PATI 3
Koumanniè pou réglé pwoblèm
« Fodré ni an lanmou ki fò menm yonn ba lòt, pas lanmou ka kouvè an patjé péché » (1 Piè 4:8).
Lamenm apré zòt koumansé viv a dé, pwoblèm ka parèt. Sé pétèt pou lapéti diférans ki ni adan manniè zòt ka pansé, manniè zòt ka risanti bagay, oben manniè zòt ka konsivwè lavi. Sé pétèt osi akòz pwoblèm an déwò mariyaj-la oben sitiasion zòt pa té ka atann.
Ou pé anvi fè wòl pa wè, men sav Labib-la ka konséyé nou doubout douvan difikilté nou (Matié 5:23, 24). Sé lè’w ka aplitjé sé prensip Labib-la ou ka touvé méyè solision pou réglé pwoblèm.
1 PALÉ DI PWOBLÈM-LAN
SA LABIB-LA KA DI : « I ni [...] an tan pou palé » (Éklézias 3:1, 7). Pran tan palé di pwoblèm-lan épi konjwen’w. Di’y franchman sa ou ka risanti épi sa ou ka pansé di sa. Toujou di’y lavérité (Éfézien 4:25). Menm si sa zòt ka palé-a ka touché’w anpil, pran gad pou pa vréyé kò’w monté. An répons ki dous pé anpéché an senp ti-kozé tounen an gwo dézòd (Pwovèb 15:4 ; 26:20).
Menm si ou pa dakò épi konjwen’w rété janti, é pa bliyé montré’y ou enmen’y épi ou ka rèspèkté’y (Kolosien 4:6). San pèd tan, fè tou sa ou pé pou touvé an solision épi pa rété san palé (Éfézien 4:26).
SA ZÒT PÉ FÈ :
-
Atann bon moman-an pou palé di pwoblèm-lan.
-
Lè sé konjwen’w ki ka palé, kouté’y é pran gad pou pa koupé pawòl-li. Apré ou pé palé.
2 KOUTÉ ÉPI CHÈCHÉ KONPRANN
SA LABIB-LA KA DI : « Fo zòt ni an lo afèksion yonn ba lòt. Fo zòt toujou pran douvan pou ba yonn a lòt lonnè » (Women 12:10). Manniè ou ka kouté, sa enpòwtan menm. Mété kò’w alaplas konjwen’w é fè kò’w tou piti pou éséyé konprann manniè wè’y (1 Piè 3:8 ; Jak 1:19). Pa fè wòl kouté. Si ou pé, sispann sa ou ka fè-a pou pé sa mété tout tèt-ou anlè sa konjwen’w ka di’w-la, é si ou pé pa, pwopozé’y palé di sa pli ta. Si ou ka wè’y kon an moun ki an menm létjip épi’w é pa kon an moun ki kont-ou, ou pé ké kontrayé two vit (Éklézias 7:9).
SA ZÒT PÉ FÈ :
-
Kouté épi an lèspri ouvè, menm si sa ou ka tann ka kontrayé’w.
-
Fòk ou sa wè sa ki séré dèyè pawòl konjwen’w. Bien véyé kisa, jès i ka fè épi kò’y é manniè palé’y, ka aprann-ou.
3 ATJÈLMAN FÒK ZÒT AJI
SA LABIB-LA KA DI : « Travay rèd toujou pwotjiré bon bagay, men yenki palé ka fè’w fini san ayen » (Pwovèb 14:23). Sé pa sèlman mété kò zòt dakò asou an solision. Fodré zòt aplitjé désizion zòt. Délè sa kèy mandé anpil fòs épi kouraj, men sé an lapenn ki nésésè (Pwovèb 10:4). Si zòt ka lianné éfò zòt, zòt kay ni an « bèl rékonpans pou travay [zòt] » (Éklézias 4:9).
SA ZÒT PÉ FÈ :
-
Désidé ansanm sa zòt chak-la pou fè pou réglé pwoblèm-lan.
-
Toutlè, gadé ki wotè zòt yé.
