LISON 52

Poutji rad-nou épi laparans-nou enpòwtan ?

KOUTÉ AN

Chak moun enmen abiyé oben penyen an gou’y. Nou pé chwazi sa nou anvi mété é fè Jéova plézi si nou ka suiv yonn-dé prensip Labib. Annou wè yonn-dé adan sé prensip-tala.

1. Ki prensip pé endé nou chwazi rad nou kèy mété anlè nou ?

Fòk nou « abiyé […] an manniè korèk, épi modèsti èk sajès », épi fòk nou gadé an laparans nikèl ka montré nou « lianné épi Bondié » (1 Timoté 2:9, 10). Annou wè sé prensip-la ki ni adan sé vèsé-tala : 1) Rad-nou pou « korèk ». Ès ou rimatjé adan sé réyinion-nou an, sèvitè Jéova enmen abiyé diféran manniè. Men rad-nou èk manniè nou ka penyen ka gloriyé Bondié-a nou ka adoré a. 2) « Modèsti » ka anpéché nou abiyé an manniè pwovokan oben an manniè ka fè moun gadé nou. 3) « Sajès » ka anpéché nou vini èsklav lanmòd. 4) Laparans-nou dwé toujou montré nou ‘lianné épi Bondié’, sa lé di nou ka adoré vré Bondié-a (1 Korentjen 10:31).

2. Ki éfé laparans-nou ni anlè sé frè é sè-nou an ?

Sa vré, nou ni dwa chwazi sa nou ké mété anlè nou, men fòk nou sonjé ki éfé laparans-nou kéy ni anlè lézòt. Nou ka fè éfò pou nou pa jennen pèsonn, é nou ka fè « sa ki bon ba pwochen-nou pou fè’y plézi, pou endé’y vini pli gran » (li Women 15:1, 2).

3. Ki manniè laparans-nou pé ba lézòt anvi adoré Jéova ?

Nou ka véyé nou toujou bien abiyé, men nou ka fè an éfò èspésial lè nou ka alé réyinion oben lè nou ka préché. Nou pa anvi, manniè nou abiyé anpéché sé moun-lan kouté mésaj-nou an. Okontrè, nou lé i rann vérité-a pli entérésan ankò é i « rann pli bèl lansèyman Bondié » (Tit 2:10).

ANNOU PLI LWEN

Annou wè sa nou pé fè pou rad-nou épi laparans-nou montré nou sé dé krétjen.

Laparans-nou pé montré si nou ka rèspèkté sé moun-lan ki ni lotorité. Menm si Jéova ka wè tjè-nou, laparans-nou dwé montré nou ka rèspèkté’y.

4. An bon laparans ka montré nou ni rèspé ba Jéova

Ki pli gran rézon nou ni di véyé anlè laparans-nou ? Li Sòm 47:2 épi diskité sé kèsion-tala :

Nou ka riprézanté Jéova. Ki éfé sa dwé ni anlè manniè nou ka abiyé kònou ?
Ès ou ka pansé sa enpòwtan sousié kònou di manniè nou ka abiyé lè nou ka alé réyinion, oben lè nou ka préché ? Poutji ou ka di sa ?

5. Prensip pou endé nou bien chwazi

Gadé VIDÉWO-a.

VIDÉWO : « Fè tout bagay pou gloriyé Bondié » (10:18)

Valè rad-nou, sé pa sa ki ka konté. Sa ki ka konté, sé ki rad-nou nikèl épi adapté a sa nou ka fè a. Li 1 Korentjen 10:24 épi 1 Timoté 2:9, 10. Apré, diskité anlè rézon ki ka pousé nou pa mété rad ki...

two koul oben débrayé.
senntré, transparan oben sèksi.

Menm si sé krétjen-an pa anba Lalwa mozayik ankò, i ka ba nou an ti lidé asou sa Jéova ka pansé. Li Détéwonòm 22:5 épi diskité kèsion-tala :

Poutji fòk pa nou abiyé oben nou penyen an manniè ki ka fè nonm sanm fanm, oben fanm sanm nonm ?

Li 1 Korentjen 10:32, 33 épi 1 Jan 2:15, 16, épi diskité sé kèsion-tala :

Poutji fòk nou véyé manniè nou ka abiyé pa rété antravè gòj vwazen-nou oben frè èk sè lasanblé-a ?
Ki kalté rad sé moun-lan ka mété é ki kalté èstil yo ni la ou ka rété a ?
Ès ou ka pansé, adan, ni èstil ki pa bon pou an krétjen ? Poutji ?

I ni an patjé èstil ki ka fè Jéova plézi.