Nòt
1. Gran Babilòn-lan sé kisa ?
Poutji nou pé di « Gran Babilòn-lan » ka riprézanté tout fo rèlijion ? (Révélasion 17:5). Annou wè 3 répons asou sa :
-
Lenfliyans i ni adan monn-lan. Labib ka di Gran Babilòn-lan asiz anlè « pèp, foul-moun, nasion », é i « ni lanmen asou sé wa latè-a » (Révélasion 17:15, 18).
-
Sé pa an puisans politik oben an puisans ki ka fè konmès. Poudivré, « sé wa latè-a » é « sé vandè-a » toujou vivan apré dèstriksion’y (Révélasion 18:9, 15).
-
I ka dézonoré Bondié épi sa i ka fè. Labib ka di sé an « pwòstitié » pas i ka fè bokantaj lajan oben dòt bénéfis, épi i ka fè alians épi gouvènman (Révélasion 17:1, 2). I ka garé moun tout nasion. É i fè milion moun mò (Révélasion 18:23, 24).
2. Ki tan Mési-a té pou rivé ?
Labib-la té prédi, Mési-a té kèy rivé alafen an périòd tan 69 simenn (li Danièl 9:25).
-
Ki tan sé 69 simenn-lan koumansé ? An 455 avan Jézikri, lè gouvènè Néyémi rivé Jérizalèm pou rikonstwi vil-la (Danièl 9:25 ; Néyémi 2:1, 5-8).
-
Konben tan sé 69 simenn-tala diré ? Adan yonn-dé pwofési Labib, an jou ka riprézanté an lanné (Nonb 14:34 ; Ézékièl 4:6). An simenn ka riprézanté 7 lanné. Kidonk, sé 69 simenn-tala ka diré 483 lanné (69 x 7).
-
Ki tan sé 69 simenn-tala bout ? Si nou ka konté 483 lanné dépi lanné 455 avan Jézikri, nou ka tonbé adan lanné 29 apré Jézikri a. Sé lanné-tala menm Jézi pran batenm épi i divini Mési-a ! (Lik 3:1, 2, 21, 22).
3. Tèknik lamèdsin ki ka sèvi san-an
I ni tèknik lamèdsin ki ka sèvi san moun-lan ki malad. I ni adan ki pa bon piès pou an krétjen. Kontèl, an krétjen pa ka ba pwòp san’y, i pa ka asèpté non pli yo pran san’y épi mété’y asou koté avan an opérasion (Détéwonòm 15:23).
Men, an krétjen pé asèpté dòt tèknik, kontèl priz san, dializ san, rékipérasion san yo trété pandan an opérasion, oben sèvi an machin ki ka ranplasé tjè épi poumon. Chak krétjen pou désidé ki manniè i lé yo sèvi san’y pandan an opérasion, pandan an lègzamen médikal, oben pandan an trètman. Tout dòktè pa ka sèvi sé tèknik-tala menm manniè-a. Kidonk, avan asèpté an opérasion, an ègzamen médikal oben an trètman, an krétjen pou chèché sav ki manniè yo kèy sèvi san’y. Chak krétjen pou mandé kòy :
-
Si yo té ka détounen tibren san-mwen andéwò kò-mwen, épi si san-tala té séparé pandan an moman épi lèrèstan san-mwen, ès konsians-mwen té kèy pèwmèt mwen konsidéré san-tala toujou andidan mwen, é kidonk sa pa té nésésè ‘vidé’y atè’ ? (Détéwonòm 12:23, 24).
-
Si yo ka pran tibren san-mwen pou yo trété’y é pou rimété’y andidan kò-mwen apré, ès sa té kèy jennen konsians-mwen édiké épi prensip Labib ? Oben ès konsians-mwen té kèy pèwmèt mwen asèpté tèknik-tala ?
4. Laséparasion
Pawòl Bondié pa ka ankourajé dé moun mayé séparé kòyo, é i ka di an manniè klè laséparasion pa ka ba yo dwa viré mayé épi an lòt moun (1 Korentjen 7:10, 11). Men, adan yonn-dé ka, krétjen anvizajé séparé kòyo épi moun mayé-yo.
-
Fè èspré pa pran swen bizwen lafanmi : An mari ka rifizé achté sa lafanmi’y bizwen, tant-é-sibien yo pa ni ayen pou viv (1 Timoté 5:8).
-
Sibi violans fizik : Sé kou épi bobo. Konjwen-an yo ka bat ka jijé santé’y oben lavi’y an danjé (Galat 5:19-21).
-
Fè èspré mété lanmitié an krétjen épi Jéova an danjé : Aksion an konjwen ka fè, ka anpéché lòt la sèvi Jéova an manniè total (Akt 5:29).
5. Ki réyaksion pou ni adan sitiyasion ki ni an liannaj épi fèt ?
Krétjen pa ka fété fèt Jéova pa enmen. Men adan yonn-dé sitiyasion ki ni an liannaj épi sé fèt-tala, sé chak krétjen ki pou pran an désizion silon konsians-li édiké épi Labib. Mi yonn-dé ègzanp :
-
An moun ka di’w pasé an bon fèt. Ou pé jiskont di’y mèsi. Si moun-lan lé sav plis, ou pé èsplitjé’y poutji ou pa ka fété fèt-tala.
