LISON 09

Lapriyè pé rann lanmitié’w épi Bondié pli fò

KOUTÉ AN

Sa za rivé’w pa sav sa’w pou fè adan an sitiyasion ? Ès ou té ké enmen touvé solision pwoblèm ou ka jwenn ? Ès ou bizwen konsolasion ? Ès ou té ké enmen vini pli pré Jéova ? Lapriyè pé endé’w. Men priyé bon manniè-a sé kisa ? Ès Bondié ka kouté tout lapriyè ? É kisa ou pé fé pou Bondié kouté lapriyè’w ? Sé di sa nou kay palé adan lison-tala.

1. Ki moun pou nou priyé é pou kisa ?

Jézi ansénié, sèl moun-lan nou pou priyé sé Papa-nou ki an sièl-la, Jéova. É sé sa li menm té ka fè. I di : « Zòt pou prédié konsa : “Papa-nou ki an sièl-la...” » (Matié 6:9). Lè nou ka prédié Jéova, lanmitié-nou épi’y ka vini pli fò.

Nou pé priyé ba près tout bagay. Men sa vré, pou Bondié réponn lapriyè-nou fòk yo annakò épi sa i lé. Bondié « ka kouté nou, kisiswa sa nou ka mandé’y ki dakò épi volonté’y » (1 Jan 5:14). Jézi ba ègzanp asou kisa nou pé priyé (li Matié 6:9-13). Nou pé prédié ba kèsion ka trakasé nou, men fòk pa nou bliyé di Bondié mèsi ba tousa i ka fè ba nou, épi mandé’y endé lézòt tou.

2. Ki manniè fòk nou priyé ?

Labib ka ankourajé nou ‘vidé tjè-nou douvan Bondié’ (Sòm 62:8). Lapriyè-nou pou sòti an fon tjè-nou. Nou pé prédié nenpòt koté, nenpòt ki lè, tou wo ouben an tèt-nou, èk adan nenpòt ki pozision épi rèspé.

3. Koumanniè Bondié ka réponn lapriyè-nou ?

I ka fè’y pliziè manniè. Jéova ba nou Pawòl-li Labib, pou nou touvé répons kèsion nou ka pozé kònou. Li Pawòl Bondié pé rann saj « an moun ki pa ni lèspérians » (Sòm 19:7 ; li Jak 1:5). Jéova pé trantjilizé nou lè nou ka jwenn difikilté. É i pé itilizé moun ka adoré’y pou endé nou lè nou bizwen.

ANNOU PLI LWEN

Annou wè ki kalté lapriyè ka fè Bondié plézi é poutji lapriyè ka fè nou dibien.

4. A ki kondision Bondié ka kouté lapriyè-nou

A ki kondision Bondié ka kouté lapriyè-nou ? Gadé VIDÉWO-a.

VIDÉWO : Ès Bondié ka kouté tout lapriyè ? (mòso) (2:42)

Jéova lé nou priyé’y. Li Sòm 65:2 épi diskité sé kèsion-tala :

Ès ou ka pansé Bondié lé ‘kouté lapriyè’w’ ? Poutji ?

Pou Bondié kouté lapriyè-nou fòk nou goumen pou viv silon règ i ka ba nou. Li Miché 3:4 é 1 Piè 3:12, épi diskité kèsion-tala :

Kisa fòk nou fè pou Bondié kouté lapriyè-nou ?

Lè ni ladjè, chak kan ka priyé souvan pou ni laviktwa. Men ès sa lojik kwè Bondié kay réponn lapriyè-yo ?

5. Lapriyè-nou pou sòti an fondòk tjè-nou

Yonn-dé moun aprann fòk té viré di sé menm lapriyè-a. Men ès sé konsa Jéova lé nou priyé ? Li Matié 6:7 épi diskité kèsion-tala :

Kisa pou nou fè pou ‘pa anni répété tout lè menm bagay-la’ adan lapriyè-nou ?

Chak jou, sonjé an bon bagay ki rivé’w, épi di Jéova mèsi. Si ou fè sa pandan an simenn, ou kéy prédié asou 7 bagay diféran san répété kòw.

An bon papa lé tianmay- li palé ba’y épi tjè’y. Jéova tou lé nou palé ba’y épi tjè-nou.

6. Lapriyè sé an kado Bondié

Ki manniè prédié pé ba nou lafòs, ki nou bien ki nou pa bien ? Gadé VIDÉWO-a.

VIDÉWO : Lapriyè pé endé nou andiré an léprèv (1:32)

Labib ka pwonmèt, épi lapriyè, nou pé ni lèspri- nou trantjil poubon. Li Filipien 4:6, 7 épi diskité sé kèsion-tala :

Lapriyè pa ka réglé tout pwoblèm nou ni, men ki manniè i pé endé nou kanmenm ?
Pou kisa ou sé lé priyé ?

Ès ou té sav sa ?

« Amenn » lé di « dakò épi sa » oben « asiréman ». Sé pa jòdi-jou Labib ka montré adoratè Bondié ka di « amenn » lè yo fini priyé (1 Kwonik 16:36).

7. Pran tan pou prédié

Délè, nou ni tèlman bagay pou fè, nou ka oubliyé prédié. Ki valè Jézi té ka ba lapriyè ? Li Matié 14:23 é Mak 1:35, épi diskité sé kèsion-tala :

Koumanniè Jézi té ka fè pou touvé tan pou prédié ?
Ki manniè wou menm ou pé touvé tan pou prédié ?

NI MOUN KA DI : « Bondié ka kouté lapriyè-nou, men nou pa sav ki tan i kay réponn. »

Kisa ou té kéy réponn si an moun té ka di’w sa ?

SA’W APRANN

Lapriyè ki ka sòti an fondòk tjè-nou ka ranfòsé lanmitié-nou épi Jéova. I ka trantjilizé lèspri-nou é i ka ba nou lafòs nou ni bizwen pou fè Jéova plézi.