Ès ou ja pèd an moun ou enmen ? Lè sa ka rivé, anpil moun ka mandé kòyo : « Kisa ka fèt apré lanmò ? Ès an jou man kèy viré wè’y ? » Adan lison-tala é tala ka vini apré-a, ou kéy dékouvè répons Labib-la ki ka ba nou lèspwa.

1. Kisa ka fèt lè an moun ka mò ?

Jézi di lanmò sé kon an moun ki ka dòmi an gwo dòmi. Ki rilasion ki ni ant lanmò épi dòmi ? An moun ki ka dòmi an gwo dòmi pa sav sa ka fèt alantou’y. Menm parèy, an moun ki mò pa ka santi piès doulè, i pa ka soufè. Labib-la ka di : « Moun mò pa sav ayen » (li Éklézias 9:5).

2. Sav lavérité anlè lanmò, kisa sa ka pòté ba nou ?

I ni anpil moun ki pè lanmò ; i ni dòt, sé sé moun mò-a menm yo pè. Men, sa Labib-la ka di anlè lanmò ka trantjilizé nou. Jézi di : « Lavérité kay rann zòt lib » (Jan 8:32). Ni an patjé rèlijion ki ka di, nou ni an nanm imòwtèl ki ka kontinié viv apré lanmò. Men, sé pa sa Labib ka ansénié. Kon sé mò-a pa ni konsians ayen, yo pa ka soufè. Yo pé pa non pli fè nou ditò. Kidonk, sa pa ka sèvi ayen chèché kalmé yo, adoré yo oben prédié ba yo.

Ni moun ki ka prétann yo ka palé épi sé mò-a. Men sa pa posib ! Konm nou fini wè a, sé mò-a « pa sav ayen ». Men poutoudi, sé pa épi moun mò yo ka palé piès men sé épi démon. Sé démon-an ka fè wòl yo sé moun mò-a nou enmen an. Kifè, konnèt lavérité anlè lanmò ka pwotéjé nou di sé démon-an. Jéova sav ki antré an kontak épi démon sé an bagay ki danjéré, sé pou sa i ka mandé nou pa chèché palé épi moun mò (li Détéwonòm 18:10-12).

3. An ki léta moun mò yé ?

Oliwon latè, i ni divès kwayans anlè sa ki ka fèt apré lanmò. Men, nou pé pa kwè sé yo tout ki vré.

• Isiya, kisa moun ka kwè anlè lanmò ?

 4. Lavérité anlè lanmò ka libéré nou

Lè nou konnèt lavérité anlè lanmò, nou pa pè moun mò ankò. Li Éklézias 9:10 épi diskité kèsion-tala :

• Ès moun mò pé fè nou ditò ?

Gras a sa Labib ka aprann nou, nou pa ka kwè ankò fòk kalmé oben adoré sé mò-a. Li Izayi 8:19 épi Révélasion 4:11, épi diskité kèsion-tala :

• Dapré’w, koumanniè Jéova ka wè an moun ki ka adoré sé mò-a oben ki ka mandé yo endé’y ?

5. Sav lavérité anlè lanmò ka trantjilizé nou

Anlo moun aprann, apré lanmò, yo kéy pini yo palakòz mové aksion yo fè an lavi-yo. Mi soulajman sav ki pèsonn pa ka soufè apré lanmò, pa menm an moun ki fè anpil méchansté. Li Women 6:7 épi diskité kèsion-tala :

• Labib ka di lanmò ka libéré an moun anba péché. Kidonk, ès ou ka pansé sé mò-a ka soufè akòz di péché yo fè, lè yo té vivan ?

Plis nou ka aprann konnèt Jéova, sé plis nou ka asiré janmen i pé ké pèwmèt sé mò-a soufè. Li Détéwonòm 32:4 épi 1 Jan 4:8, épi diskité sé kèsion-tala :

• Sé vèsé-tala ka palé di kalité Bondié ni. Lè’w ka katjilé anlè sa, ès ou pé imajinen Bondié ka fè sé mò-a soufè ?

• Ès sav lavérité anlè lanmò ka trantjilizé’w ? Poutji ?

 SA’W APRANN

Lè an moun ka mò, lavi’y bout. Lé mò-a pa ka soufè é yo pé pa fè lé vivan méchansté.

An ti viré gadé

• Kisa ka pasé lè an moun ka mò ?

• Sav lavérité anlè lanmò, di kisa sa ka libéré nou ?

• Poutji sav lavérité anlè lanmò ka trantjilizé nou ?