Sa pou fè pou viv adan nouvo monn-lan
Sé prèmié awtik-la montré ki Bondié kèy fè disparèt tout pwoblèm limanité lè i kèy détwi monn méchan-tala. Nou pé asiré sa kèy rivé. Poutji ? Pas Pawòl Bondié, Labib, ka di :
« Monn-tala ka mò piti a piti » (1 JAN 2:17).
Men nou sèten tou, sé pa tout moun ki kéy mò, pas vèsé-tala ka di nou apré :
« Moun-lan ki ka fè volonté Bondié kay viv pou toujou. »
Kidonk, moun-lan ki lé viv pou toujou, pou fè volonté Bondié. Pou konnèt volonté Bondié, dabò fo nou konnèt Bondié li menm.
POU KONTINIÉ VIV : « APRANN KONNÈT BONDIÉ »
Jézi di : « Lavi étèrnèl lé di : aprann konnèt ou, wou, sèl vré Bondié-a » (Jan 17:3). Pou kontinié viv lè monn-tala kèy disparèt épi osi viv pou toujou, fòk nou ‘aprann konnèt’ Bondié. Sé pa sèlman sav i ka ègzisté ouben konnèt yonn-dé bagay anlè’y. Anplis di sa, fòk vini zanmi épi’y. É kon pou tout lanmitié nou lé ki diré épi rété fò, lanmitié-nou épi Bondié ka mandé tan. Annou wè yonn-dé vérité fondal-natal adan Bib-la, ki kay endé nou ni an lanmitié solid épi Bondié.
LI PAWÒL BONDIÉ-A, LABIB, TOULÉJOU
Pou chapé alafen monn-tala, priyé Bondié pou i endé’w fè sa i lé.
Pou kontinié viv, nou ka manjé touléjou. Men Jézi di konsa : « Sé pa pen sèlman an nonm bizwen pou viv, men i bizwen tout pawòl ka sòti an bouch Jéova » (Matié 4:4).
Jòdi-a, fòk ou ouvè Bib-la pou Bondié palé ba’w. Si ou étidié liv sen-tala, ou kay aprann vérité ki enpòwtan an rapò épi sa Bondié ja fè, sa Bondié ka fè épi sa i kèy fè ba lézòm.
PRÉDIÉ BONDIÉ POU I ENDÉ’W
Si ou lé fè sa Bondié ka mandé, men ou pa ka rivé ladjé bagay i pa enmen, kisa ou pé fè ? Si ou adan ka-tala, aprann konnèt Bondié sé sa ki pé endé’w !
An fanm ki té ka mennen an vié lavi, étidié Bib-la. Épi i dékouvè Bondié té ka mandé : « Pran kouri douvan tout péché sèksièl » (1 Korentjen 6:18). Alò, i priyé Bondié pou i ba’y lafòs. Sé konsa i réyisi viré do ba sa i té ka fè ki mové. Men, i ka kontinié goumen kont tantasion. I ka di :« Lè man ni pansé ki pa pwòp, man ka palé franchman ba Jéova adan lapriyè-mwen, pas man sav ki tousèl, man pé ké rivé genyen konba-tala. A fòs prédié Jéova man vini pli pré’y. » Kon madanm-tala, milion moun ka aprann konnèt Bondié. É Bondié ka ba yo lafòs yo ni bizwen, pou fè sa ki nésésè, pou viv an manniè ka fè’y plézi (Filipien 4:13).
Plis ou kay aprann konnèt Bondié, sé plis Bondié li menm kèy ‘konnèt ou’ é sé plis ou kèy vini bon zanmi épi’y (Galat 4:9 ; Sòm 25:14). É sé sèlman konsa, ou kèy chapé alafen monn-tala, pou rantré adan nouvo monn Bondié-a. Men, nouvo monn-tala, kisa i kèy sanm ? Lòt awtik-la ka èsplitjé sa.
a Jéova, sé non Bondié adan Bib-la.