LISON 22

Ki manniè ou pé partajé bon nouvèl-la épi lézòt ?

KOUTÉ AN

Pli ou ka étidié sé vérité biblik-la, pli ou dwèt ka di kòw : « Tout moun té pou sav sa ! » Sa vré, tout moun bizwen konnèt sé vérité-tala. Men pétèt ou tibren pè palé épi lézòt di sa ou ka aprann. Annou wè koumanniè ou pé toufé lapè-tala é touvé lajwa préché bon nouvèl-la.

1. Ki manniè ou pé palé di sa ou ka aprann épi moun ou konnèt ?

Disip Jézi di : « Nou pé pa sispann palé asou sa nou wè épi tann » (Akt 4:20). Balan yo té enmen lavérité, yo té lé palé ba tout moun ! Ès ou ka risanti menm bagay-la ? Si sé wi, chèché dé ti lòkazion palé ba lafanmi’w épi zanmi’w di sa ou ka aprann, men fè’y épi rèspé (li Kolosien 4:6).

Mi yonn-dé lidé pou koumansé

Épi lafanmi’w, ou pé koumansé palé di an sijé biblik konsa : « Mésié ! Man aprann an bagay entérésan simenn-tala. »
Li an vèsé ankourajan ba an zanmi ki malad ouben entjèt.
Lè an kolèg travay ka mandé’w sa ou fè wikenn-tala, palé di sa ou aprann pandan létid Labib-ou ouben pandan réyinion-an.
Montré zanmi’w sit-la jw.org.
Envité dòt moun adan létid Labib-ou ouben montré yo koumanniè fè an dimann pou étidié asou jw.org.

2. Poutji préché épi lasanblé-a sé an bon òbjèktif pou ni ?

Sé pa yenki ba moun yo té konnèt sé disip Jézi-a té ka palé di bon nouvèl-la. Jézi « vréyé yo dé pa dé adan tout vil » (Lik 10:1). Davwè prédikasion-an té òwganizé, sa pèwmèt plis moun ankò tann bon nouvèl-la. Anplis, sé disip Jézi-a té kontan toubonnman préché ansanm-ansanm (Lik 10:17). Ès ou pé ni lòbjèktif préché épi lasanblé-a ?

ANNOU PLI LWEN

Annou wè koumanniè ou pé toufé èstrès-ou di palé ba moun é pran plézi fè konnèt bon nouvèl-la.

3. Jéova kèy la épi’w

Ni moun ki anvi préché, men yo pè sa moun kèy pansé ouben manniè yo kèy réyaji.

Lè’w ka sonjé fòk ou palé di sa ou ka aprann, ès ou ni latranblad ? Poutji ?

Gadé VIDÉWO-a épi diskité kèsion-an ka vini an.

VIDÉWO : Man prédié Jéova pou pran kouraj (4:05)

Ki manniè sé jenn Témwen-an rivé préché magré yo té pè ?

Li Izayi 41:10 épi diskité kèsion-tala :

Si ou pè préché, ki manniè lapriyè kèy endé’w ?

Ès ou té sav sa ?

Avan yo koumansé préché, ni anlo Témwen Jéova ki té ka pansé yo pa té kéy jenmen rivé fè sa. Sé sa ki rivé Sergey. I té ni lenprésion i pa té vo ayen é sa té difisil ba’y palé épi lézòt. I ka di konsa : « Menm si man té pè, man koumansé palé ba moun man konnèt di sa mwen té ka aprann adan Labib. Man rété ababa, lè man wè sa riba mwen konfians é sa rann lafwa-mwen pli fò. »

4. Palé épi anpil rèspé

Avan ou préché, fòk ou réfléchi asou sa ou kèy di. Men sa enpòwtan tou, ou réfléchi asou manniè ou kèy palé épi rèspé. Li 2 Timoté 2:24 épi 1 Piè 3:15, épi diskité sé kèsion-tala :

Lè ou ka préché ba moun, ki manniè ou pé aplitjé sé vèsé-tala ?
Pétèt lafanmi’w ouben zanmi’w pa kay dakò épi’w. Kisa fòk ou fè ? Kisa fòk pa ou fè ?
Poutji sa méyè palé épi rèspé plito ki fòsé moun kwè’w ?

5. Préché ka ba tjè kontan

Jéova mandé Jézi préché bon nouvèl-la. Ki manniè Jézi té ka wè travay-tala ? Li Jan 4:34 épi diskité sé kèsion-tala :

Manjé bon manjé sé an bagay ki nésésè pou lavi-nou é sa ka rann nou éré. Poutji Jézi di ki fè volonté Bondié, kontèl préché, sé kon manjé ba’y ?
Poutji préché bon nouvèl-la pé rann nou éré ?

Mi an ti lidé

Pandan réyinion simenn-lan, matjé yonn-dé lidé ki kéy endé’w koumansé bokantaj-pawòl.
Koumansé katjilé pou wè si ou pé enskri kòw pou fè sijé pandan réyinion lasimenn-lan. Sé sijé-tala kèy endé’w ni plis lasirans pou palé épi lézòt di sa ou ka aprann.
Sèvi sé pati-a « Ni moun ka di » é « An moun sé pé mandé’w » pou aprann réponn kèsion ouben pawòl ki pé frennen’w.

AN MOUN SÉ PÉ MANDÉ’W : « Alò, ki nouvèl ? »