Bon nouvel ka vini di Jéova, Bondié bienéré-a, ki lé tout fanmi trapé lakontantman (1 Timoté 1:11). Sé li ki lotè mariaj-la. Fòk an mariaj silon lalwa pou ni lakontantman adan lafanmi : misié épi madanm épi sé ti-manmay-la ka santi kò yo an sékirité. Sé krétjen-an pou ni respé pou lalwa péyi yo asou anrèjistrèman mariaj. — Li Lik 2:1, 4, 5.

Ki manniè Bondié ka wè mariaj-la ? Ba’y, mariaj ka lianné an misié épi an madanm pou lavi. I lé tou lé dé rété fidel yonn a lòt (Ébré 13:4). I rayi ladivos (Malaki 2:16). Men I ka pewmet an krétjen divòsé épi viré mayé si yonn twonpé lòt. — Li Matié 19:3-6, 9.

An nonm épi an fanm, yo tou lé dé ni pa ta yo pou fè adan mariaj-la, konsa yo ka travay kantékant. Sé sa Jéova té lé lè I kréyé yo (Jenèz 2:18). Mari-a ni pa responsabilité’y, pas sé li ki chef adan fanmi’y. I ni pou pwotjiré madanm li épi yich li tou sa yo bizwen. Fodré i palé yo di Bondié épi anséyé yo. Fòk i enmen madanm li épi fòk i toujou paré fè sakrifis ba’y tou. An mari épi madanm li, yo dwétet ni lanmou épi respé yonn ba lòt. Davwè tout mari épi tout madanm ka fè lérè, yo ni pou apwann padonnen. Mi sé sa sigré-a pou ni an bon mariaj. — Li Éfézyien 4:31, 32 ; 5:22-25, 33 ; 1 Piè 3:7.

Si ménaj zòt pa ka roulé bien, zòt tou lé dé dwétet fè tou sa zòt pé pou yonn enmen lòt (1 Korentyien 13:4, 5). Silon  Pawol Bondié, ranjé pwoblem moun ka jwenn adan ménaj yo, sé pa anni kasé mariaj-la. — Li 1 Korentyien 7:10-13.

Jéova lé ou ni lakontantman. I ka ba’w méyè konsey ki ni pou’w pwofité di jénes ou. I lé’w kouté papa’w épi manman’w, pas yo ni plis sajes épi lespérians ki’w (Kolosyien 3:20). I lé’w konnet lajwa lè’w ka fè bagay ba’y, Kréyatè’w, épi ba Gason’y osi. — Li Éklézyias 11:9–12:1 ; Matié 19:13-15 ; 21:15, 16.

Fòk ou travay red pou ba yich ou manjé, pou ni an kay épi rad (1 Timoté 5:8). Men pou yo ni lakontantman, fòk ou apwann yo enmen Bondié épi kité’y anséyé yo osi (Éfézyien 6:4). Si ou menm ka montré adan lavi’w ou enmen Bondié, sa pé détenn asou yo. Si ou pran lapenn élivé ti-manmay ou épi Labib, sa kay fè an travay anlè manniè yo ka katjilé. — Li Détéwonòm 6:4-7 ; Pwovèb 22:6.

Lè ou ka ankourajé sé ti-manmay-la épi ou ka félisité yo, sa ka endé yo. Sé ti manmay-la bizwen yo korijé yo épi yo fòmé yo tou. Lenstriksion tala kay pwotéjé yo : sa pé anpéché yo fè bagay ki kay rann yo maléré (Pwovèb 22:15). Lè ou ka korijé yich ou, pa janmen two red ni mové épi yo. — Li Kolosyien 3:21.

Témwen Jéova ja fè anlo liv pou endé papa, manman épi yich. Tout sé liv tala apiyé asou Labib. — Li Sòm 19:7, 11.