LISON 07

Ki kalté moun Jéova yé

KOUTÉ AN

Ki manniè ou ka wè Bondié ? Ès sé an moun ou ka rèspèkté anpil, men ou ka santi i lwen di’w ? Kontèl, wo kon an zétwèl. Oben an tèt-ou sé pa an moun ki réyèl, men an bagay ki puisan kon an siklòn ? Ki moun ki Jéova poubon ? Adan Pawòl-li, Labib, Jéova ka montré kalité’y. I ka fè’w sav i ka entérésé kòy a wou.

1. Poutji nou pé pa wè Bondié ?

« Bondié sé an lèspri » (Jan 4:24). Jéova pa ni an kò lachè kon ta nou. Sé an lèspri ka viv an sièl-la, an koté nou pé pa wè.

2. Ki kalité Jéova ni ?

Jéova envizib, men lè nou ka aprann konnèt li, nou enmen’y pas sé an moun réyèl ki ni anpil bèl kalité. Labib ka di : « Jéova enmen lajistis, èk i pé ké ladjé moun-li ki fidèl » (Sòm 37:28). I « plen tandrès adan lanmou’y épi plen mizérikòd », èspésialman ba moun ki ka soufè (Jak 5:11). « Jéova ka rété tou bò moun tjè-yo krazé ; i ka sové moun kouraj-yo fonn » (Sòm 34:18). Ès ou sav, sa nou ka fè ka aji anlè’y ? Lè nou ka chwazi fè sa ki pa bon, i anmè épi i tris (Sòm 78:40, 41). Men lè nou ka chwazi fè sa ki bien, i kontan (li Pwovèb 27:11).

3. Koumanniè Jéova ka montré i enmen nou ?

Pli bèl kalité Jéova ni, sé lanmou. Poutoudi, « Bondié sé lanmou » (1 Jan 4:8). Jéova ka aprann nou lanmou’y adan Labib-la, men bagay i kréyé ka aprann nou lanmou’y tou (li Akt 14:17). Katjilé asou manniè i fè nou. I ba nou kapasité wè bèl koulè, kouté bèl mizik, épi manjé bon manjé. I lé nou viv an bèl lavi.

ANNOU PLI LWEN

Annou gadé kisa Jéova ka sèvi pou fè bagay èstwòdinè. Épi annou dékouvè ki manniè Jéova ka èsprimen kalité’y ki bèl toubannman.

4. Lèspri sen sé lafòs Bondié annaksion

Pou travay, nou ka sèvi lanmen-nou ; Jéova, li, ka sèvi lèspri sen’y. Labib-la ka èsplitjé lèspri sen sé pa an moun, men sé lafòs-la Bondié ka sèvi lè i lé fè an bagay. Li Lik 11:13 épi Akt 2:17, épi diskité sé kèsion-tala :

Jéova ka ‘répann’ lèspri sen’y anlè moun ki ka mandé’y. Alò, és lèspri sen sé Bondié li menm oben lafòs Bondié ? Poutji ?

Jéova ka sèvi lèspri sen’y pou fè dé bagay èstwòdinè. Li Sòm 104:30 épi 2 Piè 1:20, 21, épi diskité kèsion-tala :

Kisa Jéova fè épi lèspri sen’y ?

5. Jéova ni kalité ki ka atiré nou

Menm si sa té ka fè lanné Moyiz té ka adoré Jéova, vini an lè, i té ni bizwen konnèt Kréyatè’y ankò plis. I mandé’y : « Souplé, si ou ka gadé mwen épi favè, fè mwen konnèt chimen ou ka pran, pou man pé sa konnèt ou èk pou man kontinié ni favè’w » (Ègzòd 33:13). Jéova di Moyiz yonn-dé kalité i ni. Li Ègzòd 34:4-6 épi diskité sé kèsion-tala :

Ki kalité’y Jéova dévwalé ba Moyiz ?
Ki kalité Jéova ou enmen plis ?

6. Jéova ka sousié kòy di tout moun

Sé Ébré-a, pèp Bondié antan lontan, té èsklav an Éjip, é yo soufè anpil. Sa Jéova risanti a lè-tala ? Pran Ègzòd 3:1-10 épi kouté anrèjistrèman-an oben li sé vèsé-tala. Apré, diskité sé kèsion-an ka vini an.

KOUTÉ : Jéhovah se souciait de leurs souffrances (2:45)

Kisa listwa-tala ka aprann ou asou santiman Jéova lè i ka wè nonm ka soufè ? (gadé vèsé 7-la épi 8-la).
Ès ou ka pansé Jéova lé vréman endé limanité épi i kapab fè’y ? Poutji ?