LISON 44
Ès tout fèt ka fè Bondié plézi ?
Jéova lé nou pwofité di lavi-a é i lé nou anmizé kònou. Men ès sé tout fèt ka fè’y plézi ? Koumanniè nou pé montré nou enmen Jéova adan zafè anmizman-an ?
1. Poutji anlo fèt pa ka fè Jéova plézi ?
Ou kay pétèt soté aprann i ni an patjé fèt ki payen oben ki pa annakò épi sa Labib ka di. Yonn-dé ni rapò épi mové zèspri oben nanm imòwtèl. Dòt ankò ni rapò épi lasipèstision oben kwayans adan lachans (Izayi 65:11). Kidonk nou ka konprann poutji Jéova ka ba adoratè’y avètisman-tala : « Pran ran-zòt [...] épi sispann menyen sa ki pa sen a » (2 Korentjen 6:17).
2. Kisa Jéova ka pansé di fèt ka pòté moun anlè ?
Jéova ka di nou sa danjéré lè « an moun [...] ka mété konfians-li an nonm kon’y menm » (li Jérémi 17:5). I ni fèt ka pòté anlè dé dirijan politik oben dé solda. Dòt fèt ka sélébré senbòl nasional kontèl drapo oben lendépandans an péyi (1 Jan 5:21). Dòt ankò ka ba mouvman sosial oben politik lonnè. I ni moun oben òwganizasion ki ka défann dé lidé ki pa annakò épi manniè wè Jéova. Kisa Jéova té kèy risanti si nou té ka ba yo an lonnè yo pa ni dwa ?
3. Ki konduit ki pé rann an fèt mové ?
Labib ka kondané « brè twòp alkòl, fè lafèt san mizi, soulézon » (1 Piè 4:3). I ni sèten fèt éti moun pa ka kontwolé kòyo oben ka ankourajé pratik sèksièl ki pa pwòp. Pou rété zanmi Jéova, fòk nou rété lwen tout sé bagay-tala ki pa pwòp.
ANNOU PLI LWEN
Annou wè koumanniè nou pé fè Jéova plézi parapòt a bon désizion nou ka pran asou fèt.
4. Rijété anmizman ki pa ka fè Jéova plézi
Li Éfézien 5:10 épi diskité sé kèsion-tala :
-
Avan ou désidé si ou ké alé adan an fèt, kisa ou pou analizé ?
-
Ki fèt moun ka sélébré la ou ka viv ?
-
Silon wou, ès sé fèt-tala ka fè Jéova plézi ?
Pa ègzanp, ès ou ja mandé kòw sa Bondié ka pansé di anivèrsè nésans ? Adan Labib, pa ni piès listwa éti an adoratè Jéova ka fété anivèrsè’y. Men, i ka rakonté anivèrsè 2 moun ki pa té ka adoré Jéova. Li Jénèz 40:20-22 épi Matié 14:6-10, épi diskité sé kèsion-tala :
-
Menm baay-la fèt adan sé 2 anivèrsè-tala. Kisa ?
-
Dapré’w, kisa sé listwa-tala ka aprann ou asou manniè Jéova ka wè sé anivèrsè-a ?
Men pétèt ou ka mandé kòw, ba Jéova, ès sa vréman grav partisipé adan an anivèrsè oben an lòt fèt ki pa annakò épi Labib ? Li Ègzòd 32:1-8. Apré gadé VIDÉWO-a épi diskité sé kèsion-an ka vini an.
-
Poutji sa enpòwtan bien gadé sa Jéova ka pansé di an fèt ?
-
Koumanniè nou pé fè sa ?
Ki manniè nou pé sav si an fèt ka fè Bondié plézi ?
-
Ès fèt-tala bazé asou lansèyman ki pa adan Labib ? Pou ni répons-lan, chèché koté i sòti.
-
Ès fèt-tala ka ba an moun, an òwganizasion oben an senbòl nasional kontèl drapo-a an lonnè yo pa mérité ? Sé Jéova prèmié nou ka onoré, é sé li sèlman nou ka fè konfians pou réglé pwoblèm monn-lan.
