LISON 14

Ki manniè Bondié lé nou adoré’y ?

KOUTÉ AN

Adan lison 13-la, nou wè Bondié pa ka asèpté tout rèlijion. Men, nou pé rivé adoré Kréyatè-nou an manniè ka fè’y plézi. Alò, ki kalté « ladorasion [ouben : rèlijion] » ka fè’y plézi ? (Jak 1:27). Annou gadé sa Labib ka di anlè sa.

1. Asou kisa nou pou apiyé pou adoré Bondié ?

Sé asou Bib-la pou nou apiyé pou adoré Bondié. Adan an lapriyè, Jézi di Bondié : « Pawòl-ou sé vérité » (Jan 17:17). I ni rèlijion ki pa ka tjenn kont sé vérité-a ki adan Pawòl Bondié. Yo simié sèvi sa lézòm ka ansénié épi tradision, pito ki vérité ki adan Bib-la. Men Jéova pa dakò épi moun ka ‘mété asou koté koumandman’y’ (li Mak 7:9). Okontrè, Jéova ka kontan lè nou ka li Labib épi aplitjé konsèy ki andidan’y.

2. Koumanniè nou pou adoré Jéova ?

Sé Jéova sèlman pou nou sèvi pas sé li ki Kréyatè-nou (Révélasion 4:11). Sa lé di sé li sèl pou nou enmen épi adoré. Fòk pa nou sèvi èstati oben zimaj adan ladorasion-nou (li Izayi 42:8).

Fòk ladorasion-nou « sen » pou Jéova ‘asèpté’y’ (Women 12:1). Sa lé di fòk nou suiv lwa moral i ka ba nou adan lavi-nou. Pa ègzanp, moun ki enmen Jéova, ka enmen épi suiv sa i ka di asou mariyaj. Anplis, yo pa ka fè sa ki pa bon, kontèl fimen, pran ladwòg ouben bwè twòp lalkòl. a

3. Poutji fòk nou adoré Jéova ansanm épi dòt krétjen ?

Chak simenn, sé réyinion-an sé lokazion pou ‘louwé Jéova adan lasanblé-a’ (Sòm 111:1, 2). Kontèl, chanté louwanj ba Jéova (li Sòm 104:33). Jéova ka mandé nou asisté sé réyinion-an pas i enmen nou. I sav yo enpòwtan pou nou viv an bèl lavi pou toujou. Lè nou ka vini réyinion, yonn ka ankourajé lòt.

ANNOU PLI LWEN

Annou ègzaminen poutji Jéova pa lé nou sèvi zimaj pou adoré’y. Épi annou aprann 2 manniè enpòwtan pou louwé Bondié.

4. Nou pa pou sèvi zimaj oben èstati pou adoré Bondié

Koumanniè nou sav Bondié pa ka kontan lè nou ka fè sa ? Gadé VIDÉWO-a épi diskité kèsion-tala :

VIDÉWO : Ès Bondié dakò pou sèvi zimaj adan ladorasion ? (3:26)

Antan Labib, kisa ki pasé lè sèvitè Bondié té lé adoré’y douvan èstati ?

Ni moun ka di, lè yo douvan an zimaj ouben an èstati, yo ka santi yo pli pré Bondié. Men ès sé konsa pou fè ? Li Ègzòd 20:4-6 épi Sòm 106:35, 36, épi diskité sé kèsion-tala :

Ki kalté òbjé sé moun-lan ka sèvi délè pou adoré Bondié ?
Kisa Jéova ka pansé di sa ?
É wou menm ki manniè ou ka wè sa ?

5. Adoré Jéova li yonn, ka libéré nou di mansonj sé rèlijion-an

Ki manniè adoré Jéova li sèl pé libéré nou ? Gadé VIDÉWO-a.

VIDÉWO : Lavérité libéré’y (5:16)

Li Sòm 91:14 épi diskité kèsion-tala :

Adoré Jéova ka montré manniè nou enmen’y. Si nou fè sa, kisa i ka pwonmèt nou ?

6. Nou ka sanblé pou nou adoré Jéova

Pandan sé réyinion-an, nou ni lokazion partisipé lé nou ka ba répons épi lè nou ka chanté kantik. Lè nou fè sé bagay-tala, nou ka louwé Jéova é nou ka ankourajé yonn a lòt. Li Sòm 22:22 épi diskité sé kèsion-tala :

Ès ou enmen tann répons moun ka ba adan sé réyinion-an ?
Ès ou té ké enmen partisipé ?

7. Jéova enmen wè nou palé di sa nou ka aprann

I ni pliziè manniè pou partajé sé vérité Labib-la épi dòt moun. Li Sòm 9:1 épi 34:1, épi diskité kèsion-tala :

Pami tout sé vérité-a ou aprann adan Labib, kilès ou té ké enmen partajé épi dòt moun ?

NI MOUN KA DI : « Tout rèlijion ni bon bagay andidan’y. »

Sa’w ka di di sa ?

SA’W APRANN

Pou Bondié asèpté ladorasion-nou, fo nou adoré’y li yonn, fo nou gloriyé’y adan sé réyinion sanblé-a épi fòk nou palé ba dòt moun di sa nou ka aprann.