LISON 13
Kisa ki kay rivé sé rilijion-an ?
1. Es tout rilijion bon ?
I ni moun ki onnet adan tout rilijion. Bon nouvel-la, sé kè Bondié ka wè yo épi ka entérésé kòy a yo. Sa ki maléré, riljion dèyè an patjé vié bagay (2 Korentyien 4:3, 4 ; 11:13-15). Nouvel ka montré sé rilijion-an mélé adan atak téworis, ladjè, épi fè an ras moun disparet toubanman. Bon tibwen chef rilijion ka maltrété ti-manmay épi i ni pédofil (moun ki ka fè vié vis épi ti-manmay). Moun ki ka kwè an Bondié an fon tjè yo ni lapenn lè yo ka tann tou sa ! — Li Matié 24:3-5, 11, 12.
Vré rilijion-an ka gloriyé Bondié, men tout sé lézòt-la ki ka fè bagay ki pa ka fè’y plézi pa bon pies. Yo ka di bagay ki pa matjé adan Bibla, kon manti asou Bondié épi asou lanmò. Men sa Jéova lé, sé tout moun konnet lavérité asou’y. — Li Ézékièl 18:4 ; 1 Timoté 2:3-5.
2. Sa ki kay rivé sé rilijion-an ?
I ni rilijion ki ka di yo enmen Bondié, men ki simié monn Satan-an, yo pa ka badinen Bondié (Jak 4:4). Adan Bibla, yo ka kriyé tout sé fo rilijion-an « Gran Babilòn-an ». Poutji ? Pas apwé délij-la, fo rilijion koumansé adan an vil yo ka kriyé Babilòn. Talè, Bondié kay fè disparet blip toubanman tout sé rilijion-an ki ka badinen moun ek ka fè yo soufè. — Li Révélasion 17:1, 2, 5, 16, 17 ; 18:8.
Jéova pa ka bliyé sé moun-an ki sensè épi ki papiyé adan sé fo rilijion-an toupatou asou latè. Lè I ka anséyé yo lavérité, sa ka lianné yo adan vré rilijion-an. — Li Miché 4:2, 5.
3. Kisa moun onnet pou fè ?
Vré rilijion-an ka lianné lé-zòm.
Moun ki enmen sa ki vré épi sa ki bien sé yo ki ka entérésé Jéova. I ka di yo pati kité rilijion ki pa bon san ped tan. An moun ki enmen Bondié paré pou chanjé lamenm pou fè’y plézi. — Li Révélasion 18:4.
An 1é sièk-la, sé moun onnet-la té kontan toubannman lè yo té ka tann sé apot-la préché bon nouvel la. Parapòt a Jéova, yo chanjé manniè yo té ka viv, yo trapé lakontantman, sa ba yo an bi adan lavi yo épi an lespwa pou divini yo. Yo kité an bon egzanp ba nou : lè yo tann sé bon nouvel tala, yo mété Jéova douvan adan lavi yo. — Li 1 Tésalonisyien 1:8, 9 ; 2:13.
Jéova kontan wè moun ki sòti adan rilijion ki pa bon rantré adan fanmi li, éti i ja ni adoratè’y. Si’w ka asepté bel envitasion’y lan, ou kay genyen lanmitié’y, ou kay touvé kòw adan an fanmi plen lanmou épi ou kay ni lavi étewnel. — Li Mak 10:29, 30 ; 2 Korentyien 6:17, 18.
4. Ki manniè Bondié kay mennen lajwa ba tout moun asou latè ?
Talè, Bondié kay fè rilijion ki pa bon disparet. Sa sé an bon nouvel ! Tout moun asou latè kay soulajé davré pé ké ni lasoufrans ankò. Tout sé mové rilijion-an pé ké, ni badinen, ni séparé lé-zòm pies ankò. Ki an siel ki anlè latè, tout moun-an kay adoré sel vré Bondié ansanm ansanm. — Li Révélasion 18:20, 21 ; 21:3, 4.
