LISON 56
Toujou gadé linité lasanblé-a
Lè nou épi sé frè é sè-nou an, nou ka risanti menm bagay-la ki wa David : « Aaa ! Sé pa ti bèl sa bèl épi agréyab pou dé frè rété ansanm-ansanm ! » (Sòm 133:1). Sé pa aza ki ka fè si nou ini. Sé nou tout ki pou fè éfò pou gadé linité-nou an.
1. Kisa ki èstwòdinè épi pèp Bondié ?
Pétèt ou pé ké konprann ayen, si ou ka alé réyinion adan an lòt péyi, mé ou ké santi ou alèz kòw. Poutji ? Pas adan lèmonn antié sé sé menm piblikasion-an nou ka sèvi pou étidié Labib. É nou ni lanmou yonn pou lòt. Kisiswa koté-a nou ka rété, ‘nou tout la ka gloriyé non Jéova épi nou ka sèvi’y kantékant’ (Sofoni 3:9).
2. Kisa nou pé fè pou ankourajé linité ?
« Enmen kòzòt fò yonn a lòt épi tout tjè-zòt » (1 Piè 1:22). Ki manniè ou pé aplitjé konsèy-tala ? Pasé ou pété tèt-ou anlè défo lézòt, simié ou chèché kalité-yo. Pa rété yenki épi sé moun-lan ki enmen menm bagay ki’w, men pran tan pou konnèt frè é sè ki pa menm ras épi’w. Fè tousa ou pé pou mété tout préjijé a dèyè do’w (li 1 Piè 2:17).
3. Kisa ou kay fè si ou trapé an pwoblèm épi an frè ouben an sè ?
Sa vré nou ni linité, men nou pa pawfé. Sa ka rivé nou tout, désivwè lézòt ouben fè yo lapenn. Pawòl Bondié ka di nou : « Pa sispann [...] padonnen kòzòt yonn épi lòt bon tjè », é i ka di osi : « Toukon Jéova padonnen zòt bon tjè, zòt pou padonnen kòzòt bon tjè » (li Kolosien 3:13). Sé tout lè nou ka fè Jéova lapenn, é magré sa i ka padonnen nou. Kidonk, i ka atann nou fè menm bagay-la ba sé frè é sè-nou an. É si’w ka rann kòw kont ou fè an moun lapenn ? Fòk ou pran douvan pou viré mété lapé b ant zòt (li Matié 5:23, 24).
ANNOU PLI LWEN
Annou wè ki manniè nou pé ankourajé linité épi lapé adan lasanblé-a.
Kisa ou ké fè pou viré mété lapé ?
4. Mété préjijé asou koté
Nou lé enmen tout frè é sè-nou. Men sa pa toujou fasil asèpté moun ki pa kon nou. Kisa ki pé endé nou ? Li Akt 10:34, 35 épi diskité sé kèsion-tala :
-
Jéova ka asèpté ladorasion tout kalté moun. Sav sa, ki éfé sa dwé ni anlè manniè nou ka wè moun ki pa menm ras épi nou ?
-
Ki modèl préjijé sé moun-lan ni, la ou ka rété a ? Poutji fòk pa ou pansé menm manniè-a ?
Li 2 Korentjen 6:11-13 épi diskité kèsion-tala :
-
Dapré’w ki manniè ou pé vini pli pré frè é sè ki pa menm ras épi’w ?
5. Padonnen épi tout tjè’w épi fè lapé
Jéova ka padonnen nou épi tout tjè’y, menm si i pé ké janmen fè an bagay ki mérité nou padonnen’y. Li Sòm 86:5 épi diskité sé kèsion-tala :
-
Kisa vèsé-tala ka aprann nou anlè manniè Jéova ka padonnen ?
-
Poutji ou kontan pas Jéova ka padonnen’w ?
-
Adan ki sitiyasion sa pé rèd pou antann épi lézòt ?
Si nou lé rété adan linité épi sé frè é sè-nou an, ki manniè fòk nou imité Jéova ? Li Pwovèb 19:11 épi diskité kèsion-tala :
-
Lè an moun ka énèrvé’w, ouben ka fè’w lapenn, kisa ou sé pé fè pou kalmé sitiyasion-an ?
Gadé VIDÉWO-a épi diskité kèsion-an ka vini an.
Délè sé nou ka fè lézòt lapenn. A moman-tala, kisa fòk nou fè ?-
Ki manniè sè-a rivé fè lapé ?
6. Chèché sa ki bon kay sé frè é sè’w la
Lè nou ka aprann konnèt sé frè é sè-nou an, nou ka dékouvè bon koté-yo épi féblès-yo. Ki manniè nou pé rivé mété tèt-nou anlè bon koté-yo ? Gadé VIDÉWO-a épi diskité kèsion-an ka vini an.
-
Kisa ki kay endé’w wè kalité sé frè é sè’w la ?
Jéova, sé kalité-nou i ka gadé. Li 2 Kwonik 16:9a épi diskité kèsion-tala :
-
Sa’w ka risanti lè ou ka tann, Jéova, sé kalité-nou i ka gadé ?
Menm si an bag ki fèt épi dianman èk lò griji, i toujou ni anpil valè. Menm manniè-a, sé frè é sè-nou an pa pawfé, men yo ni valè an zié Jéova.
NI MOUN KA DI : « Man pa ka padonnen konsa, dann ! Fòk moun-lan mérité sa. »
-
Poutji fòk nou padonnen lézòt épi tout tjè-nou ?
SA’W APRANN
Ou ka ankourajé linité lasanblé-a, lè ou toujou paré pou padonnen épi lè ou ka montré ou enmen tout sé frè é sè’w la.
An ti viré gadé
-
Ki manniè ou pé mété préjijé dèyè do’w ?
-
Kisa ou ké fè si’w trapé pwoblèm épi an lòt krétjen ?
-
Poutji ou lé imité manniè Jéova ka padonnen lézòt ?
TIBREN PLIS ANKÒ
An ègzanp Jézi ba, ki pé endé nou pa jijé lézòt.
Ès fòk mandé padon, menm si dapré’w ou pa fè ayen ?
« Les excuses contribuent à la paix » (La Tour de Garde, 1ié novanm 2002)
Wè ki manniè dé nonm ki élivé adan an sosiété moun ki rasis touvé vré linité-a.
Johny épi Gideon : yo té lènmi avan, men atjèlman yo frè (6:42)
Ki manniè réglé pwoblèm avan yo mété lazizanni adan lasanblé-a ?
« Règle les désaccords avec amour » (La Tour de Garde, mé 2016)