Lè nou ka pèd an moun, latristès ka anvayi nou. Labib-la ka di lanmò sé an lènmi (1 Korentjen 15:26). Adan lison 27-la, nou wè Jéova kèy fè’y disparèt. Men, ès i kay fè an bagay ba sé moun-lan ki ja mò ? Adan lison-tala, ou kèy aprann plis asou bèl pwonmès-la Jéova fè. I pwonmèt résisité milia moun. Yo osi, yo kèy ni laposibilité viv pou toujou ! Men, ès sa kèy fèt pou toulbon ? É ki koté yo kèy résisité, an sièl-la oben anlè latè ?

1. Kisa Jéova lé fè ba fanmi-nou épi zanmi-nou nou pèd ?

Jéova présé menm résisité sé moun-lan ki mò. Jòb, an nonm ki té ni an gwo lafwa, té ni lasirans Bondié pa té kèy oubliyé’y lè i té kèy mò. I di Bondié : « Ou ké kriyé mwen, é man ké réponn ou [an fon tonm-lan] » (li Jòb 14:13-15).

2. Ki manniè nou sav moun mò pé riviv ?

Lè Jézi té anlè latè, Bondié ba’y pouvwa résisité moun mò. Jézi résisité an tifi ki té ni douzan épi ti-gason an vèv (Mak 5:41, 42 ; Lik 7:12-15). Apré sa, Laza, an zanmi’y mò. Menm si sa té ja ka fè 4 jou Laza té mò épi téré, Jézi résisité’y. Jézi prédié Bondié, i gadé tonm-lan épi i anni kriyé : « Laza, sòti déwò ! » Épi « Nonm-lan ki té mò-a anni sòti », i té vivan ! (Jan 11:43, 44). Ès ou pé imajinen manniè fanmi épi zanmi Laza dwèt té kontan !

3. Ki lèspwa ki ni pou fanmi-nou épi zanmi-nou nou pèd ?

Labib-la ka pwonmèt : « I kèy ni an rézirèksion » (Akt 24:15). Sé moun-lan Jézi résisité té bien kontan viré viv anlè latè. Sé pas lè yo mò yo pa té an sièl-la (Jan 3:13). Menm manniè-a, talè Jézi kay résisisté milia moun asou latè, pou yo viv pou toujou adan an paradi. I di « tout moun ki adan sé tonm-lan », menm sé moun-lan nou pa ka sonjé mé ki an mémwè Bondié kay résisité (Jan 5:28, 29).

 ANNOU PLI LWEN

4. Jézi ba laprèv i kapab résisité sé mò-a

Annou gadé pli pré sa Jézi fè ba zanmi’y Laza. Li Jan 11:14, 38-44 épi diskité sé kèsion-tala :

• Kisa ka pèwmèt nou di Laza té mò bon mò-a ? (gadé vèsé 39-la).

• Apré lanmò’y, si Laza té vréman monté an sièl, ès ou ka pansé Jézi té ké fòsé’y ritounen asou latè ?

Gadé VIDÉWO-a.

5. Milia moun kay résisité !

Li Sòm 37:29 épi diskité kèsion-tala :

• Ola sé moun-lan ki résisité kay viv ?

Sé pa sèlman sé moun-lan ki té ka adoré Jéova Jézi kay résisité. Li Akt 24:15 épi diskité kèsion-tala :

• Ki moun ki mò ou té kéy enmen riwè ?

• Ki manniè lèspérans larézirèksion konsolé épi ankourajé papa épi manman Phelicity ?

 SA’W APRANN

Labib ka pwonmèt milia moun mò kay résisité. Jéova lé yo riviv, é i ba Jézi pouvwa pou résisité yo.

An ti viré gadé

• Kisa ka pèwmèt nou di Jéova épi Jézi présé résisité sé mò-a ?

• Ki koté sé milia moun-lan ki kèy résisité kay viv, an sièl oben asou latè ? Poutji ou ka di sa ?

• Poutji ou asiré lafanmi épi zanmi ou pèd pé riviv ?