LISON 51
Pawòl ki ka fè Jéova plézi
Lè Jéova kréyé nou, i fè nou an kado èstwòdinè : lapawòl. Ès manniè nou ka sèvi kado-tala enpòwtan ba’y ? Asiré-pa-pétèt (li Jak 1:26). Alò, ki manniè nou pé fè Jéova plézi lè nou ka palé ?
1. Ki manniè nou pé bien sèvi kado-a Jéova ba nou ?
Labib-la ka di : « Kontinié ankourajé épi endé kòzòt pou zòt vini pli fò » (1 Tésalonisien 5:11). Ès ou konnèt an moun ki krazé anba dékourajman ? Kisa ou pé fè pou ankourajé’y ? Ou pé di’y i ka konté ba’w. Pétèt ou pé di’y osi sa ou enmen kay-li. Ès ou ka sonjé an vèsé ki sé pé fè an moun dibien ? Dwèt ni anlo. Pa oubliyé, manniè ou ka palé osi enpòwtan ki sa ou ka di. Kidonk, toujou palé épi dousè èk jantiyès (Pwovèb 15:1).
2. Ki kalté pawòl an krétjen pa pou di ?
Labib-la ka di : « Fòk pa piès pawòl pouri sòti adan bouch-zòt » (li Éfézien 4:29). Sa lé di nou dwé évité di pawòl malélivé épi pawòl pou fè moun mal pa èspré. Nou ka évité osi palé anlè do moun pou fè yo mal épi manti anlè moun (li Pwovèb 16:28).
3. Ki manniè nou pé ni pawòl ka ankourajé ?
Souvantman, sa an moun ka di, sé sa i ka pansé épi risanti (Lik 6:45). Sé pou sa sa enpòwtan nou mété lèspri-nou anlè bagay pozitif, anlè bagay ‘ki jis, ki pwòp, ki mérité enmen, é ki mérité louwanj’ (Filipien 4:8). Pou rivé fè sa, sa enpòwtan bien chwazi anmizman-nou épi zanmi-nou (Pwovèb 13:20). Sa bon osi réfléchi avan palé, épi mandé kònou ki konsékans pawòl-nou ké ni anlè lézòt. Labib-la ka di : « Pawòl moun ka di san réfléchi kon kout kouto, men lang moun ki ni sajès ka djéri » (Pwovèb 12:18).
ANNOU PLI LWEN
Annou dékatiyé ki manniè nou pé palé an manniè ki ka fè Jéova plézi é ki ka ankourajé lézòt.
4. Annou tjenbé bouch-nou
Sa ka rivé nou tout di bagay nou ka rigrété apré (Jak 3:2). Li Galat 5:22, 23 épi diskité sé kèsion-tala :
-
Adan sé kalité-tala, kilès ou té ké mandé Jéova pou rivé tjenbé bouch-ou pli bien ? Adan ki sitiyasion ou sé pé sèvi kalité-tala ? Poutji ?
Li 1 Korentjen 15:33 épi diskité kèsion-tala :
-
Ki lenfliyans zanmi épi anmizman pé ni anlè manniè ou ka palé ?
Kisa ki pé ni an éfé anlè manniè nou ka palé ?
Li Éklézias 3:1, 7 épi diskité kèsion-tala :
-
Adan ki sitiyasion sa méyè pa palé, oben atann an pli bon moman pou palé ?
5. Di bon bagay anlè lézòt
Koumanniè évité di pawòl ki ka fè moun mal ouben ki pa janti ? Gadé VIDÉWO-a épi diskité sé kèsion-an ka vini an.
-
Kisa frè-a rimatjé ?
-
Kisa i fè pou chanjé ?
Li Éklézias 7:16 épi diskité kèsion-tala :
-
Lè nou lé di an bétiz anlè an moun, kisa fòk nou sonjé ?
Li Éklézias 7:21, 22 épi diskité kèsion-tala :
-
Si an moun ka di an bétiz anlè nou, ki manniè sé vèsé-tala kèy endé nou pa rété anlè sa ?
6. Palé ba fanmi’w épi bonté
Épi fanmi-nou, Jéova lé nou palé épi bonté èk jantiyès. Gadé VIDÉWO-a épi diskité kèsion-an ka vini an.
-
Kisa ki ké endé’w palé épi jantiyès ba lafanmi’w ?
Li Éfézien 4:31, 32 épi diskité kèsion-tala :
-
Ki kalté pawòl pé fè fanmi’w dibien ?
Jéova di sa i té ka risanti ba Fis-li, Jézi. Li Matié 17:5 épi diskité kèsion-tala :
-
Ki manniè ou pé imité Jéova lè ou ka palé épi lafanmi’w ?
Chèché lokazion pou félisité.
NI MOUN KA DI : « Mwen, man ka di sa man ka pansé, si lézòt pran sa mal, sa sé pwoblèm-yo. »
-
Ès ou dakò épi sa ? Poutji ?
SA’W APRANN
Pawòl-nou ni anlo éfé anlè lézòt. Sé pou sa nou dwé réfléchi anlè sa nou ka di, a ki moman nou ka di’y é manniè nou ka di’y.
An ti viré gadé
-
Ba yonn-dé manniè bien sèvi pawòl-nou.
-
Ki kalté pawòl ou bien désidé évité di ?
-
Kisa ki kay endé’w toujou ni pawòl janti èk ankourajan ?
TIBREN PLIS ANKÒ
3 konsèy pou rété pozitif.
Ki manniè arété jouré ?
Konsèy pou pa di bétiz anlè moun.
Ki manniè Jéova endé an nonm tjenbé bouch-li.
« J’ai sérieusement réfléchi à ce que je faisais de ma vie » (La Tour de Garde, 1ié out 2013)
Tibren plis ankò
KÈSION KA RIVINI
Ki manniè an létid Labib ka pasé épi Témwen Jéova ?
Pandan létid Labib-la ou ka fè épi sé Témwen Jéova-a, ou pé sèvi pwòp labib-ou é ou pé vini épi fanmi’w ouben zanmi’w. Sé an diskision é sa gratui.
