Sa moun ka di : Témwen Jéova pa ka kwè adan lamèdsin épi yo pa ka chèché pran trètman médikal.

 Sa ki vré : Nou ka chèché méyè swen médikal, ki ba nou, ki ba yich-nou. Lè nou ni an pwoblèm santé, nou ka alé wè dòktè ki fò an domenn-tala é ki pé ba nou an bon trètman épi opéré san itilizé san. Nou ka rikonnèt épi nou ka aprésié tout pwogré ki fèt adan domenn médikal. Avrédi, trètman éti nou pa ka sèvi san kréyé èspésialman ba Témwen Jéova, jòdi-jou, tout moun pé pwofité di sa. Adan an patjé péyi, moun malad pé chwazi pa touvé kòyo douvan pwoblèm parapòt-a transfizion, kontèl, tout maladi nou pé trapé lè nou ka pran san, tout mové konsékans asou sistèm défans-nou épi fòt lòm ka konmèt.

 Sa moun ka di : Témwen Jéova ka kwè sé lafwa ka djéri.

 Sa ki vré : Nou pa ka fè mirak pou djéri moun.

 Sa moun ka di : An trètman san sèvi san pé kouté an patjé lajan.

 Sa ki vré  : An trètman san sèvi san ka pèwmèt nou pa dépansé twòp lajan adan domenn médikal a.

 Sa moun ka di : An patjé Témwen, tjanmay osi, ka mò chak lanné pas yo ka rifizé pran san.

 Sa ki vré : Sa moun ka afirmé pa ka apiyé asou ayen. Toulong, chirijien ka pratiké opérasion ki difisil (opérasion asou tjè, opérasion òwtopédik, ba oben risivwè òwgan, èksétéra) san sèvi san b. Moun malad ,menm tjanmay, ki pa ka pran san ka bien djéri apré an opérasion, délè mié ki moun ka pran san c. An tout manniè, pèsonn pé pa sav si an moun malad kay mò si’y rifizé pran san oben viv si’y asèpté pran san.

 Nou désidé apiyé asou kwayans-nou, é pa asou lamèdsin. Ki Ansien ki Nouvo Tèstaman, ka ba nou lòd pa pran san (Jènèz 9:4 ; Lévitik 17:10 ; Détéwonòm 12:23 ; Ak 15:28, 29). Anplis di sa, an zié Bondié, san-an ka riprézanté lavi (Lévitik 17:14). Kidonk, pou obéyi Bondié épi ni rèspé pou’y, li ki lotè lavi-a, nou pa ka pran san.

 Té ni an tan, èstratéji médikal ki té ka pèwmèt opéré san sèvi san — sa nou ka kriyé lamèdsin san transfizion — té konsidéré kon an bagay danjéré, é menm suisidè adan monn médikal-la. Men dépi yonn-dé lanné, tou sa chanjé. Pa èkzanpan 2004, nou li adan awtik ki sòti adan an jounal fòmasion médikal : « Bon tibren tèknik yo dévlopé pou djéri Témwen Jéova kay divini dé métòd prensipal adan sé lanné-a ka vini-an d. » An 2010, awtik adan jounal Heart, Lung and Circulation té ka di : « “Chiriji san itilizé san” pa pou Témwen Jéova sèlman. Sa dwèt rantré adan pwotokòl chiriji touléjou. »

 Toupatou asou latè, milié dòktè jòdi-jou ka sèvi tèknik ki ka pèwmèt réyalizé opérasion chirijikal ki konplitjé san transfizion. Yo menm sèvi sé tèknik san transfizion-tala adan péyi ki ka dévlopé piti-a-piti, é menm moun malad ki pa Témwen ka mandé yo tou.