Sé Témwen Jéova-a ka chèché rann pli fò non sèlman lafanmi-yo men osi fanmi pwochen-yo. Bondié sé Kréyatè lafanmi, é nou ka rèspèkté’y pou sa (Jènèz 2:21-24 ; Éfézien 3:14, 15). Pou endé lé koup toupatou anlè latè vini pli soudé é pli éré, Bondié ka ansénié dé prensip ki adan Bib-la.

 Nou ka fè éfò pou suiv konsèy Labib pas i ka endé nou vini méyè mari, méyè madanm épi méyè paran (Pwovèb 31:10-31 ; Éfézien 5:22–6:4 ; 1 Timoté 5:8). Gras-a sé prensip Labib-la ki ni plen sajès, menm dé fanmi ki pa ni menm rèlijion pé konnèt lajwa (1 Piè 3:1, 2). Mi sa yonn-dé moun ki pa Témwen Jéova di, é ki wè konjwen-yo vini Témwen :

•   « Sé sis prèmié lanné mariaj nou-an, nou té ka babiyé anlo é nou té an lapenn. Mè lè i vini Témwen Jéova, Ivèt té pli dous é i té ni plis pasians. Sé chanjman-an i fè-a sové mariaj-nou » (Kloir, Brézil).

•   « Lè mari mwen, Chansa, koumansé étidié Labib épi sé Témwen Jéova-a, man pa té dakò piès pas pou mwen yo té ka séparé sé fanmi-an. Anfinaldikont, man rann kòmwen kont ki Labib-la endé koup-nou » (Aniès, Zanbi).

 Adan travay prédikasion nou-an, nou ka montré pwochen-nou koumanniè, lè nou ka aplitjé sé konsèy saj Labib-la, nou pé :

•   Bien chwazi an konjwen

•   Rété ansanm apré prèmié lanné mariaj-la

•   Jéré rilasion épi lé bo-paran

•   Jéré lajan

•   Arété babiyé

•   Aprann padonnen

•   Élivé sé tjanmay-la

 Fò rikonnèt sa, chanjé rèlijion sé an bagay ki pé fè tansion monté. An 1998, an ankèt lasosiété Sofrès fè nou sav ki 1 koup asou 20 jwenn grav pwoblèm lè yonn di sé konjwen-an vini Témwen.

 Jézi té ja di ki sé moun-lan ki té kèy suiv lansèyman’y té kèy konnèt tanzantan dézòd adan lafanmi (Matié 10:32-36). An istowyen, Wil Durant konstaté ki anba Dominasion Women « yo té ka akizé Krisianizm-la détwi sé fwayé-a a. » Jòdi-jou, dé ou twa Témwen Jéova ka touvé kòyo douvan sé menm akizasion-an. Ès nou pé di sé Témwen-an ki lakòz dézòd adan koup-la ?

 Lè yo akizé sé Témwen Jéova-a di détwi lafanmi, Lakou éwopéyenn dwa lòm di manb lafanmi ki pa Témwen, sé yo ki lakòz dézòd, lè yo ka rifizé « aksèpté é rèspèkté libèté paran-yo di palé é pratitjé rèlijion-yo ». Lakou-a di anplis : « Tout fanmi éti manb lafanmi-yo pa menm rèlijion ka viv menm sitiyasion-an ; sé Témwen Jéova-a pa éparnié b. » Menm lè yo douvan moun ki pa dakò épi kwayans-yo, sé Témwen Jéova-a ka fè éfò pou aplitjé konsèy-tala ki an Bib-la : « Pa rann pèsonn lèmal pou lèmal. [...] Si sa posib, pou otan sa ka dépann di wou, viv an pé épi tout nonm » (Women 12:17, 18).

 Sé Témwen-an ka suiv koumandman Labib-la di mayé « sèlman épi an disip Séniè-a », sa lé di épi an moun ki ka partajé menm fwa ki yo (1 Korentjen 7:39). Non sèlman lòd-tala ni an fondasion biblik, men anplis i pratik. Pa èkzanp, silon an awtik adan Journal of Marriage and Family, « sé konjwen-an ki ni menm rèlijion, menm pratik é menm kwayans c » ni souvan méyè rilasion adan koup-yo.

 Poutan, sé Témwen Jéova-a pa ka ankourajé Témwen kon yo menm séparé di konjwen-yo ki pa Témwen. Bib-la ka di : « Si an frè ni an madanm ki pa kwayan men ki dakò pou rété épi’y, fo pa i kité’y ; é si an madanm ni an mari ki pa kwayan men ki dakò pou rété épi’y , fo pa i kité mari’y » (1 Korentjen 7:12, 13). Sé Témwen Jéova-a ka suiv koumandman-tala.