Moun ki fini mayé ni lèspwa, lajwa yo ni jou mariyaj-yo kèy diré tout tan. É sa posib ! Krétjen ki mayé dépi nanni-nannan épi ki fè tousa yo té pé pou aplitjé konsèy Labib-la sav sa.

1. Ki konsèy Labib ka ba sé mari-a ?

Jéova ba mari-a wòl chèf fanmiy-li (li Éfézien 5:23). Jéova lé ki mari-a pran désizion ka fè lafanmi’y dibien. Labib ka mandé sé mari-a : « Kontinié enmen madanm-zòt » (Éfézien 5:25). Sa sa lé di ? An mari ki enmen madanm-li janti épi’y ki lè yo tousèl ki lè i ni moun. I ka pwotéjé’y épi i ka fè tousa i pé pou ba’y tjè-kontan épi ba’y tousa i bizwen (1 Timoté 5:8). Épi, sa ki pli enpòwtan, i ka endé’y rété lianné épi Jéova (Matié 4:4). Pa èkzanp, i ka prédié épi li Labib épi madanm-li. An mari ka otjipé di madanm-li épi tandrès kay an tjè-koko épi Jéova (li 1 Piè 3:7).

2. Ki konsèy Labib ka ba sé madanm-lan ?

Pawòl Bondié ka di, madanm-lan « pou ni an gran rèspé ba mari’y » (Éfézien 5:33). Sa sa lé di ? I pé katjilé asou kalité mari’y ni épi éfò i ka fè pou pran swen di’y épi di sé tjanmay-la. I ka soutjenn désizion’y, i ka palé ba’y épi jantiyès épi i pa ka palé’y mal ba moun, menm si i pa ka adoré Jéova.

3. Koumanniè an nonm épi an madanm pé ba mariyaj-yo plis fòs ?

Labib-la ka di, an nonm épi an madanm ki ka mayé : « Tou lé dé ké divini an sèl lachè » (Matié 19:5). Sa lé di, fòk yo goumen kont tousa ka fébli lanmou-yo yonn pou lòt. Yo ka rivé fè sa lè yo ka pasé tan ansanm régilièrman, lè yo ka di sa yo ka pansé é risanti épi fwanchiz épi lanmou. Yo pa ka kité ayen ni pèsonn vini pli enpòwtan ki konjwen-yo, sòf Jéova. Yo ka prangad pou pa vini two pwòch an lòt moun.

 ANNOU PLI LWEN

4. Mari, enmen madanm-ou épi otjipé di’y

5. Madanm, enmen épi rèspèkté mari’w

Labib-la ka ankourajé an madanm rèspèkté mari’y, ki i ka sèvi ki i pa ka sèvi Jéova. Li 1 Piè 3:1, 2 épi diskité sé kèsion-tala :

• Si mari’w pa Témwen, ou ni lèspwa an jou i ké adoré Jéova. Dapré’w, kisa ki pé aji anlè’y ? Ki ou préché ba’y dri, ouben ki ou ni an bèl konduit épi rèspèkté’y ? Poutji ?

Souvantman, sa méyè ki an mari épi madanm-li tonbé dakò lè yo pou pran an désizion. Men  délè, an madanm pa dakò épi mari’y. Lè sé konsa, apré i di sa i ka pansé épi kalm épi rèspé, i kèy kité mari’y désidé sa ki méyè pou lafanmi, pas sé li Jéova ba rèsponsabilité-tala. Kidonk, madanm-lan kèy fè tousa i pé pou soutni désizion mari’y. Sé konsa i ka fè pa ta’y pou i ni lajwa adan kay-la. Li 1 Piè 3:3-5 épi diskité kèsion-tala :

• Kisa Jéova ka risanti lè an madanm ka rèspèkté mari’y ?

6. Rézoud pwoblèm mariyaj-ou

 SA’W APRANN

An mari épi madanm-li pé ni tjè-kontan si yonn enmen lòt, si yonn ka rèspèkté lòt épi si tou lé dé ka aplitjé sé prensip Labib-la.

An ti viré gadé

• Koumanniè an mari pé fè bonè madanm-li ?

• Koumanniè an madanm pé fè bonè mari’y ?

• Si ou mayé, ki prensip Labib ki kèy endé’w rann mariyaj-ou pli solid ?