LISON 28
Montré rikonésans-ou pou sa Jéova épi Jézi fè ba’w
Kisa sa ka fè nou lè an zanmi ka fè nou an bèl kado ? Balan nou kontan nou ka anvi montré’y rikonésans-nou. Nou wè Jéova épi Jézi fè nou pli bèl kado ki sé pé ègzisté : ranson-an. Ki manniè nou pé di yo mèsi ?
1. Kouman nou pé montré rikonésans-nou pou sa Bondié èk Kris fè ba nou ?
Labib-la ka pwonmèt lavi étèrnèl ba « tout moun ki ka montré lafwa adan [Jézi] » (Jan 3:16). Men montré lafwa, sa sa vé di ? Sé pa sèlman kwè an Jézi. An moun ka montré i ni lafwa dapré sa i ka fè épi désizion i ka pran (Jak 2:17). Lanmitié-nou épi Jézi èk Papa’y Jéova ka vini pli fò lè nou ka kité lafwa-nou djidé aksion-nou épi sa nou ka di (li Jan 14:21).
2. Ki lévènman ka pèwmèt nou montré rikonésans-nou pou sa Jéova épi Jézi fè ?
Jézi ba an lòt manniè montré rikonésans-nou, pou sakrifis-la i fè pandan dènié lannuit-la i pasé épi sé disip-li a. I fè an sérémoni Labib ka kriyé « Ripa Senyè-a », yo ka kriyé’y tou « Mémoriyal lanmò Kris-la » (1 Korentjen 11:20). Sérémoni-tala té kéy endé sé apòt Jézi-a épi tout sé vré krétjen-an sonjé i ba lavi’y ba lézòm. Jou oswè-tala, Jézi di konsa : « Kontinié fè sa pou montré zòt ka sonjé mwen » (Lik 22:19). Vini adan Mémoriyal-la, sé montré tout rikonésans-ou pou bidim lanmou-a Jéova épi Jézi montré ba nou.
ANNOU PLI LWEN
Annou wè dòt manniè pou montré Jéova épi Jézi rikonésans-nou. Épi annou ba plis détay anlè sérémoni Mémoriyal-la.
3. Rikonésans ka fè’w aji
Imajinen ou la ka nenyen épi an moun vini sové’w. Janmen ou pa té kéy oubliyé sa moun-tala fè ba’w, pa vré ? Ou jik té kéy chèché an manniè, kisiswa manniè-a, pou di’y mèsi pas i sové lavi’w.
Jéova sové lavi-nou lè i ba Fis-li an sakrifis. Li 1 Jan 4:8-10 épi diskité sé kèsion-tala :
-
Poutji sakrifis Jézi sé an kado èstwòdinè ?
-
Lè’w ka katjilé anlè sa Jéova épi Jézi fè ba’w, kisa ou ka risanti ?
Ki divès manniè nou pé sèvi pou di Jéova épi Jézi mèsi ba ranson-an ? Li 2 Korentjen 5:15 épi 1 Jan 4:11 ; 5:3. Apré lèkti chak vèsé, diskité kèsion-tala :
-
Ki manniè nou pé montré rikonésans-nou ?
4. Imité Jézi sa enpòwtan menm
Suiv èkzanp-lan Jézi kité ba nou sé an lòt manniè nou ni pou montré rikonésans-nou pou ranson-an. Li 1 Piè 2:21 épi diskité kèsion-tala :
-
Ki manniè nou pé suiv lèkzanp Jézi alatras ?
Jézi té enmen Pawòl Bondié, i té ka préché bon nouvèl-la épi i té ka endé sé moun-lan.
5. Vini Mémoriyal sa enpòwtan menm
Pou sav ki manniè Ripa Senyè-a pasé, li Lik 22:14, 19, 20. Apré diskité sé kèsion-tala :
-
Ki manniè yo fè Ripa Senyè-a ?
-
Kisa pen-an épi diven-an ka riprézanté ? (gadé vèsé 19 épi 20).
Jézi té lé sé disip-li a konmémoré Ripa Senyè-a an sèl fwa adan lanné-a, jou lannivèrsè lanmò’y. Kidonk, chak lanné sé Témwen Jéova-a ka sanblé pou sonjé lanmò Kris. Réyinion enpòwtan-tala ka fèt silon modèl-la Jézi kité ba nou. Pou sav plis anlè sa, gadé VIDÉWO-a. Apré diskité kèsion-an ka vini an.
-
Ki manniè Mémoriyal-la ka fèt ?
Pen-an épi diven-an, sé dé senbòl ki la. Pen-an ka riprézanté kò pawfé Jézi, é diven-an ka riprézanté san’y.
SA’W APRANN
Montré lafwa an Jézi épi vini o Mémoriyal ka pèwmèt nou èsprimen rikonésans-nou pou sa i fè.
An ti viré gadé
-
Kisa sa lé di montré lafwa an Jézi ?
-
É wou menm, ki manniè ou té ké montré rikonésans-ou pou sa Jéova épi Jézi fè ba’w ?
-
Poutji sa enpòwtan vini o Mémoriyal ?
TIBREN PLIS ANKÒ
Kisa lanmò Kris ka pousé nou fè ?
Lafwa sé kisa, é sa sa vé di « montré lafwa » ?
« Exerce ta foi dans les promesses de Jéhovah » (La Tour de Garde, òktòb 2016)
Réfléchi asou ranson-an endé an fanm wè kòy an lòt manniè (pòtré « Je me sens pure et j’aime la vie »).
« La Bible transforme des vies » (La Tour de Garde, 1ié out 2011)
Asou milion moun ki ka vini Mémoriyal, sé an ti ponyen sèlman ki ka manjé pen-an épi bwè diven-an. Poutji ?