LISON 54
« Lèsklav fidèl é prévwayan »
Jézi sé Chèf lasanblé sé krétjen-an (Éfézien 5:23). Jòdi, dépi sièl-la, Jézi ka sèvi « lèsklav fidèl é prévwayan » pou dirijé sé disip-li a ki asou latè (li Matié 24:45). Sé Jézi li menm ki chwazi « lèsklav »-tala. « Lèsklav »-tala ni an lotorité, men i ka rété « lèsklav » Kris-la é i ka sèvi sé frè Kris-la. « Lèsklav »-tala sé ki moun ? É koumanniè i ka otjipé di nou ?
1. « Lèsklav fidèl é prévwayan » sé ki moun ?
Jéova toujou sèvi an nonm ouben an ti gwoup nonm pou djidé pèp-li (Malaki 2:7 ; Ébré 1:1). Apré lanmò Jézi, sé té sé apòt-la épi sé ansien Jérizalèm-lan ki té ka dirijé lasanblé-a (Akt 15:2). Jòdi-a tou, sé an ti gwoup ansien, Komité santral sé Témwen Jéova-a, ka ba manjé èspiritièl-la, épi ka dirijé aktivité prédikasion-an. Gwoup-tala sé « lèsklav fidèl é prévwayan [Jézi] mété » (Matié 24:45a). Tout sé nonm-lan ki adan Komité santral-la sé krétjen Jéova chwézi épi lèspri sen’y. Yo ja kontan davwè yo ké jwenn Kris adan wayòm-li an sièl-la a lafen lavi-yo asou latè.
2. Manjé èspiritièl-la « lèsklav » ka ba nou sé kisa ?
Jézi di ki « lèsklav fidèl é prévwayan » kèy ba sé disip-li a « manjé-yo, bon lè-a » (Matié 24:45b). Lè nou ka manjé, sa ka ba nou fòs é sa ka endé nou rété anfòm. Menm manniè-a, nouriti èspiritièl-la, kivédi lansèyman Pawòl Bondié, ka ba nou lafòs nou bizwen pou rété fidèl a Jéova épi akonpli mision-an Jézi ba nou an (1 Timoté 4:6). Nou ka risivwè nouriti èspiritièl-tala lè nou ka alé adan sé réyinion-an épi adan sé gran sanblé-a, é lè nou ka li sé piblikasion-an, épi gadé sé vidéwo-a ki bazé asou Bib-la. Sé tout manjé èspiritièl-tala ki ka endé nou konprann volonté Bondié épi rann lanmitié-nou épi’y pli fò.
ANNOU PLI LWEN
Annou wè poutji nou bizwen « lèsklav fidèl é prévwayan ».
Komité santral-la ka ba manjé èspiritièl, an dirèksion épi ka endé tout Témwen Jéova asou latè.
3. Fòk pèp Jéova òwganizé
Anba dirèksion Jézi, Komité santral-la ka òwganizé tout aktivité sé Témwen Jéova-a. Sa ka sanm anpil sa sé prèmié krétjen-an té ka fè. Gadé VIDÉWO-a.
Li 1 Korentjen 14:33, 40 épi diskité kèsion-tala :
-
Koumanniè sé vèsé-tala ka montré Jéova lé sé Témwen’y lan òwganizé ?
4. Lèsklav fidèl é prévwayan ka òwganizé laprédikasion
Laprédikasion sé aktivité pli enpòwtan sé prèmié krétjen-an té ka fè. Li Akt 8:14, 25 épi diskité sé kèsion-tala :
-
Ki moun ki té ka dirijé prédikasion-an lakay sé prèmié krétjen-an ?
-
Lè sé lézòt apòt-la ba enstriksion, koumanniè Piè épi Jan réyaji ?
Laprédikasion sé aktivité pli enpòwtan Komité santral-la ka òwganizé. Gadé VIDÉWO-a.
Mak 13:10 épi diskité sé kèsion-tala :
Jézi di ki prédikasion-an té potalan menm. Li-
Poutji laprédikasion sitèlman enpòwtan ba Komité santral-la ?
-
Poutji fòk « lèsklav fidèl é prévwayan » òwganizé prédikasion-an asou tout latè-a ?
5. Lèsklav fidèl é prévwayan ka ba an dirèksion
Komité santral-la ka ba tout krétjen ki asou latè an dirèksion. Ki manniè i ka pran désizion’y ? Annou wè koumanniè komité santral sé prèmié krétjen-an té ka fè. Li Akt 15:1, 2 épi diskité sé kèsion-tala :
-
Asou kisa sé prèmié krétjen-an pa té tonbé dakò ?
-
Ki moun Pòl, Barnabé épi dòt alé wè pou touvé an solision ?
Li Akt 15:12-18, 23-29 épi diskité kèsion-tala :
Li Akt 15:30, 31 épi 16:4, 5, épi diskité sé kèsion-tala :
-
Koumanniè sé prèmié krétjen-an réyaji lè komité santral-la ba yo an dirèksion ?
-
Koumanniè Jéova béni lobéyisans-yo ?
Li 2 Timoté 3:16 épi Jak 1:5, épi diskité kèsion-tala :
-
Jòdi, kisa ka djidé Komité santral-la, lè i ka pran désizion ?
NI MOUN KA DI : « Si ou ka kouté Komité santral-la, sé ki ou ka suiv nonm. »
-
Kisa ki ka ba’w lasirans sé Jézi ka djidé Komité santral-la ?
SA’W APRANN
Komité santral-la sé « lèsklav fidèl é prévwayan ». Sé Jézi ki mété’y la. Sé li ka ba tout krétjen asou latè an dirèksion épi manjé èspiritièl.
An ti viré gadé
-
Ki moun ki mété « lèsklav fidèl é prévwayan » ?
-
Ki manniè Komité santral-la ka otjipé di nou ?
-
Ès ou ka kwè Komité santral-la sé « lèsklav fidèl é prévwayan » ?
TIBREN PLIS ANKÒ
Koumanniè Komité santral-la òwganizé.
« Komité santral sé Témwen Jéova-a sé kisa ? » (awtik jw.org)
Kisa Komité santral-la ka fè pou ba nou an manjé èspiritièl ki èkzak ?
Kisa sé nonm-lan ki adan Komité santral-la ka risanti parapòt a mision-an Jézi ba yo.
Ki manniè réyinion-nou épi gran sanblé-nou ka montré Jéova ka djidé Komité santral-la.