An krétjen pa ka kité ayen ni pèsonn mété kòy ant li épi Jéova. Asiré sé sa ou lé tou. Fidélité’w ni anpil enpòwtans ba Jéova (li 1 Kwonik 28:9). Kisa ki pé anpéché’w rété fidèl a Jéova ? É kisa ki pé endé’w tjenbé ?

1. Koumanniè sèten moun ka éséyé fè nou viré do ba Jéova ?

I ni moun ki lé fè nou sispann sèvi Jéova. Sé pétèt moun ki abandonnen lavérité épi ka simen mansonj asou lòwganizasion Bondié. Lòbjèktif-yo sé krazé lafwa-nou. Sé moun-tala sé dé apòsta. I ni osi chèf adan rèlijion ki ka répann mansonj asou nou pou fè krétjen ki pa anlè gad-yo kité lavérité. Sa danjéré menm fè gran kozé épi sé moun-tala ki opozé a lavérité, oben li sa yo ka ékri adan liv-yo, blòg-yo, sit entèwnèt-yo oben gadé vidéwo yo fè, ètsétéra. Mi sa Jézi di asou moun ki lé krazé fidélité-nou : « Kité yo. Sé gid avèg ki la. É si an avèg ka mennen an lòt avèg, yo tou lé dé kèy tonbé adan an tou » (Matié 15:14).

É si nou ka aprann an bon zanmi-nou, ouben an moun adan fanmi-nou désidé i pa Témwen Jéova ankò ? Souvan sé an sitiyasion ki ka fè nou mal. Moun-tala pé menm di nou : « Sé Jéova ouben mwen. » Fòk nou bien désidé fè Jéova pasé an prèmié (Matié 10:37). É nou ka obéyi lòd-la di pa frékanté moun-tala ankò (li 1 Korentjen 5:11).

2. Ki manniè désizion nou ka pran ka montré fidélité-nou ?

Pas nou enmen Jéova, nou pa lé ni ayen a wè épi fo rèlijion-an. Sa valab ba travay-nou, aktivité-nou, men osi tout mouvman ouben asosiasion nou sé pé andidan’y. Lè i ka palé di « Gran Babilòn-lan », Jéova ka di nou : « Sòti andidan’y, pèp-mwen » (Révélasion 18:2, 4).

 ANNOU PLI LWEN

3. Prangad moun ki pa ka ansénié lavérité

Si nou ka tann an moun malpalé lòwganizasion Jéova, koumanniè nou pou réyaji ? Li Pwovèb 14:15 épi diskité kèsion-tala :

• Poutji fòk pa nou kwè tousa nou ka tann ?

Li 2 Jan 10 épi diskité sé kèsion-tala :

• Ki atitid nou pou ni épi sé apòsta-a ?

• Menm si nou pa ni piès kontak épi apòsta, ki manniè lidé-yo pé rivé an zorèy-nou ?

• Dapré’w kisa sa té kèy fè Jéova si nou té ka kouté moun ki ka malpalé’y, li, épi òwganizasion’y ?

4. Montré fidélité-nou lè an frè ka péché

Si nou dékouvè an moun adan lasanblé-a fè an péché grav, kisa nou pou fè ? Annou wè an vèsé adan Lalwa Bondié ba Izrayèl. Li Lévitik 5:1.

Silon prensip-tala, si nou sav an moun fè an péché ki grav, fòk nou di sé ansien-an sa. Men avan, sa té kèy bon pou nou ankourajé péchè-a di sé ansien-an sa li menm. Si i pa ka fè’y, fidélité-nou ba Jéova kèy pousé nou alé di sé ansien-an sa. Si nou fè sa, ki manniè sa ka montré fidélité-nou ba...

• Jéova ?

• moun-lan ki péché-a ?

• sanblé-a ?

 5. Sòti adan Gran Babilòn-lan

 SA’W APRANN

Pas nou fidèl a Jéova, nou pa ka frékanté moun ki viré do ba’y é nou ka rété lwen lwen, sé fo rèlijion-an.

An ti viré gadé

• Poutji fòk pa : ni gadé, ni li, ni kouté sa sé apòsta-a ka di ?

• Ki atitid nou épi moun ki désidé yo pa lé sèvi Jéova ankò ?

• Ki manniè an krétjen ka montré i viré do ba fo rèlijion-an ?