? (1)

Doungo ne dedea fet ne war be so ngoy mo to nde ge? (2)

doungo ne dedea fet ngoy mo to nde ge kpasi ne war nde? (3) ne war takaramo? (4) ne war mour te? (5)

Hio ngdanga wolamo ka o lema kafa ne wange? (6)

1. Jéhovah ne So ka doung ne dedea fet ne ka bo ne ngdanga mo ndang na. Wène ngoy nde hio wantom bèa fine a doung ne dedea fet ne war wen be so​—⁠ne war kpasi, ne war takara mo fine ne war mour te. (1 Pierre 1:16) Mo doung ne dedea fet a li So ana gasa ngaya. O doung a zang ma nzan ka de na. Lema fine nde o de ngaya mo pén zou sila o ka pousi o mo de ngdanga mo. Ma lema nde o ngdé war a na.

2. Doungo ne dedea fet ne war be so: Ka o ngoy mo de tom be Jéhovah, lem nde o ba fine pata osamo ne hio koto dea mo mo war sombala so dalo ndong na. Lema nde o gbo a zang war sombala so dalo ne o hako fine a wène ndang ne ndang na. (2 aCorinthien 6:​14-18; Apocalypse 18:⁠4) Ka o yamba kpasawen a zou So kari, ngdé li o a zom mo to nde mawi a osiri fine o ne hio osamo dalo na.​—⁠2 Jean 10, 11.

3. Doungo ne dedea fet ne war kpasi: Jéhovah ngoy nde hio wansombili wène a doung soé fet touka hio kpasa Chrétien. (1 Pierre 2:12) Wène a zoka mo fet ka o de, ngasé ne ouso. (aHébreu 4:13) O ngdé hio war dea wanza ne toum fet ne hio deamo toum mo nou ke.​—⁠1 aCorinthien 6:​9-11.

4. Doungo ne dedea fet ne war takaramo: Ka mgbongo o takiri ne hio dede mo, deamo bo fine be doung ne dedea. (aPhilippien 4:⁠8) Ma ka o takiri ne hio ngdanga mo, deamo be o be doung ka fine ne ngdanga. (Matthieu 15:​18-20) Lema nde o kafi hio saka ka lema ngda­ngsa mgbongo o. O lema ngdéa mgbongo o a done ne hi dede takara mo ne war yamba wén So.

5. Doungo ne dedea fet ne war mour te: Ha wén zou enge mbwa ba mgbandi be So lema nde hio Chrétien a mgbongiri te mbwa ne mbwa yol laa ka doung ne saa. Ka è gboa a mbom ne songsi nde e yong mo lema nde e fal ko. Ka me bo ne mo dak salte li a pète me youne na, hio mbola mo ne hio ngdor sari fet lema nde me goun yo. (Deutéronome 23:​12, 13) Mo doung ne dedea ne salté na be hako a me mo to nde me doung ne dede te. Toua be ma Chrétien lema mo doung ne saa kpo a zanga ne zang der a fet. Lema nde hio wi mo zang kartié fet ato dede wén a.

6. Toa wolamo ka doung ne dedea fet: Lema nde hio wantom be So ato ne ­kpasawen kpo. Hio wan to dalo lem le a zang Kongakando be So na. (aÉphésien 4:25; Apocalypse 21:⁠8) Hio Chrétien lem to hio wolamo mgbèsi ka ha foyo na. Mbwa lem ze, ne to hio wolamo zèng ka doung touka dala ne wén yel na. Ha mgbandi tom, ha toua lecole, ha zang kartié, è ingo mbwa touka hio wi ka wolamo nou mbwa doung ne dedea.​—⁠aÉphésien 4:​29, 31; 5:⁠3.

[Foto ha li mbeti 18, 19]

 Lema nde hio wantom be So a doung ne dedea fet a zang mo fet