•  Ki manniè Témwen Jéova ka rivé sav si an fèt bon oben pa bon ?

•  Si sé Témwen Jéova-a pa ka sélébré yonn-dé fèt, ès sa lé di yo pa enmen lafanmi-yo ?

•  Ès sé Témwen Jéova-a ka anpéché lézòt sélébré yonn-dé fèt ?

 Avan yo désidé si yo kèy sélébré an fèt ou pa, sé Témwen Jéova-a ka gadé sa Labib-la ka di. Sa klè, i ni fèt ki pa ka alé an menm sans épi prensip Labib. Kidonk, Témwen Jéova pa ka sélébré yo. Pou sa ki sé lézòt fèt-la, chak Témwen ka fè sa i lé, dépi i ka fè éfò « ni an konsians nèt douvan Bondié é douvan lézòm » (Ak 24:16).

 Mi yonn-dé kèsion sé Témwen Jéova-a ka pozé kòyo pou sav si yo kèy sélébré an fèt ou pa a :

•   Ès fèt-tala apiyé asou an lansèyman ki kontrè a sa Labib-la ka di ?

   Prensip Bib-la : « “Sòti an mitan yo, èk pran ran zòt”, sé sa Jéova di, “épi sispann menyen sa ki pa sen” » (2 Korentjen 6:15-17).

   Pou yo séparé toubònman di tout lansèyman ki pa sen èspiritièlman, kivédi ki pa ka alé an menm sans sa Bib-la ka ansénié, sé Témwen Jéova-a pa ka sélébré fèt ki ni rapò épi sé pwen-tala :

   Fèt ki apiyé asou kwayans adan dòt dié. Jézi di : « Sé Jéova Bondié’w ou dwèt adoré, é sé li sèl ou pou ofè an sèvis sakré » (Matié 4:10). An akò épi sé vèsé-tala, sé Témwen Jéova-a pa ka sélébré ni Nwèl, ni Pak, ni fèt 1^ié mé, pas sé fèt-tala apiyé asou tjilt dòt dié ki Jéova. Yo pa ka sélébré sé fèt-tala non pli :

  •  Kwanzaa. Non Kwanzaa sòti « adan an lèsprésion swayili (matundaya kwanza) ki lédi “sé prèmié fwi-a”. Fèt-tala, fondas li sé : prèmié fèt larékolt yo ka sélébré an Afrik » (Encyclopedia of Black Studies). Menm si, pou yonn-dé moun, fèt-tala pa ni ayen di rèlijié, Encyclopedia of African Religion ka konparé’y épi an fèt afritjen, éti sé prèmié fwi-a « ofè ba sé dié-a épi sé zansèt-la pou di mèsi ». Épi i ka di, anplis : « Kwanzaa, sé an fèt afro-améritjen, ki adan menm lèspri-a. »

  •  La fête de la mi-automne. « Fèt-tala sé pou gloriyé déyès-lalin » (Holidays, Festivals, and Celebrations of the World Dictionary). Pandan yonn adan sé ritièl-la, « sé madanm kay-la ka mété kòyo ajounou douvan déyès-la » (Religions of the World​—A Comprehensive Encyclopedia of Beliefs and Practices).

  •  Norouz (Nowruz). « Fèt-tala ka sòti di an rèlijion yo ka kriyé zoroastrisme. Anlè almanna rèlijion-tala sété yonn adan sé jou-a ki té pli sen-an. [...] Jou Norouz-la, a midi, yo té ka sélébré viré vini lèspri midi-a, yo ka kriyé sa [Rapithwin] osi. Dapré sa yo té ka sipozé, lèspri livè-a té ka fèmen lèspri midi-a anba latè pandan sé mwa frédi-a » (United Nations Educational, Scientific and Cultural Organization).

  •  Shab-e-Yalda. Dapré liv-la Sufism in the Secret History of Persia b, sélébrasion sòlstis livè-a « asiré-pa-pétèt lianné épi tjilt Mitra », dié limiè-a. Pou dòt, fèt-tala lianné épi tjilt sé dié-solèy women-an é grèk-la.