-
Konjwen’w, ki pa Témwen Jéova, ka di’w vini manjé épi lafanmi pou an fèt. Si konsians-ou ka pèwmèt ou alé adan fèt-tala, ou pé di konjwen’w, si pandan manjé-tala i ni tradision payen, ou pé ké partisipé.
-
Patwon’w ka ba’w lajan an plis pandan sé fèt fen lanné-a. Ès ou pou di non ? Pa oblijé. Si ou pran prim-lan ès patwon’w kèy konprann ou ka fété fèt-tala ? Ouben ès i ka ba’w prim-lan pou montré i kontan travay-ou ?
-
Pou an fèt, an moun ka ba’w an kado. Épi i ka di’w : « Man sav ou pa ka fété fèt-tala, men man lé ba’w kado-tala. » Pétèt moun-tala fè sa pas i janti. Men lè ou gadé, ès i ni dé bagay ka fè’w pansé i ka éséyé tèsté lafwa’w, ouben fè’w partisipé adan fèt-tala ? Lè ou fini katjilé asou sé kèsion-tala, ou pou désidé wou menm si ou ka pran kado-tala oben si ou pa ka pran’y. Chak lè-a nou lé pran an désizion, nou lé gadé an konsians pwòp é rété fidèl a Jéova (Akt 23:1).
6. Maladi atrapan
Pas i ni lanmou ba lézòt, an krétjen ka fè atansion pa transmèt maladi atrapan. Sa vré, si i malad pou toulbon, men osi, si i ni dé bagay ka fè’y pansé i ni andidan kò’y an maladi atrapan. Konsa, i ka obéyi lòd-la ki an Bib-la : « Ou pou enmen pwochen’w kon wou menm » (Women 13:8-10).
An réyalité, sa sa lé di ? An moun kontaminé pé ké chèché pran an lòt an bra’y, oben bo’y pou montré i ka aprésié’y. I pa kèy kontrayé si yonn-dé simié pa envité’y bò kay-yo pou pwotéjé fanmi-yo. Avan i pran batenm, i ké palé di sa épi kòrdinatè sanblé lokal-la. Sa kèy pèwmèt pran dispozision pou i pa kontaminé sé zòt moun-lan ka pran batenm. Avan menm i koumansé frékanté pou mayé, an moun ki té an kontak épi an maladi atrapan ké désidé dépisté kòy pou wè si i ni maladi-a. Konsa, i ké montré i pa ka chèché ‘yenki lentéré’y sèlman, men lentéré lézòt tou’ (Filipien 2:4).
7. Domenn lé-zafè épi jiridik
Nou ka évité bon pwoblèm lè nou ka matjé tout kontra lajan, menm si sé an kontra nou fè épi an lòt krétjen (Jérémi 32:9-12). Sa vré, sa pé rivé ki krétjen jwenn an ti pwoblèm asou lajan oben an lòt bagay. Yo pou kapab réglé pwoblèm-tala lamenm, ant yo é dan lapé.
Men kisa fòk fè adan dé sitiyasion pli danjéré kontèl lè an krétjen ka di vié pawòl pou fè’w mal, oben si i ka kouyonnen’w pou pran sa ki ta’w ? (li Matié 18:15-17). Jézi montré 3 létap pou suiv :
-
Chèché réglé pwoblèm-lan ant zòt (gadé vèsé 15-lan).
-
Si ou pa ka rivé, mandé 1 oben 2 krétjen ki mi, endé’w (wè vèsé 16-la).
-
Si magré tousa, ou pa ka rivé réglé pwoblèm-lan, alè-tala, ou pé kriyé lé zansien (wè vèsé 17-la).
Pli souvan ki rarman, nou pa ka mandé lajistis réglé pwoblèm ant frè pas sa pa kèy gloriyé Jéova ni sanblé-a (1 Korentjen 6:1-8). Men délè, adan yonn-dé ka (kontèl divòs, sav ki paran kèy gadé tjanmay-la, pansion alimantè, dédomajman lasirans, fayit ouben tèstaman), sa kay pétèt nésésè alé douvan an tribinal. Si an krétjen kriyé lajistis pou réglé an afè dan lapé, i pa ka dézobéyi konsèy ki adan Labib.
An krétjen pa ka dézobéyi konsèy Labib nonpli lè i ka di lapolis an moun fè an ka oben an krim, kontèl, an gwo vòl, an moun ki agrésé an lòt, pwofitasion sèksièl, ouben mové trètman anlè tjanmay, an viòl, oben an moun ki tjwé an lòt.
a Dépi lanné 455 avan Jézikri jik rivé lanné 1 avan Jézikri, i ni 454 lanné. Dépi lanné 1 avan Jézikri, jik lanné 1 apré Jézikri, i ni 1 lanné (lanné 0 pa ka ègzisté). É dépi lanné 1 jik lanné 29 apré Jézikri, i ni 28 lanné. Sa ki ka fè an tout 483 lanné.
