LISON 6
Ki lespwa ki ni ba moun mò ?
1. Kiles bon nouvel ki ni pou moun mò ?
Jézi té ni an kanmarad, Laza, ki té ka rété Bétani, pa bò Jérizalem. An jou, kanmarad li-a mò. Jézi rivé Bétani kat jou apwé. I alé douvan tonbo-a épi Mawt ek Mari, sé sè Laza-a. La menm, anlo moun sanblé. Épi mim ! Jézi résisité Laza. Pa ti kontan Mawt épi Mari té kontan ! — Li Jan 11:21-24, 38-44.
Mawt té ja konnet bon nouvel-la asou sé moun mò-a. I té sav Jéova té kay résisité sé moun mò-a pou yo té viré viv asou latè. — Li Jòb 14:14, 15.
2. Kisa ki ni apwé lanmò ?
Bondié di Adan : « Ou sé lapousiè épi ou kay déviré lapousiè » (JENÈZ 3:19).
Nonm fet épi lapousiè (Jenèz 2:7 ; 3:19). Nou sé moun ki fet épi lachè. Nou pa lespri ki ka viv adan kò lachè. Kidonk, pani ayen andidan nou ki ka kontinié viv apwé nou mò. Lè an moun mò, sèvel-li ka mò tou. I pé pa katjilé asou ayen épi i pa ni pies santiman. Moun mò pa sav ayen. Dayè pou yonn, Laza, ki mò épi ki résisité, pa janmen di ayen anlè an lavi apwé lanmò. — Li Éklézyias 9:5, 6, 10.
Es Bondié ka fè moun soufè adan difé lanfè lè yo mò ? Bibla ka di, moun mò pa sav ayen. Lanseyman lanfè-a sé an mansonj ki ka sali Bondié. Selman lidé fè moun soufè adan an difé lanfè ka sivotjé Bondié. — Li Détéwonòm 12:31.
Gadé vidéwo-a An ki léta an moun mò yé ?.
3. Es moun mò pé palé ba nou ?
Moun mò pa ka ni palé ni tann (Sòm 115:17). Men i ni zanj mové ki ka palé ba moun, yo ka fè wol sé sé moun mò-a ki ka palé (2 Piè 2:4). Sé pou sa Jéova ka défann nou éséyé palé ba moun mò. — Li Détéwonòm 18:10, 11.
4. Ki moun ki kay résisité ?
Milion moun ki mò kay viré vini viv anlè latè. Menm moun ki pa té konnet Bondié épi ki fè mové bagay, kay résisité. — Li Lik 23:43 ; Ak 24:15.
Sé moun-an ki kay résisité kay ni lokazion apwann lavérité asou Bondié épi yo kay montré yo ni lafwa an Jézi pou fè sa i ka di (Révélasion 20:11-13). Sé moun-an ki fè bon bagay kay pé viv asou latè pou toujou. — Li Jan 5:28, 29.
5. Kisa larézireksion ka apwann nou asou Jéova ?
Bondié vréyé Gason’y asou latè pou’y mò ba nou. Sé gras a Bondié i ni an lespwa ba moun ki mò. Larézireksion sé an pwev Jéova enmen nou épi i bon épi nou, menm si nou pa mérité sa. Adan sé moun-an ki kay résisité-a, kiles ou sé voudré wè plis ? — Li Jan 3:16 ; Women 6:23.
