LISON 7
Wayom Bondié sé kisa ?
1. Wayom Bondié sé kisa ?
Poutji Jézi sé méyè Wa ki ni ? (MAK 1:40-42).
Wayom Bondié sé an gouvelman ki an siel-la. I kay ranplasé tout sé lézòt gouvelman-an épi sé li ki kay fè manniè pou volonté Bondié fet an siel épi asou latè. Sé sa ki an bon nouvel ! Lé-zòm bizwen an bon gouvelman, sé wayom Bondié yonn ki ké ba lé-zòm sa yo bizwen. I kay lianné tout moun ki asou latè. — Li Dannièl 2:44 ; Matié 6:9, 10 ; 24:14.
Tout wayom ni an wa. Jéova chwazi Gason’y, Jézikri, pou’y Wa wayom li-an. — Li Révélasion 11:15.
Gadé vidéwo-a Wayom Bondié sé kisa ?.
2. Poutji Jézi sé méyè Wa ki ni ?
Gason Bondié sé méyè Wa ki ni pas i bon épi i toujou défann sa ki bien (Matié 11:28-30). An plis di sa, sé dépi an siel-la i kay dirijé latè. Tou sa ka fè nou konpwann i asé puisan pou endé sé moun-an. Apwé rézireksion’y, i viré monté an siel épi i asiz « a dwet Bondié » ka atann i vini Wa (Ébré 10:12, 13). Pli ta, Bondié fè’y Wa wayom li-an. — Li Dannièl 7:13, 14.
3. Ki moun ki kay gouvèné épi Jézi ?
An gwoup yo ka kriyé « sen » kay gouvèné épi Jézi an siel-la (Dannièl 7:18). Sé prèmié sen-an ki té chwazi-a, sé té sé apot fidel Jézi-a. Jik jòdi, Jéova ka kontinié chwazi nonm épi fanm fidel. Kon Jézi, yo ka résisité épi an kò espiritiel. — Li Jan 14:1-3 ; 1 Korentyien 15:44.
Ojis, konbien moun kay alé an siel ? Jézi di yo té kay an « ti twoupo » (Lik 12:32). Yo kay 144 000 épi yo kay gouvèné latè ek Jézi. — Li Révélasion 14:1.
4. Kisa ki fet lè Jézi vini Wa ?
Bondié doubout wayom-li an 1914 *. Ki prèmié bagay Jézi fè lè i vini Wa ? I voltijé Satan épi sé denmon’y-lan asou latè. Satan té telman anrajé, i simen bon panik anlè tout latè (Révélasion 12:7-10, 12). Dépi sa, lé-zòm ka jwenn malè dèyè malè. Ladjè, moun ka mò fen, maladi épi tranmanntè, tou sa adan an « sin » ki ka montré, talè Wayom-lan kay kontwolé latè. — Li Lik 21:7, 10, 11, 31.
5. Kisa wayom Bondié ka fè jòdi ?
Wayom Bondié ka sanblé bon tibwen moun tout kalté péyi, épi travay prédikasion-an. Milion nonm épi fanm ki enb ka vini sitwayen wayom-lan Jézi ka mennen-an. Wayom Bondié kay pwotéjé yo lè’y kay krazé monn tala. Kidonk, tou sa ki lé pwofité di bon bagay wayom-lan kay pòté, dwé chwazi Jézi kon Wa épi fè sa i ka mandé. — Li Révélasion 7:9, 14, 16, 17.
Pandan 1 000 lanné, Wayom Bondié kay travay pou fè sa Bondié té prévwè okoumansman ba lé-zòm. Tout latè kay vini an paradi. Pou fini, Jézi kay viré ba Papa’y Wayom-lan (1 Korentyien 15:24-26). Es i ni an moun éti ou sé voudré palé di wayom Bondié ? — Li Sòm 37:10, 11, 29.
^ § 6 Pou konnet plis anlè pwofési Labib-la ki té ka anonsé kè Bondié mété wayom-li doubout an 1914, gadé liv Que nous enseigne la Bible ?, paj 217-220.
