Jéhovah ana ha hio wi mɔ zang hio kandɔ fɛt mɔ tiki sanga nɛ wɛnɛ nɛ wal sombala mɔ (Psaume 65:2). Mɔ ndang, a ze na nɛ a mɛkiri hio sombala mɔ fɛt na. Tuka gbesi, wal sombala Sɔ pɛ ma wei lɛma gdɔka ha wen dea hio gdangamɔ ha tɛ ko pɛa (1 Pierre 3:7). Ha ngimɔ ka hio bem pɛ Israël dea gdanga mɔ, Sɔ kafa zea sombala mɔ pɛ mbua. Yo nɛ dedea nde sombala Sɔ nɛ tɛ ma gasa mɔ. Mɔ ndang, Sɔ ha zea sombala mɔ pɛ hio wi ka dea gasa sɛmbɔ nɛ mbua sanze sila mbua.​—Tɔli Jacques 4:8; Deamɔ 3:19.

Zɔ vidéo Sɔ ha zea hio sombala mɔ fɛt nde?

Sombala mɔ nɛ ma bhargele gɔa mɔ ka ɔ gɔ nɛ Sɔ. Mɔngɔ yo lɛma nde ɔ sombili ka nɛ Jéhovah ndang wan gbongiri ɔ (Matthieu 4:10; 6:9). Ha zu ɔ nɛ wi ka de sɛmbɔ, yo lɛma nde ɔ sombili mɔ nɛ ling Jésus ha zu a fea gɔn zu sɛmbɔ bɔ (Jean 14:6). Jéhovah ngoy nde ɔ kifiri ha zu sombala mɔ ka ɔ yambi yo nɛ zu na nɛ ɛ ndɔng ka ɛ gɔn yo ha li mbeti a ngoy nde ɔ tɔ nɛ hio wen ka gutɛ ha zang sila ɔ.​—Tɔli Matthieu 6:7; Filipe 4:6, 7.

Jéhovah lɛma mɔ ze hio sombala mɔ bɔ ka ɔ tɔ ha zang sila ɔ (1 Samuel 1:12, 13). A ana ɔ mɔ sombili wɛnɛ ha ngimɔ fɛt, nɛ sutele nɛ mbolo, ha ngimɔ yɔnga mɔ fin ha ngimɔ ka ɔ ha zang ngaya mɔ.​—Tɔli 1 Jean 5:14; Matthieu 15:36.

Mɔ tɛ sanga nɛ Sɔ yo bɔ nɛ bebe mɔ na ha zu ɔ ha soko hio wi ka bɔ ha mɛkara Sɔ na, nɛ mbua zɔk gɔna nu pɛa ka gɔna mɔ tɛ nɛ gaa mo ha zu nu mɛ ze nde wen mbhɛsi (2 Timothée 3:1, 4; 2 Pierre 3:3, 13). Yo ka, ɔ nɛ bezoin mɔ wesiri  tɛ ndang nɛ hio ya ɔ Chrétien mɔtɔ nde ɔ kpa ngaya.​—Tɔli Hebro 10:24, 25.

Ɔ lɛma tɛa sanga nɛ Sɔ ka dea gdidan nɛ hio wi ka ngoya wɛnɛ. Wesara may pɛ hio Témoin pɛ Jéhovah be ha kɔ ha wi mɔ dung nɛ mɛkara mɔ ka ngaya tuka bɛ hio dan wa.​—Tɔli Rome 1:11, 12.

Ba zu ha zu hio mɔ ka mɛ yamba yo ha zang Bible, be ha kɔ ha mɛ mɔ tɛ sanga nɛ Jéhovah. Ba zu mɛ ha zu hio mɔ ka dea. Hio mbɔla pɛa tɛ ku nɛ hio gɔna nu pɛa. Ka mɛ baa zu mɛ ha zu ngoy pɛ Sɔ nɛ ingɔ mɔ pɛa nɛ sombala yo be pusi mɛ mɔ zɔk yo nɛ zioa pentɛ.​—Tɔli Gbasamɔ 1:3; Psaume 1:1-3.

Mɛ lɛma tɛa sanga nɛ Sɔ ha ngimɔ ka mɛ kuo sila mɛ fɛt ha wɛnɛ mɔtɔ nde ka mɛ mɛkara wɛnɛ. Mɛkaramɔ dung mɛ zende ma te ka ana mɔ a li ha yo mɔtɔ nde a kpɔtɛ. Lɛma nde mɛ baa zu mɛ soe fɛt ha zu hio mɔ ka mɛ ha yamba gding mɛkaramɔ pɛ mɛ a kpɔtɛ.​—Tɔli Matthieu 4:4; Hebro 11:1, 6.

Jéhovah ha zɔa wal pɛ hio wi ka ngoya wɛnɛ. Wɛnɛ a pama mbua nɛ gnɛa nɛ hio mɔ fɛt ka lɛma gdansa mɛkaramɔ bɔ mɔtɔ nde mbua eli bosi gdea tazu pɛ mbua mɔ tunɔ mɔ kpo nɛ kpo (Psaume 91:1, 2, 7-10). A daa zala ɔ sungiri nɛ hio mɔ ka ngoy mɔ gdangsi dede dungɔ nu bɔ fin nɛ tɔrtɛ bɔ. Jéhovah osa ɔ dede wal dungɔ nu ka yo dung nɛ dedea pen olo mɔ fɛt.​—Tɔli Psaume 73:27, 28; Jacques 4:4, 8.