  •  Thanksgiving. Kon Kwanzaa, fèt-tala sòti adan fèt larékòlt antan-lontan, yo té ka sélébré pou gloriyé diféran dié. Tan pasé, épi « Légliz-la fini pa adopté sé tradision-tala tout moun té enmen » (A Great and Godly Adventure—The Pilgrims and the Myth of the First Thanksgiving).

   Fèt ki apiyé anlè sipèrstision oben kwayans an lachans. Bib-la ka di sé moun-lan ki ka « préparé an tab pou bondié-Lachans » sé « moun ki ka ladjé Jéova » (Izayi 65:11). Kidonk sé Témwen Jéova-a pa ka sélébré sé fèt-la ki ka suiv :

  •  La nuit de Kupala. Liv The A to Z of Belarus ka èsplitjé : « Silon kwayans pèp-la, pandan [la nuit de Kupala], lanati ka libéré pouvwa magik-li é moun ki ni asé kouraj é ki chansé pé dominé’y. » Okoumansman, sé té an fèt payen ki té ka fèt pandan sòlstis lété. Alò kon Encyclopedia of Contemporary Russian Culture ka di « apré sé payen-an adopté krisianizm-lan yo fè yonn épi Légliz [la « Saint-Jean », ou fête de Jean le Baptiste] ».

  •  Le Nouvel An lunaire (chinwa oben koréyen). « Pandan lépok lanné-tala plis ki an lòt, sa ki pli enpòwtan ba lafanmi, zanmi é konèsans, sé pasé an bèl lanné, sé gloriyé sé dié-a, sé lèspri-a, épi bokanté vé pou lanné-a ka vini-an » (Mooncakes and Hungry Ghosts​—Festivals of China). Osi Nouvèl An koréyen-an « sé an tjilt ba lé zansèt, i ni ritièl pou kouri dèyè mové lèspri, pou ni an bèl lanné épi prézaj [sin ka fè’w kwè i ka anonsé lavni] pou di’w sa nouvo lanné-a kèy pòté » (Encyclopedia of New Year’s Holidays Worldwide).

   Fèt ki apiyé asou lidé nanm-lan imòwtèl. Labib-la ka di an manniè klè nanm-lan pé mò (Ézékièl 18:4). Kidonk, sé Témwen Jéova-a pa ka sélébré sé fèt-la ki ka soutni kwayans limòwtalité nanm-lan nou kèy wè-a :

  •  Le jour des Morts. Dapré New Catholic Encyclopedia, fèt-tala ka « konmémoré lanmò tout fidèl défen. Pandan tout périòd Mwayen-Naj la, anlo moun té ka kwè ki, jou-tala, sé nanm pigatwa-a té ka pran laparans flanm difé, sòwsié, krapolad, èksétéra, pou alé dèyè moun ki té fè yo ditò lè yo té vivan ».

  •  La fête de Qingming (Qingming Jie) épi la fête des fantômes. Sé dé fèt-tala kréyè pou onoré sé zansèt-la. Liv Celebrating Life Customs Around the World​—From Baby Showers to Funerals ka èsplitjé ki, pandan Qingming Jie, « yo ka brilé manjé, bwè épi biyé-lajan pou sé mò-a pa mantjé bwè, manjé épi lajan ». Dapré liv-tala toujou, moun ki ka fété’y ka kwè ki « pandan la fête des fantômes, sirtou oswè laplenn-lin, moun mò pé antré an kontak épi moun vivan, é donk sa kapital prangad pou apézé sé mò-a épi onoré sé zansèt-la ».

  •  Le Chuseok. Liv The Korean Tradition of Religion, Society, and Ethics ka èsplitjé ki pandan fèt-tala, « yo ka ofè ba nanm moun mò manjé épi diven ». Sé ofwann-tala « apiyé asou kwayans ki nanm-lan ka kontinié viv apré lanmò ».

