LISON 15
Jézi sé ki moun ?
Jézi sé an moun près tout moun konnèt. Magré sa, anlo moun sé non’y sèlman yo konnèt, yo pa sav gran chòy anlè’y. Dòt moun ni lidé diféran asou ki moun i yé vréman. Kisa Labib ka di asou Jézi ?
1. Jézi sé ki moun ?
Jézi sé an lèspri puisan ka viv adan sièl-la. Sé li prèmié Jéova kréyé, sé pou sa yo ka kriyé’y « prèmié kréyati adan tout lakréyasion » (Kolosien 1:15). Labib ka kriyé Jézi ‘sèl Yich-la Bondié fè’ pas sé li yonn Jéova kréyé tousèl (Jan 3:16). Jézi travay ansanm-ansanm épi Papa’y, Jéova, pou kréyé tout sé lézòt bagay-la (li Pwovèb 8:30). Jézi an tjè koko épi Jéova. Sé li ki « Lapawòl » pas i ka pòté Pawòl Bondié épi fidélité. I ka anonsé mésaj épi lalwa Bondié ba moun épi zanj (Jan 1:14).
2. Poutji Jézi vini asou latè ?
I ni près 2 000 lanné, Jéova sèvi lèspri sen’y pou fè an mirak. I mofwazé lavi Jézi ki té an zanj puisan an sièl-la, pou fè’y vini an anbriyon adan bouden Mari an jenn madanm ki té vièj (li Lik 1:34, 35). Sé konsa Jézi nèt asou latè. Jézi vini asou latè kon Mési, oben Kris, pou sové lézòm a. Tout pwofési adan Labib anlè Mési-a, réyalizé asou Jézi. Sa pèwmèt anlo moun konprann sé li ki té « Kris-la, Yich Bondié-a ki vivan » (Matié 16:16).
3. Ki koté Jézi yé atjèlman ?
Lè Jézi mò asou latè, Bondié résisité’y, i fè’y viré vini an lèspri adan sièl-la. Adan sièl-la, « Bondié ba’y kont wotè’y » (Filipien 2:9). Jòdi-a, Jézi sé an zanj ki puisan menm, sèl moun-lan ki pli puisan pasé’y, sé Jéova.
ANNOU PLI LWEN
Annou aprann plis asou Jézi, épi annou wè poutji sa enpòwtan konnèt li.
4. Bondié Tou-Puisan an, sé pa Jézi.
Labib ka aprann nou, ki menm si Jézi sé an lèspri puisan an sièl-la, i ka obéyi Jéova, Bondié’y èk Papa’y. Koté nou pran sa ? Gadé VIDÉWO-a pou wè sa Labib ka di asou pozision Jézi parapòt a Bondié Tou-Puisan.
Mi yonn-dé vèsé pou endé konprann liannaj-la ki ni ant Jéova épi Jézi. Li sé vèsé-a épi diskité sé kèsion-an ka vini an.
Li Lik 1:30-32.
-
Silon sa zanj-lan di, ki liannaj ki ni ant Jézi épi Jéova Bondié ki « Pli-Wo a » ?
Li Matié 3:16, 17.
-
Jou-a Jézi batizé, vwa-a ki sòti an sièl-la, ki sa i di ?
-
Dapré’w, ki moun ki té ka palé ?
Li Jan 14:28.
-
Ki moun ki pli gran épi ki ni plis lotorité, an papa oben fis-li ?
-
Jézi kriyé Jéova « Papa ». Kisa sa ka aprann nou ?
Li Jan 12:49.
-
Ba Jézi, ès li épi Papa’y sé menm moun-lan ? É wou, sa’w ka pansé ?
5. Yonn-dé prèv, Jézi sé Mési-a
Adan Labib, ni an patjé pwofési pou endé sé moun-lan konprann ki moun Mési-a té yé. I ka di Mési-a sé moun-lan Bondié chwazi pou sové lézòm. Gadé VIDÉWO-a pou ni an ti lidé asou yonn-dé pwofési Jézi akonpli lè i té anlè latè.
Li sé pwofési biblik-tala épi diskité sé kèsion-an ka vini-an.
Li Miché 5:2 pou sav koté Mési-a té pou nèt. b
-
Ès pwofési-tala réyalizé ? (Matié 2:1).
Li Sòm 34:20 épi Zakari 12:10 pou wè 2 pwofési asou lanmò Mési-a.
-
Ès sé pwofési-tala réyalizé poubon ? (Jan 19:33-37).
-
Ès ou ka pansé Jézi té pé fè an bagay pou fòsé sé pwofési-a réyalizé ?
-
Kisa sa ka montré nou asou Jézi ?
6. Sa potalan bien konnèt Jézi
Labib ka di sa enpòwtan konnèt Jézi, épi konnèt wòl-la Bondié ba’y la. Li Jan 14:6 épi 17:3, épi diskité kèsion-tala :
-
Poutji sa endispansab konnèt Jézi ?
Jézi ouvè chimen-an pou vini zanmi épi Bondié. I ansénié lavérité asou Jéova. É gras a li, nou pé ni lavi étèrnèl.
NI MOUN KA DI : « Témwen Jéova pa ka kwè an Jézi. »
-
Sa’w té ké réponn ?
SA’W APRANN
Jézi sé an lèspri. I sé Yich Bondié, épi sé li ki Mési-a.
An ti viré gadé
-
Poutji yo ka kriyé Jézi « prèmié kréyati adan tout lakréyasion ? »
-
Koté Jézi té yé avan i vini anlè latè ?
-
Koumanniè nou sav sé Jézi ki Mési-a ?
TIBREN PLIS ANKÒ
Aprann plis asou manniè nou sav sé Jézi ki Mési-a.
« Ès sé pwofési mésianik-la té ka prouvé sé té bien Jézi Mési-a ? » (awtik jw.org)
Labib-la pa ka di Bondié vini papa Jézi menm manniè ki moun ka ni yich.
Poutji nou ka di Labib pa ka ansénié Latrinité ?
Lavi an fanm boulvèsé apré i étidié sa Labib ka di asou Jézi.
« Une femme juive explique pourquoi elle a remis sa foi en question » (Réveillez-vous !, mé 2013)
Tibren plis ankò
KÈSION KA RIVINI
Ki manniè an létid Labib ka pasé épi Témwen Jéova ?
Pandan létid Labib-la ou ka fè épi sé Témwen Jéova-a, ou pé sèvi pwòp labib-ou é ou pé vini épi fanmi’w ouben zanmi’w. Sé an diskision é sa gratui.
