LISON 10

Kisa réyinion sé Témwen Jéova-a pé pòté ba’w ?

KOUTÉ AN

Ès ou ja vini adan an réyinion Témwen Jéova ? Si ou pa janmen alé, ou pé santi kòw tibren èstrésé si ou pou alé pou prèmié fwa. Pétèt ou ka mandé kòw : « Kisa ka pasé adan sé réyinion-tala ? Poutji yo enpòwtan ? É poutji sa té kéy bon ba mwen alé an réyinion ? » Adan lison-tala, ou ké aprann lè’w ka sanblé épi dòt moun sa pé rann lanmitié’w épi Jéova pli fò é sa pé endé’w adan lavi’w.

1. Poutji Témwen Jéova ni labitid sanblé ?

An ékriven Labib ka ba pli bon rézon-an : « Adan gran sanblé-a, man ké gloriyé Jéova » (Sòm 26:12). Jòdi tou, Témwen Jéova ni labitid sanblé é sé an plézi pou yo. Toupatou oliwon latè, yo ka réyini chak simenn épi sanblé lokal-yo pou adoré Bondié, chanté louwanj épi prédié. Anplis, dé-twa fwa adan lanné-a, yo ka fè’y adan dé gran sanblé.

2. Kisa ou ké aprann adan sé réyinion-tala ?

Adan réyinion-yo, sé Labib Témwen Jéova ka èsplitjé ; ‘yo ka èsplitjé’y pou sa klè, épi yo ka ba sans-lan’ (li Néyémi 8:8). Si ou vini asisté, ou kéy aprann plis bagay asou Jéova é asou kalité’y. Anmizi ou ké konprann lanmou i ni pou’w, anmizi ou kéy anvi enmen’y. Ou kéy aprann osi, ki manniè i pé endé’w pou lavi’w ni plis sans (Izayi 48:17, 18).

3. Kisa sanblé épi dòt moun adan réyinion-nou pé pòté ba’w ?

Jéova ka mandé nou ‘véyé yonn anlè lòt, pou yonn pòté lòt a lanmou, épi fè bèl aksion, annou pa ladjé réyinion-nou’ (Ébré 10:24, 25). Adan sé réyinion-an, ou ké jwenn moun ki ka pòté an vré lentéré ba lézòt, épi ki kon wou menm, lé sav plis anlè Bondié. Ou ké tann yo palé di sa ki ka ba yo kouraj adan Labib-la (li Women 1:11, 12). Ou ké fè konésans épi moun ki ni lajwa, menm si yo ni pwoblèm-yo. Mi sé pou sa osi, Jéova lé nou pran labitid réyini kònou !

ANNOU PLI LWEN

Annou palé atjèlman di sa ki ka pasé adan réyinion sé Témwen Jéova-a é annou gadé poutji sa bon pou nou vini la.

4. Réyinion Témwen Jéova

An 1^ié sièk-la, sé krétjen-an té ja pran labitid réyini pou adoré Jéova (Women 16:3-5). Li Kolosien 3:16 épi diskité kèsion-tala :

Ki manniè sé prèmié krétjen-an té ka adoré Jéova ?

Jòdi-a, Témwen Jéova ni menm labitib tou sanblé adan sal di Wayòm. Pou ni an ti lidé anlè manniè sanblé-yo ka pasé, gadé VIDÉWO-a. Apré sa, bien gadé zimaj-la ki ka montré an réyinion épi diskité sé kèsion-an ka vini an.

VIDÉWO : Kisa ki ka pasé andidan an sal di Wayòm ? (2:12)

Alò, kisa ou ka wè ki ka sanm ant sa ki ka pasé adan an sal di Wayòm, épi sa ou li adan Kolosien 3:16 ?
Ès adan vidéwo-a oben zimaj-la ou ka wè an bagay èspésial ki ka ba’w anvi asisté sé réyinion-an ?

Li 2 Korentjen 9:7 épi diskité kèsion-tala :

Poutji Témwen Jéova pa ka mandé lajan adan réyinion-yo ?

Annou gadé ansanm kisa yo ké dékatiyé adan an réyinion ki ka vini.

Ki mòso réyinion-an ka parèt ou pli entérésan oben pli itil ba’w ?

Ès ou té sav sa ?

Anlè jw.org, ou pé touvé koté épi lè réyinion ka fèt oliwon latè.

Adan réyinion-nou, i ni diskou, montray épi vidéwo. Sé réyinion-an ka koumansé épi ka fini pa an chanté épi an lapriyè.
Adan yonn-dé mòso pwogram-lan, sé asistan-an pé ba koumantè-yo.
Nou kontan wè tout moun : ki fanmi, ki sélibatè, ki gran moun épi ki jenn moun.
Nou pa ka mandé lajan adan réyinion-nou. Témwen Jéova pa ka fè’w péyé pou antré é yo pa ka fè latjèt non pli.

5. Asisté sé réyinion-an sa pé mandé léfò

Annou gadé lègzanp lafanmi Jézi. Chak lanné, pou alé an Tanp-lan, yo té pou maché oliwon 3 jou, adan an chimen montann, ant Nazarèt épi Jérizalèm. Li Lik 2:39-42 épi diskité sé kèsion-tala :

Dapré’w, ès sé té an vwayaj fasil ?
Dapré’w, ki léfò fòk ou ké pétèt fè pou asisté sé réyinion-an ?
Ès ou ka pansé sa ké vo lapenn ? Poutji ?

Labib ka di sa potalan toubannman sanblé pou adoré Bondié. Li Ébré 10:24, 25 épi diskité kèsion-tala :

Poutji fòk pran labitid vini adan sé réyinion-an ?

NI MOUN KA DI : « Pou mwen, man pa bizwen réyini épi dòt moun, man ka étidié Labib bò kay-mwen. »

Ki vèsé oben ki lègzanp adan Labib-la ou sé pé sèvi pou montré sa Jéova lé ?

SA’W APRANN

Vini adan sé réyinion-an kay pèwmèt ou aprann plis bagay anlè Jéova, kay rann lanmitié’w épi’y pli fò épi osi kay pèwmèt ou adoré’y ansanm épi dòt moun.