   Fèt ki liyé épi siwnatirèl. Labib-la ka afirmé ki moun « ka fè ladivinasion, ka pwatitjé lamaji, ka chèché prézaj, ka fè sòwsiè, ki ka fè tjenbwa, ki ka fè moun mal, ka alé wè médiòm oben ka prédi lavni, oben ki ka kèsionnen moun mò [...] rayisab pou Jéova » (Détéwonòm 18:10-12). Pou yo pa ni piès kontak épi lokiltiz, oben lastwoloji (an kalté vwayans), Témwen Jéova pa ka fété ni Halloween ni sé fèt-tala :

  •  Le Nouvel An cinghalais et tamoul. « Pandan ritièl tradisionnèl fèt-tala, [...] dapré sa astwològ ka di, yo ka chwazi moman ki kèy pòté yo chans pou fè yonn dé aktivité » (Encyclopedia of Sri Lanka).

  •  Songkran. Non fèt aziatik-tala ka vini di an mo lang sanskrit ki lé di mo pou mo « pasaj astwolojik ». Fèt-tala « ka sélébré pasaj solèy-la adan konstélasion zodiak Bélié-a » (Food, Feasts, and Faith​—An Encyclopedia of Food Culture in World Religions).

   Fèt liyé épi tjilt antan Lalwa mozayik, ki bout apré sakrifis Jézi. Labib-la ka di : « Kris, sé finisman Lalwa » (Women 10:4). Sé krétjen-an ka tiré bénéfis adan prensip Lalwa mozayik-la, yo ba Izrayèl antan lontan. Men yo pa ka sélébré sé fèt-tala, kontèl sa ki ka anonsé laparision Mési-a, pas pou yo i ja vini. Nou ka li adan Bib-la : « Sé bagay-tala sété an lonbraj sa ki pou vini, men réyalité-a, sé Kris » (Kolosien 2:17). Sé pou rézon-tala Témwen Jéova pa ka fété yo. Men anplis di sa, yo pa ka sélébré yo, pas jòdi-a sé fèt-tala ni koutim ki pa ka alé an menm sans ki Labib-la. Mi dé-twa èkzanp :

  •  Hanoukka. Fèt-tala ka konmémoré jou yo viré-ouvè tanp Jérizalèm-lan. Men, Labib-la ka ansénié Jézi divini Gran-Prèt an « tant [oben : tanp] ki pli gran é ki pli pawfé, ki pa fèt épi lanmen nonm, sa lé di i pa ka fè pati di kréyasion-tala » (Ébré 9:11). Pou sé krétjen-an, tanp èspiritièl-tala pran laplas tanp-lan ki té konstwi Jérizalèm.

  •  Rosh ha-Shana. Dapré almanna juif-la, sé prèmié jou lanné-a. Té ni an tan, pandan fèt-tala, yo té ka ofè Bondié sakrifis èspésial. (Nonb 29:1-6). Men, lè Jézikri Mési-a, vini, i fè « sispann sakrifis épi ofrann » (Dannièl 9:26, 27). Douvan Bondié, sé pratik-tala pa nésésè ankò.

•   Ès fèt-tala ka ankourajé liannaj ant pliziè rèlijion ?

   Prensip Bib-la : « Ki asosiasion ki pé ni ant an kwayan épi an moun ki pa kwayan ? Épi kisa tanp Bondié ni a wè épi sé zidòl-la ? » (2 Korentjen 6:15-17).

   Témwen Jéova ka fè éfò pou rété an pé épi lézòt é pou rèspèkté dwa-yo di chwazi kwayans-yo. Men, yo pa ka sélébré fèt ki ka ankourajé liannaj ant pliziè rèlijion. Mi yonn-dé èkzanp :

   Sé fèt-la ki ka gloriyé an moun rèlijion-an oben ki ka ankourajé moun diféran rèlijion pratitjé an adorasion ansanm-ansanm. Antan lontan, lè Bondié fè pèp-li antré adan an péyi éti té ni moun té ka pratitjé dòt rèlijion, i di’y : « Ou pé ké ni dwa fè alians ni épi yo ni épi bondié-yo. [...] Si ou té ka sèvi bondié-yo, sa té kèy vini an zatrap ba’w » (Ègzòd 23:32, 33). Kidonk Témwen Jéova pa ka sélébré sé fèt-tala :

  •  Loy Kratong. Pandan fèt taiy-tala, « moun ka fè bòl épi fèy piébwa, ka mété bouji oben bichèt lansan andidan’y, é yo ka ladjé sé bòl-la anlè dlo-a. Sé ti-kanno tala fèt pou chayé lamalchans olwen. Poutoudi, fèt-tala, i la pou gloriyé Bouda » (Encyclopedia of Buddhism).

