LISON 8
Poutji Bondié ka kité lèmal épi soufwans fet ?
1. Ki manniè lèmal paret ?
Bondié kité lé-zòm gouvèné asé tan pou yo wè yo pé pa mété fen asou tout pwoblem monn-lan.
Sa ki mal paret asou latè lè Satan manti pou prèmié fwa. Okoumansman, Satan sété an zanj pawfé, men « i pa tjenbé doubout adan lavérité-a » (Jan 8:44). I té lé yo adoré’y, magré sé Bondié sel pou nou adoré. I manti ba prèmié fanm-lan Ev, épi i rivé mété an tet li di fè sa i té lé pito sa Bondié ka mandé. Adan suiv Ev : i pa kouté Bondié. Désizion’y simen lasoufwans épi lanmò. — Li Jenèz 3:1-6, 19.
Lè’y pousé Ev dézobéyi, Satan lévé an ribélion kont souvrennté Bondié (sa lé di dwa Bondié dirijé asou kréyasion’y). Pres tout moun suiv Satan : kon’y, yo pa lé Bondié pou Chef. Sé kon sa Satan vini « chef monn-lan ». — Li Jan 14:30 ; 1 Jan 5:19.
2. Es kréyasion Bondié té ni an tjak ?
Tou sa Jéova ka fè pawfé. Lé-zòm épi sé zanj-lan I fè-a té kapab kouté’y bienkonmifo (Détéwonòm 32:4, 5). I ba nou libèté chwazi fè sa ki bien oben fè sa ki mal. Nou pé sèvi libèté tala pou montré lanmou nou ni pou’y. — Li Jak 1:13-15 ; 1 Jan 5:3.
3. Pou kisa Bondié ka kité soufwans alé jik jòdi ?
Jik jòdi, Jéova ka kité lé-zòm lévé kont souvrennté’y. Pou kisa ? Pou ba laprev ki lè lé-zòm ka éséyé gouvèné pa pwop kò yo, sa pa ka mennen a ayen ki bon (Éklézyias 7:29 ; 8:9). Lé-zòm ka kondwi kò yo, yo menm dépi 6 000 lanné, nou ka bien wè : kè sé gouvelman-an pa rivé tiré ladjè, krim, lenjistis, épi maladi. — Li Jérémi 10:23 ; Women 9:17.
Sé pa kon gouvelman lé-zòm, gouvelman Bondié ka pòté bon bagay ba sé moun-an ki ka soutni’y (Ézayi 48:17, 18). Talè, Jéova kay krazé an poud tout gouvelman lé-zòm. Sé selman moun ki ka chwazi Bondié pou Chef ki kay viv anlè latè (Ézayi 11:9). — Li Dannièl 2:44.
Gadé vidéwo-a Poutji Bondié ka pewmet lasoufwans ?.
4. Kisa lapasians Bondié ka ba nou lokazion fè ?
Satan di lé-zòm ka sèvi Jéova pas yo ni an lentéré men pa pas yo enmen’y. Es zòt té kay lé ba laprev kè sa pa vré ? Sa posib ! Lapasians Bondié ka ba nou lokazion montré si nou simié sé li ki Chef nou oben si nou simié sé lé-zòm. Nou ka montré sa nou chwazi silon manniè nou ka viv. — Li Jòb 1:8-12 ; Pwovèb 27:11.
5. Ki manniè nou pé chwazi Bondié pou Chef ?
Chwa nou ka montré si nou lé Bondié pou Chef.
Ki manniè chwazi Bondié pou Chef ? Sé lè nou ka adoré Bondié bon manniè-a épi nou ka pratitjé vré rilijion-an, ki apiyé asou Pawol-li Labib (Jan 4:23). Nou ka montré nou pa lé Satan pou chef lè nou pa ka mélé adan zafè lapolitik épi lè nou pa ka mélé andidan ladjè, menm manniè épi Jézi. — Li Jan 17:14.
Satan ka sèvi pouvwa’y pou mennen lé-zòm fè péché sèksiel épi fè dòt mové bagay ki pa bon pies. Lè nou ka ladjé sé bagay tala, kanmarad oben moun andidan fanmi nou pé chèché fè lafet épi nou oben chèché frennen nou (1 Piè 4:3, 4). Kidonk, nou pou fè an chwa : Es nou kay chwazi pou zanmi moun ki pa enmen Bondié ? Es nou kay fè sa lalwa Bondié ki saj épi plen lanmou ka mandé nou fè ? Si nou fè tou sa, nou kay montré Satan sé an mantè lè i ka di lé-zòm kay sispann kouté Bondié dépi yo ka jwenn pwoblem. — Li 1 Korentyien 6:9, 10 ; 15:33.
Bondié enmen lé-zòm, asiré-pa-pétet, lanmou i ni ba yo kay fè lèmal épi lasoufwans disparet. Tou sa ki ni lafwa andidan Bondié épi ki ka pran ba bò koté’y kay viv pou toujou asou latè. — Li Jan 3:16.