-
Ès fèt-tala ka ankourajé moun ni konpòwtasion Labib ka kondané ? Nou pou rété pwòp adan lèspri-nou épi aksion-nou.
5. Endé lézòt pou yo sa rèspèkté kwayans-ou
Sa pé rivé lantouraj-ou fè présion anlè’w pou partisipé adan an fèt ki pa ka fè Jéova plézi. Adan ka-tala, épi pasians épi rèspé èsplitjé désizion’w. Koumanniè ou pé rivé fè sa ? Pou ni an lidé, gadé VIDÉWO-a.
Li Matié 7:12 épi diskité sé kèsion-tala :
-
Dapré prensip-tala, ès sé wou ki pou désidé ba fanmi’w ki pa Témwen si yo pé sélébré an fèt ?
-
Koumanniè ou sé pé rasiré lafanmi’w épi endé yo konprann ki, menm si ou pa ka sélébré sèten fèt épi yo, ou enmen yo toujou ?
6. Jéova lé nou ni tjè kontan
Jéova lé nou pasé bon ti moman épi fanmi-nou é zanmi-nou. Li Éklézias 8:15 épi diskité kèsion-tala :
-
Ki manniè vèsé-tala ka montré nou Jéova lé nou ni tjè kontan ?
Jéova lé sèvitè’y anmizé kòyo épi pasé bon ti moman ansanm. Gadé VIDÉWO-a, ki ka montré sa an manniè klè lè nou ni sé lasanblé entènasional-nou an.
Li Galat 6:10 épi diskité sé kèsion-tala :
-
Ès ou oblijé partisipé adan fèt tout moun ka sélébré pou ‘fè moun dibien’ ?
-
Kisa ka ba’w plis tjè kontan : ofè an kado pas an fèt ka oblijé’w oben ofè an kado pas ou anvi fè sa ?
-
Anlo Témwen ka prévwè dé ti moman pou anmizé ba timanmay-yo é yo pa ka obliyé fè yo kado épi sirpriz. Si ou ni timanmay, ki manniè ou pé fè yo plézi ?
NI MOUN KA DI : « Kisiswa lorijin fèt-la, sa ki pli enpòwtan sé pasé an bon moman épi lafanmi épi zanmi. »
-
Sa ou té ké di ?
SA’W APRANN
Jéova lé nou pasé bon ti moman épi fanmi-nou é zanmi-nou. Men sa i lé tou, sé ki nou rijété anmizman ki pa ka fè’y plézi.
An ti viré gadé
-
Ki kèsion ki pé endé’w wè si an fèt ka fè Jéova plézi ?
-
Koumanniè nou pé èsplitjé lafanmi-nou épi zanmi-nou poutji nou pa ka sélébré an fèt ?
-
Koumanniè ou sav Jéova lé ou ni tjè kontan é ou anmizé kòw ?
TIBREN PLIS ANKÒ
Divès fèt krétjen pa ka sélébré.
« Poutji Témwen Jéova pa ka sélébré yonn-dé fèt ? » (awtik jw.org)
4 rézon ka montré poutji anivèrsè nésans pa ka fè Bondié plézi.
« Poutji Témwen Jéova pa ka fété anivèrsè nésans ? » (awtik jw.org)
Ki manniè an timanmay ki enmen Jéova pé fèʼy plézi lè yo ka envitéʼy adan an fèt ?
Milion krétjen chwazi pa fété Nwèl. Koumanniè yo ka santi kòyo parapòt a désizion-tala ?
« Ils ont trouvé mieux » (La Tour de Garde, 1ié désanm 2012)
Tibren plis ankò
KÈSION KA RIVINI
Ki manniè an létid Labib ka pasé épi Témwen Jéova ?
Pandan létid Labib-la ou ka fè épi sé Témwen Jéova-a, ou pé sèvi pwòp labib-ou é ou pé vini épi fanmi’w ouben zanmi’w. Sé an diskision é sa gratui.
