LISON 24

Lavérité anlè lé zanj

KOUTÉ AN

Jéova ni an fanmi an sièl-la, é i lé nou aprann konnèt li. Adan fanmi-tala, i ni sé zanj-lan. Labib-la ka kriyé yo « yich Bondié » (Jòb 38:7). Kisa nou ka aprann asou sé zanj-lan adan Labib-la ? Ki lenfliyans yo ni anlè nou ? Ès yo tout rété adan fanmi Bondié ?

1. Sé zanj-lan, sé ki moun ?

Jéova kréyé sé zanj-lan lontan avan i fè latè. Kon Jéova, yo sé dé lèspri envizib ka viv an sièl-la (Ébré 1:14). I ni milion zanj, é yo chak la inik (Révélasion 5:11). Yo ka ‘kouté vwa Jéova épi obéyi pawòl-li’ (Sòm 103:20). I ni lontan di sa, Jéova té ni lokazion vréyé zanj-li pou transmèt sèvitè’y mésaj ouben pòté yo soukou. Jòdi-jou, sé zanj-lan ka djidé sé disip Jézi-a obò moun ka chèché konnèt Bondié.

2. Satan épi sé démon-an, ki moun yo yé ?

I ni zanj ki pa rété fidèl a Jéova. Prèmié zanj-lan ki ribélé kòy sé « tala yo ka kriyé Djab épi Satan, ki ka garé tout moun asou latè » (Révélasion 12:9). Kon i té lé vini chèf, Satan koumansé pa mennen Adan épi Èv a dézobéyi Jéova. Épi apré, i ni zanj ki suiv li adan ribélion’y. Yo ka kriyé sé zanj ribèl-tala « démon ». Jéova fè yo pran lavòl an sièl-la. Atjèlman, yo alantou latè-a é lafen-yo toupré rivé. (li Révélasion 12:9, 12).

3. Koumanniè Satan épi sé démon-an ka kouyonnen lézòm ?

Satan épi sé démon-an ka garé anlo moun épi divès pratik ki ni rapò épi mové zèspri. Anlo moun ki ka fè sé bagay-tala pa sav yo ni afè épi démon. Pa ègzanp, anlo moun ka gadé lowòskòp-yo ouben yo ka alé wè tjenbwazè, gadè-d-zafè ouben séansié. I ni dòt ka sèvi métòd ki ni rapò épi mové zèspri pou djéri maladi-yo. Épi i ni dòt ankò ki ka kwè yo pé palé épi moun mò. Men mi lòd-la Jéova ka ba nou : « Pa alé wè moun ki ka entéwojé moun mò, é pa alé wè divinè » (Lévitik 19:31). I ka ba nou avètisman-tala pou pwotéjé nou. Satan épi sé démon-an sé lènmi Bondié, é yo ka chèché fè nou ditò.

ANNOU PLI LWEN

Annou palé asou wòl sé zanj-lan adan travay prédikasion-an, di danjé tout pratik ki an rapò épi mové zèspri épi sa nou pé fè pou pwotéjé kònou di Satan épi sé démon-an.

4. Sé zanj-lan ka endé moun ki lé aprann konnèt Jéova

Sé zanj-lan pa ka préché yo menm, men yo ka endé moun ka préché, pou yo sa touvé sé moun-lan ki lé konnèt Bondié. Li Révélasion 14:6, 7 épi diskité sé kèsion-tala :

Poutji nou bizwen sé zanj-lan endé nou lè nou ka préché ?
Sé zanj-lan pé endé nou jwenn moun ki bizwen konnèt mésaj Labib-la. Ès ou ka touvé sa ankourajan ? Poutji ?

5. Rijété tout pratik ki ni rapò épi mové zèspri

Satan épi sé démon-an sé lènmi Jéova. Kidonk, yo sé lènmi-nou tou. Li Lik 9:38-42 épi diskité kèsion-tala :

Kisa sé démon-an ka fè lézòm ?

Nou pa lé sé démon-an ni an lenfliyans anlè nou. Li Détéwonòm 18:10-12 épi diskité sé kèsion-tala :

Kisa sé démon-an ka sèvi pou kominiké épi nou ouben pou ni an lenfliyans anlè nou ? É isiya, kisa sé moun-lan ka fè ki ni rapò épi mové zèspri ?
Jéova ka entèwdi tout pratik ki ni rapò épi mové zèspri. Dapré’w ès sa rézonnab ?

Gadé VIDÉWO-a épi diskité sé kèsion-an ka vini an.

VIDÉWO : « Opozé kòw a Djab-la » (5:02)

Ès ou ka pansé ti braslé-a ki té ka pwotéjé bébé Palesa-a té lakòz pwoblèm-li ? Poutji ?
Kisa Palesa té oblijé fè pou pwotéjé kòy di sé démon-an ?

Sé vré krétjen-an ka toujou opozé kòyo a sé démon-an. Li Akt 19:19 épi 1 Korentjen 10:21, épi diskité kèsion-tala :

Poutji sa enpòwtan détwi tout bagay ou sé pé ni, ki ni rapò épi mové zèspri ?

6. Genyen konba-a kont Satan épi sé démon-an

Chèf sé démon-an sé Satan. Men chèf sé zanj fidèl-la sé larkanj Michèl, sa lé di Jézi. Ès larkanj Michèl puisan ? Li Révélasion 12:7-9 épi diskité sé kèsion-tala :