LISON 01
Kisa Labib-la pé pòté ba’w ?
Nou tout lé sav plis anlè lavi, anlè soufwans, anlè lanmò, anlè sa nou kéy divini. Nou tout nou ni ti sousi-nou parapòt a lavi touléjou : kontèl, genyen asé lajan pou swen fanmi-nou é ba’y tjè kontan. Anlo moun ja konstaté Labib-la pa ka kontanté kòy sèlman réponn anlè sé gran kèsion lavi-a, men i ka osi endé moun adan lavi touléjou. É wou, ès ou ka pansé Labib-la pé itil ba nou ?
1. Ki kèsion Labib-la ka réponn ?
Labib ka réponn sé kèsion enpòwtan-tala : Ki manniè lavi-a parèt ? Sa nou ka fè anlè latè ? Poutji inosan ka soufè ? Sa ka pasé apré lanmò ? Magré tout moun ka chèché lapé, poutji ni tousa ladjè ? Ki divini latè ? Sa nòwmal pozé kòw sé kèsion-tala. Sé sa milion moun fè, é an final-di-kont yo kontan répons Labib-la ba yo.
2. Ès Labib-la pé endé’w adan lavi touléjou ?
I ni anlo bon konsèy adan Labib-la. Kontèl, i ka endé lafanmi ni an lavi pli bèl. I ka ba ti zouti pou’w pé sa jéré istrès-ou é pou’w pé sa pran plézi’w adan travay-ou. Adan liv-tala ou kèy dékouvè sa Labib-la ka ansénié anlè sé sijé-tala é an patjé dòt. Asiré ti kozé-nou kèy pèwmèt ou wè ‘tout Lékriti-a [kidonk tousa ki ni an Labib-la] pé itil ba’w’ (2 Timoté 3:16).
Liv-tala pa ka pran plas Labib-la, menm si i ka ankourajé’w étidié’y. Sé pou sa nou sé lé ou li sé vèsé-a ki adan sé lison-an épi konparé yo épi sa ou ka aprann.
ANNOU PLI LWEN
Annou gadé ki manniè Labib-la endé moun, sa’w pé fè pou pran plézi lè ou ka li’y é poutji sa nésésè an moun endé’w pou konprann li.
3. Labib pé djidé nou
Labib-la kon an lanp ka kléré fò. I pé kléré nou lè nou ni désizion pou nou pran, épi’y nou sav kisa ki ké fèt dèmen.
Li Sòm 119:105, épi diskité sé kèsion-tala :
-
Kisa matjè Sòm-lan li menm té ka pansé di Labib-la ?
-
É wou, sa’w ka pansé di Labib-la ?
4. Labib ka réponn kèsion nou ka pozé kònou
Sé an Labib-la an fanm touvé répons kèsion i té ka pozé kòy dépi nanni-nannan. Gadé VIDÉWO-a, épi diskité sé kèsion-tala :
-
Ki kèsion fanm-tala té ka pozé kòy ?
-
Kisa létid Labib-la pòté ba’y ?
Labib-la ka mennen nou pozé kònou kèsion. Li Matié 7:7, épi diskité kèsion-tala :
-
Ki kèsion ou té kèy enmen touvé an répons adan Labib-la ?
5. Ou pé pran plézi lè’w ka li Labib
An patjé moun enmen li Labib é yo ka di sa ka fè yo dibien. Gadé VIDÉWO-a, épi diskité sé kèsion-tala :
-
Dapré vidéwo-a, ès lajénès enmen li ?
-
Magré sa, poutji yo enmen li Labib ?
Ansèyman Labib-la ka konsolé nou épi ka ba nou lèspwa. Li Women 15:4, épi diskité kèsion-tala :
-
Ès ou té ké enmen sav plis anlè konsolasion épi lèspwa Labib-la ka ba ?
6. Sa pli fasil konprann Labib-la lè ni an moun ka endé’w
Anpil moun enmen li Labib, mé yo ka touvé sa nésésè diskité di sa épi dòt moun. Li Akt 8:26-31, épi diskité kèsion-tala :
-
Ki manniè nou pé konprann Labib-la ? (Gadé vèsé 30, 31.)
NI MOUN KA DI : « Étidié Labib, sé an pèd tan. »
-
É wou, sa’w ka pansé ? Poutji ?
SA’W APRANN
Labib ka ba’w bèl konsèy pou lavi touléjou, i ka réponn gran kèsion lavi-a, i ka konsolé nou, i ka ba nou lèspwa.
An ti viré gadé
-
Ki konsèy ou ka touvé an Labib-la ?
-
Ba yonn-dé kèsion Labib ka réponn.
-
Kisa ou té kèy enmen Labib-la aprann ou ?
TIBREN PLIS ANKÒ
Konsèy Labib-la toujou ni valè jòdi.
« Une sagesse à l’épreuve du temps » (La Tour de Garde no 1 2018)
Labib-la endé an nonm ki pa té alèz andidan pwòp kòy, dépi timanmay.
Konsèy Labib-la ki itil ba lafanmi.
« 12 clés du bonheur familial » (Réveillez-vous ! no 2 2018)
Labib-la ka di’w an manniè klè ki moun ka dirijé monn-lan poubon.