Jézi pa té fet kon lézòt nonm-lan : avan i fet anlè latè, i té ka viv an siel épi sé té an lespri (Jan 8:23). Sé li prèmié Bondié kréyé, épi i endé’y fè tout sé lézòt bagay-la. Sé li yonn Jéova fè li menm tou sel. Sé pousa Labib ka di i sé « sel » Gason’y (Jan 1:14). Yo ka kriyé’y tou, « Lapawol », paskè i té ka pòté Pawol Bondié : Jéova sèvi’y pou fè mésaj li pasé. — Li Pwovèb 8:22, 23, 30 ; Kolosyien 1:15, 16.

Bondié vréyé Gason’y asou latè : I mété lavi’y adan vant an jenn fanm jwif kité viej, yo té ka kriyé Mari. Kidonk, papa Jézi pa té an nonm (Lik 1:30-35). Jézi vini asou latè 1) pou apwann nou lavérité asou Bondié, 2) épi egzanp-li, pou montré nou koumanniè nou pé fè volonté Bondié menm lè nou ni pwoblem épi 3) pou ba lavi’y ki té pawfé « kon an ranson ». — Li Matié 20:28.

An ranson sé an lajan yo ka mandé’w péyé pou ladjé an moun yo ka minasé tjwé (Ègzòd 21:29, 30). Jòdi-jou, nou ka vini vié épi nou ka mò. Men sé pa sa Bondié té lé ba lé-zòm. Ki manniè nou sav sa ? Bondié di Adan prèmié nonm-lan, si’y té dézobéyi i té kay mò. Si Adan pa té dézobéyi, poutoudi si’y pa té péché, i pa té kay janmen mò (Jenèz 2:16, 17 ; 5:5). Labib ka di nou sé fòt Adan si lanmò « vini antré » adan monn-lan. I simen péché-a ba tout désandans-li épi sa ki ka vini dèyè péché-a : lanmò. Sé pou sa nou bizwen  ranson-an pou chapé anba lanmò-a Adan kité ba nou-an. — Li Women 5:12 ; 6:23.

Ki moun ki té pé péyé ranson tala épi tiré nou anba lanmò ? Lè an moun mò, sé pou péché’y selman i ka péyé. Poutoudi, an nonm ki pa pawfé pé pa péyé ba pies péché lézòt fè. — Li Sòm 49:7-9.

Jézi pa té fet kon nou : i té pawfé. I pa janmen péché. Kidonk i pa té bizwen mò pou pwop péché i fè. I mò pou péché lézòt. Bondié té si telman enmen lé-zòm : I vréyé Gason’y asou latè pou i mò ba nou. Jézi montré i té enmen nou tou : i kouté Papa’y épi i ba lavi’y pou péché nou. — Li Jan 3:16 ; Women 5:18, 19.

Gadé vidéwo-a Poutji Jézikri mò ?.

Lè Jézi té asou latè, i djéri moun malad, i viré ba moun mò lavi épi i endé tou sa ki té ni pwoblem. Lè’y fè sa, i montré sa i kay fè dan pa lontan ba tout moun ki ka fè sa Bondié mandé (Matié 15:30, 31 ; Jan 5:28). Apwé lanmò’y, Bondié riba’y lavi épi i viré vini an lespri (1 Piè 3:18). Apwé sa, i atann « adwet Bondié » jik tan Bondié bay pouvwa pou dominé asou tout latè (Ébré 10:12, 13). Jòdi-a, i Wa an siel-la. Tout disip-li ka simen bon nouvel tala anlè tout latè. — Li Dannièl 7:13, 14 ; Matié 24:14.

Talè Jézi kay sèvi pouvwa woyal-li pou tiré ki soufwans ki sé moun-an ki ka pwovotjé’y-la. Tout moun ki ni lafwa épi ki ka fè sa Bondié mandé ké viv adan an paradi asou latè. — Li Sòm 37:9-11.