Non, Témwen Jéova sé pa an sèkt. Nou krétjen, é nou ka fè tou sa nou pé pou suiv lèkzanp épi lansèyman Jézikri.

 Mo « sèkt » pa lé di menm bagay-la pou tout moun. Annou dékatiyé dé lidé tout moun ka tann asou sèkt é annou wè poutji sé dé lidé-tala pa ka konsèné sé Témwen Jéova-a.

•   Pou yonn-dé moun, an sèkt, sé an nouvo rèlijion, oben an rèlijion ki ka suiv fo dòktrin. Témwen Jéova pa kréyé an nouvo rèlijion. Okontrè, tjilt-nou ka suiv modèl sé krétjen 1^é sièk-la ; èkzanp-yo èk ansèyman-yo andidan Bib-la (2 Timoté 3:16, 17). Pou sa ki dòktrin rèlijion, sé asou Labib nou ka apiyé.

•   Pou dòt moun, an sèkt, sé an rèlijion danjéré ki ni an nonm pou chèf. Sé Témwen Jéova-a pani piès nonm asou latè pou chèf. Nou ka rèspèkté prensip-tala Jézi ba sé disip-li a : « Zòt ni an sèl chèf, sé Kris » (Matié 23:10).

 Témwen Jéova pa ni ayen a wè épi an sèkt danjéré, yo ka pratitjé an rèlijion ki ka pwotjiré bon bagay ba yo, é ba lapopilasion tou. Kontèl, travay prédikasion-nou ka endé anlo moun ladjé mové labitid, kon moun ka pran ladwòg épi moun ka bwè twòp alkòl. Nou ka òwganizé lékòl oliwon latè ki ka pèwmèt an patjé moun aprann li épi ékri. Anplis di sa, lè’y ni katastwòf, nou ka travay rèd pou soutni opérasion soukou. Nou ka fè tou sa nou pé pou pòté an bagay pozitif ba pwochen nou, kon Jézi mandé sé disip-li a (Matié 5:13-16).