• Chwézi pa Bondié. « Mwen menm, man mété wa-mwen [...]. Mwen kéy ba’w nasion kon léritaj pou ta’w, èk toupatou asou latè sé ké ta’w » (Sòm 2:6, 8).

• Éritié wa David. « An yich nèt pou nou, yo ba nou an gason [...]. Grandè gouvènman’y épi lapé i kéy pòté pa kay ni finisman, anlè twòn David èk nan wayòm-li. I kéy rété la, solid » (Izayi 9:6, 7).

• Wè jou Bètléyèm. ‘O Bètléyèm, sé kay-ou menm kay sòti moun-lan ki kéy chèf. Grandè’y kay rivé jik an bout latè’ (Miché 5:2, 4).

• Rijété pa lézonm épi tjwé. « Yo té ka bay mépri é i pa té ayen ba nou. [...] Yo pèsé’y, li, pou mal nou fè, yo krazé’y, li, pou péché nou péché » (Izayi 53:3, 5).

• Résisité èk gloriyé. « Ou pa kay kité mwen nan Tonb-lan. Ou pa kay lé sewvitè’w fidèl rété nan tou-a. [...] Adwèt-ou, i ni lakontantman pou tout tan » (Sòm 16:10, 11).

Adan tout sé nonm-lan ki ja ègzisté, an sèl moun ka korèsponn a sa pli bon Dirijan-an pou yé, moun-tala, sé Jézikri. An vré, an zanj di Mari, manman Jézi : « Bondié kay bay twòn ansèt-li David [...], é wayòm-li pa kéy ni finisman » (Lik 1:31-33).

Toupandan i té ka viv asou latè, Jézi pa janmen travay kon dirijan. Kon i Wa wayòm Bondié, sé dépi sièl-la i kay dirijé lézonm. Kisa ka fè di’y pli bon Dirijan-an ? Gadé sa i fè lè i té asou latè.

•   I fè moun di bien. Jézi té ka endé nonm kon fanm, timanmay kon gran moun, kisiswa lorijin-yo oben grad-yo (Matié 9:36 ; Mak 10:16). Lè an lépré, mété jounou atè, èk di’y : « Si ou lé, ou pé djéri mwen », sa brennen tjè Jézi épi i djéri nonm-tala (Mak 1:40-42).

• I ansénié ki manniè fè Bondié plézi. Jézi di : « Zòt pé pa travay kon èsklav ba Bondié épi pou Lajan. » I di nou osi aji épi lézòt menm mannié nou té kay enmen yo aji épi nou. Sé an prensip yo té kay kriyé « la Règle d’or ». I montré Bondié pa ka sèlman entérésé kòy a sa nou ka fè, men osi sa nou ka pansé épi risanti. Kifè, pou fè Bondié plézi, fòk nou ni métriz anlè santiman ki an fondòk tjè-nou (Matié 5:28 ; 6:24 ; 7:12). Anplis di sa, i montré aklè, pou touvé vré bonè-a, fòk apwann ki manniè Bondié lé nou aji, èk aji menm manniè-a (Lik 11:28).

• I ansénié sa enmen lé di. Sa Jézi té ka di èk sa i té ka fè, té ka rété an lèspri sé moun-lan épi sa té ka touché tjè-yo. « Foul moun-lan té ka rété ababa douvan manniè ansénié’y, pas i té ka ansénié kon an moun ki ni lotorité pou sa » (Matié 7:28, 29). « Enmen lènmi-zòt », sé koumandman-an i ba. I jik prédié ba détwa moun pami sa ki pran pa adan lanmò’y : « Papa, padonnen yo, pas yo pa sav sa yo ka fè » (Matié 5:44 ; Lik 23:34).

Jézi ni tout sé kalité-a ki fo pou vini an mapipi adan manniè dirijé monn-lan, an dirijan ka pran plézi endé lézòt épi ki bon anpil. Men ki tan i ka koumansé renn-li ?