Jéova sé an Bondié ki ni lòd adan zafè’y (1 Korentjen 14:33). Kidonk sa ka parèt lojik moun ki ka sèvi’y òwganizé tou. Ki manniè lasanblé-a òwganizé ? É kisa chak moun pou fè pou i rété òwganizé ?

1. Ki moun ki chèf lasanblé-a ?

« Kris-la sé chèf lasanblé-a » (Éfézien 5:23). Dépi sièl-la, i ka dirijé aktivité sèvitè Jéova adan lèmonn antié. Jézi mété doubout « lèsklav fidèl é prévwayan », an ti gwoup ansien ki ni lèspérians. Yo ka kriyé yo osi « Komité santral » (li Matié 24:45-47). Komité santral-la ka fè kon sé apòt-la épi sé zansien Jérizalèm-lan pandan 1^ié sièk-la, yo ka ba sé lasanblé-a asou tout latè enstriksion pou yo suiv (Akt 15:2). Men sé pa pou sa sé yo ki chèf lòwganizasion-nou. Yo ka chèché dirèksion Jéova épi Pawòl-li, é yo ka soumèt kòyo anba lotorité Jézi.

2. Ki wòl sé ansien-an ?

Sé ansien-an sé dé krétjen ki ni lèspérians. Yo ka apiyé asou Labib pou ansénié, endé épi ankourajé tout moun adan lasanblé-a. Yo pa ka ba yo lajan pou fè tousa. Sa yo ka fè ba lasanblé-a yo ka fè’y « épi bon tjè douvan Bondié ; pa pou genyen an bagay malonnèt, men san trennen » (1 Piè 5:1, 2). I ni dé frè yo ka kriyé asistan. Yo ka endé sé ansien-an. Sé asistan-an yo menm pé vini ansien apré.

Komité santral-la ka mandé sèten ansien vini rèsponsab siwkonskripsion. Sé rèsponsab siwkonskripsion-an ka vizité pliziè lasanblé pou endé sé frè é sè-a tjenbé doubout épi transmèt yo enstriksion. Sé yo ka chwazi sé ansien-an épi sé asistan-an dapré konsèy Labib ka ba (1 Timoté 3:1-10, 12 ; Tit 1:5-9).

3. Ki wòl chak Témwen Jéova ?

Tout moun adan lasanblé-a ka « gloriyé non Jéova ». Yo ka fè sa, lè yo ka fè koumantè, sijé ouben démonstraksion, lè yo ka chanté pandan sé réyinion-an épi préché tout tan yo pé (li Sòm 148:12, 13).

 ANNOU PLI LWEN

4. Jézi sé an bon chèf

Jézi ka fè nou an envitasion nou pé pa rifizé. Li Matié 11:28-30 épi diskité kèsion-tala :

• Koumanniè ou ka santi kòw lè ou ni an kalté chèf kon Jézi ?

5. Sé ansien-an ka ba lèkzanp

1. Sé ansien-an ka rété toupré Jéova épi yo ka endé fanmi-yo fè menm bagay-la.

2. Sé ansien-an ka sousié kòyo di chak moun adan lasanblé-a.

3. Sé ansien-an ka préché régilièrman.

4. Sé ansien-an ka fè diskou, men yo ka partisipé tou adan nétwayaj sal Wayòm-lan épi dòt bagay ankò.

 6. Sé ansien-an bizwen nou

Labib ka èsplitjé poutji fòk soutni désizion sé ansien-an ka pran. Li Ébré 13:17 épi diskité sé kèsion-tala :

• Labib-la ka mandé nou kouté épi soumèt kònou douvan sé nonm-lan ka dirijé nou. Ès ou ka touvé sa rézonnab ? Poutji ?

Li Lik 16:10 épi diskité kèsion-tala :

• Poutji sa enpòwtan travay kantékant épi sé ansien-an, menm si, sa yo ka mandé’w la ka sanm ti zafè ?

 SA’W APRANN

Jézi sé chèf lasanblé-a. Sé ansien-an anba lotorité’y. Kon sé ansien-an ka ankourajé nou, épi ba nou lèkzanp, nou ka travay kantékant épi yo épi tout tjè-nou.

An ti viré gadé

• Ki moun ki chèf lasanblé-a ?

• Ki wòl sé ansien-an ?

• Ki wòl chak Témwen Jéova ?