Sé wi. Bib-la ka ba nou yonn-dé détay ki pé asiré nou di lèkzistans Bondié. I ka ankourajé nou fè lafwa-nou vini pli fò, pa pas nou ka kwè tou sa rilijion ka di, men pas nou ka sèvi tout « rézon-nou » épi tout « entélijans-nou » (Women 12:1 ; 1 Jan 5:20, nòt). Mi dé-zou-twa vérité ki apiyé asou Labib :

• Lèkzistans linivè, koté ki ni lòd épi la ki ni lavi, ka sipozé lèkzistans an Kréyatè. Labib ka di : « Chak kay ou wè sé an moun ki konstwi’y, men li yonn ki konstwi tout bagay sé Bondié » (Ébré 3:4). Menm si manniè wè tala senp, anpil gran-grèk ka touvé sa fò menm *.

• Lé-zòm ka nèt épi lanvi konprann sans épi bi lavi-a. Lanvi-tala sé kon an laswèf ki pa ka fini, menm lè kò-a ja trapé lakontantman. Bib-la ka mété limiè anlè lidé-tala lè’y ka palé di « bizwen èspiritièl », adan’y ou ka konprann, lanvi konnèt épi adoré Bondié (Matié 5:3 ; Révélasion [oben Apocalips] 4:11). Kidonk, sé bizwen-tala sé prèv ki Bondié ka èkzisté. Men, yo ka fè nou wè tou, i sé an Kréyatè plen lanmou, ki lé nou pa mantjé ayen èspiritièlman (Matié 4:4).

• Adan Bib-la ou ka touvé pwofési ki klè toubannman, ki té matjé dépi sièk tan, yo tout réyalizé menm manniè-a yo té matjé. Lèkzaktitid épi wotè détay sé pwofési-a ka lésé sipozé ki yo sòti di an fòs ki pli wo ki nou (2 Piè 1:21).

• Sé matjè Bib-la té ni dé konésans lasians, ki té pli wo ki ta moun lépòk-yo. Kontèl, antan lontan, anpil moun té ka kwè ki latè té pozé asou an zannimo (an léfan, an kochon sovaj, an bèf, èts.). Labib li menm ka di, ki Bondié ka « pann latè anlè ayen » (Jòb 26:7). Menm manniè, Bib-la ka bien èsplitjé kouman latè fèt, lè’y ka palé di an « boul » (Izayi 40:22). Ki manniè zòt pé èsplitjé ki sé matjè Labib-la té ja pli douvan anlè tan-yo ? Pou anlo moun, sa pli lojik di pansé anfinaldikont, ki tou sa yo té konnèt té ka vini di Bondié.

• Labib ka réponn an patjé kèsion difisil — kèsion ki, si yo rété san répons klè, pé mennen an moun pa kwè an Bondié. Pa èkzanp : Si Bondié plen lanmou épi toupuisan, poutji soufwans épi sa ki mové ka èkzisté ? Poutji larilijion ka fè moun souvantman, fè sa ki mal plito ki sa ki bien ? (Tit 1:16).