Jézi di sé disip-li a pa pou « mélanjé épi monn-lan » (Jan 15:19). Sa lé di yo ka rété apa adan zafè politik épi ladjè. Avrédi, sa pa toujou fasil rété apa. Akòz di sa, moun pé di bétiz anlè nou, oben mété nou alafèt. Ki manniè nou pé kontinié rété apa épi montré fidélité-nou ba Jéova ?

1. Koumanniè sé vré krétjen-an ka wè sé gouvènman-an ?

Sé Témwen Jéova-a ka rèspèkté sé gouvènman-an. Nou ka fè sa Jézi mandé lè i di fòk nou « viré ba Séza sa ki ta Séza », sétadi nou ka obéyi sé lwa péyi-a, kontèl péyé lenpo-nou (Mak 12:17). Labib-la ka èsplitjé sé gouvènman-an ka dirijé sèlman pas Jéova ka kité yo dirijé (Women 13:1). Kidonk sa ka pèwmèt nou konprann ki sé gouvènman-an ni mwens lotorité ki Bondié. Nou ni konfians Bondié èk wayòm-li kèy réglé pwoblèm limanité.

2. Kouman nou pé montré nou ka rété apa ?

Sé Témwen Jéova-a pa ka mélé adan zafè politik pas yo ka suiv lègzanp Jézi-a. An jou, lè sé moun-lan wè an mirak Jézi té fè, yo té lé mété’y wa, men i rifizé (Jan 6:15). Poutji ? An lòt jou i èsplitjé : « Wayòm-mwen pa adan monn-tala » (Jan 18:36). Jòdi-jou, an disip Kris ni pliziè manniè pou montré i ka rété apa : I pa ka fè ladjè (li Miché 4:3). I ka rèspèkté sé senbòl-la ka riprézanté an péyi, kontèl sé drapo-a, men i pa ka aji an manniè ki ka montré i ka adoré yo (1 Jan 5:21). É i pa ka pran ba piès kandida politik oben piès pati politik. Lè i ka fè tout sé bagay-tala épi dòt ankò, i ka montré fidélité’y ba an sèl gouvènman : wayòm Bondié-a.

 ANNOU PLI LWEN

3. Vré krétjen ka rété apa

Jézi épi sé disip-li a kité an lègzanp ba nou. Li Women 13:1, 5-7 épi 1 Piè 2:13, 14. Apré gadé VIDÉWO-a épi diskité sé kèsion-an ka vini an.

• Poutji nou dwé rèspèkté sé lotorité Péyi-a ?

• Ki manniè nou pé montré nou ka soumèt kònou anba sé lotorité-tala ?

Lè ni ladjè, ni péyi ki ka di yo pa ka pran ba pèsonn, men a bien gadé, sé sé dé kan-an yo ka endé. Men rété apa, kisa sa lé di poubon ? Li Jan 17:16. Apré gadé VIDÉWO-a épi diskité kèsion-an ka vini-an.

• Sa sa lé di rété apa ?

É si gouvènman ka mandé’w fè an bagay lalwa Bondié ka entèwdi ? Li Akt 5:28, 29. Apré gadé VIDÉWO-a épi diskité sé kèsion-an ka vini an.

• Si an lwa lézòm ka mandé nou fè an bagay lalwa Bondié ka entèwdi, kilès nou ké obéyi ?

• Adan ki sitiyasion an krétjen sé pé dézobéyi sé lotorité-a ?

 4. Rété apa kisiswa an lèspri-nou oben aksion-nou

Li 1 Jan 5:21. Apré gadé VIDÉWO-a épi diskité sé kèsion-an ka vini an.

• Poutji Ayenge rifizé soutni pati politik-la épi pran pa adan sérémoni patriyòt ?

• Ès ou ka pansé i pran an bon désizion ?

Adan ki sitiyasion ankò sa pé difisil rété apa ? Gadé VIDÉWO-a épi diskité sé kèsion-an ka vini an.

• Ki manniè nou pé rété apa lè i ni an konpétision entèwnasional ispò ?

• Ki manniè nou pé rété apa menm si gouvènman-an ka pran désizion ki ni an éfé anlè nou ?

• Ki éfé sa jounalis épi sa moun ki oliwon nou ka di, pé ni anlè manniè nou ka rété apa ?

 SA’W APRANN

Kisiswa an lèspri’y, adan sa i ka di oben sa i ka fè, an krétjen ka travay rèd pou i pa pran pa adan zafè politik.

An ti viré gadé

• Ki manniè nou dwé konpòté kònou épi sé gouvènman-an ?

• Poutji an krétjen pa ka mélé adan zafè politik ?

• Adan ki sitiyasion sa pa fasil rété apa ?