LISON 14
Poutji Bondié ni an lòganizasion ?
1. Poutji Bondié òganizé sé Izrayélit-la ?
Bondié òganizé désandans Abraram kon an nasion épi I ba yo anlo lwa. I kriyé nasion tala « Izrayel ». Yo té ni pou pratitjé épi pwotéjé vré rilijion-an ek pawol Bondié (Sòm 147:19, 20). Mi sé pou sa, moun tout kalté nasion té pé risouvwè bénédision parapòt nasion Izrayel. — Li Jenèz 22:18.
Bondié chwazi sé Izrayélit-la pou yo té vini témwen’y. Listwa yo ka montré, lè ou ka fè sa Bondié ka mandé, ou ka trapé bon bénéfis (Détéwonòm 4:6). Sé yo, sé Izrayélit-la ki fè si moun dòt nasion té pé apwann konnet vré Bondié-a. — Li Ézayi 43:10, 12.
2. Poutji sé vré krétjen-an òganizé ?
Tan kité tan, épi Izrayel ped favè Bondié. Sa ki fet, Jéova mété lasanblé krétjenn-an alaplas nasion tala (Matié 21:43 ; 23:37, 38). Jòdi-jou, sé Izrayélit-la pa témwen’y ankò, men sé sé vré krétjen-an. — Li Ak 15:14, 17.
Jézi òganizé disip li pou yo préché épi pou yo pé fè dòt disip adan tout nasion (Matié 10:7, 11 ; 24:14 ; 28:19, 20). Aprézan nou ka viv lafen monn tala, aktivité prédikasion-an ka alé douvan kon i pa janmen alé. Pou prèmié fwa, Jéova ka lianné milion moun tout nasion adan vré rilijion-an (Révélasion 7:9, 10). Sé vré krétjen-an òganizé pou ankourajé épi endé kò yo yonn a lòt. Toupatou anlè latè adan réyinion yo, yo ka trapé menm pwogram lansèyman Labib-la. — Li Ébré 10:24, 25.
3. Ki manniè lòganizasion Témwen Jéova jòdi koumansé ?
Pannan sé lanné 1870-la, an piti gwoup étidian Labib viré dékouvè vérité moun té bliyé dépi lontan. Yo konpwann kè Jézi té òganizé lasanblé krétjenn-an pou’y préché. Kondi ki fet, yo mété kò yo ka préché Wayom-lan toupatou asou latè. Lanné 1931, yo pwan non Témwen Jéova. — Li Ak 1:8 ; 2:1, 4 ; 5:42.
4. Ki manniè sé Témwen Jéova-a òganizé ?
Nan 1é sièk-la, té ni sanblé krétjen adan anlo péyi. Té ni an kolej santral (an group nonm ki ni an pil espérians) ki té ka dirijé’y épi té ka rikonnet Jézi kon Chef lasanblé-a (Ak 16:4, 5). Jòdi-jou, an Kolej santral ka djidé sé Témwen Jéova-a osi. Gwoup ansien plen espérians tala ka jéré filial ki ka tradui, enprimé épi piblié piblikasion apiyé asou Labib adan plis ki 800 lang. I ka ankourajé épi i ka ba pasé 120 000 sanblé lokal asou latè an dirèksion. Adan chak sanblé lokal, nonm ki kalifié ka sèvi kon ansien, oben reskonsab. Yo ka pwan swen « twoupo Bondié-a » épi lanmou. — Li 1 Piè 5:2, 3.
Témwen Jéova òganizé pou préché bon nouvel-la épi fè disip. Menm manniè kon sé apot-la, nou ka préché kay an kay (Ak 20:20). Nou ka ofè moun ki vréman enmen lavérité an létid Labib. Nou pa an lòganizasion selman. Nou sé an fanmi épi nou ni an Papa ki enmen nou. Nou sé frè épi sè ki ka véyé yonn asou lòt (2 Tésalonisyien 1:3). Adoratè Jéova ka fè sa yo pé pou fe’y plézi épi endé lézòt, sé pou sa yo òganizé. Yo sé fanmi ki pli bienéré asou latè ! — Li Sòm 33:12 ; Ak 20:35.