  •  La journée nationale de la repentance. The National, an jounal Papouazi-Nouvèl-Ginen, ripran sa an riprézantan gouvèlman-an di. I di moun ki ka sélébré fèt-tala « ka montré yo dakò épi fondas lafwa krétjenn ». I ka èsplitjé tou, ki fèt-tala « ka favorizé prensip krétjen adan péyi-a ».

  •  Vesak. « Adan rèlijion sé boudis-la, sé fèt-tala ki pli enpòwtan. I ka sélébré nésans Bouda, iliminasion’y [jou dié vréyé lagras anlè’y] épi lanmò’y (lè i rivé jwenn nirvana-a) » (Holidays, Festivals, and Celebrations of the World Dictionary).

   Fèt ki apiyé anlè tradision rèlijion ki pa biblik. Jézi di sé chèf rèlijion juif-la : « Sé pou sa, palakòz tradision-zòt, zòt rann pawòl Bondié initil. » Épi i ajouté ki tjilt-yo pa té vo ayen, pas yo té ka ansénié pou « dòktrin [...] koumandman nonm » (Matié 15:6, 9). Davré sé Témwen Jéova-a ka pran avètisman-tala o sérié, i ni patjé fèt rèlijié yo pa ka sélébré.

  •  L’Épiphanie (le Timkat oben la fête des Rois). Fèt-tala ka konmémoré jou-a sé astwològ-la vini wè Jézi oben jou batenm-li. I « krisianizé yonn-dé fèt payen yo ka fété pandan périòd prentan, ki té ka gloriyé dié ti-kannal, lariviè épi flèv » (The Christmas Encyclopedia). Timkat, sé menm-parèy ki Lépifanni pa koté Létjopi, i « an fondòk tradision-an » (Encyclopedia of Society and Culture in the Ancient World).

  •  L’Assomption. Fèt-tala ka sélébré kwayans manman Jézi monté an sièl-la épi kò lachè’y. Liv Religion and Society—Encyclopedia of Fundamentalism ka esplitjé : « Kwayans-tala, sé prèmié krétjen-an pa té konnèt li, é i pa matjé piès koté adan Labib-la. »

  •  L’Immaculée conception. « Limakilé konsèpsion [Mari], Labib-la pa ka ba an ansèyman klè asou sa [...]. Ansèyman-tala ka vini di Légliz » (New Catholic Encyclopedia).

  •  Le carême. Dapré New Catholic Encyclopedia, périòd pénitans épi jenn-tala té kréyé « an IV^è sièk-la », 200 lanné apré yo fini matjé Bib-la. Pou sa ki prèmié jou karenm, diksionnè-a ka èsplitjé : « Pratik-tala éti yo ka mété tibren sann anlè fwon sé fidèl-la jou Mèkrédi dé-sann vini entèwnasional épi synode Bénévan, an 1091. »

  •  Mesqel. Dapré Encyclopedia of Society and Culture in the Medieval World, pandan fèt Létjopi-tala, yo ka limen pliziè boukan difé épi yo ka dansé alawonn yo pou sélébré « jou yo dékouvè Vré Kwa-a (lakwa-a éti yo krisifié Kris) » (sé lotè-a ki ajouté parantèz-la). Kantapou Témwen Jéova, yo pa ka sèvi lakwa adan tjilt-yo.

•   Ès fèt-tala ka gloriyé an nonm, an òwganizasion oben an bagay ka riprézanté nasion-an ?

   Prensip Bib-la : « Mi sa Jéova ka di : “Malédision pou an moun ki ka mété konfians-li an nonm kon’y menm, ki ka konté asou pwòp fòs-li, éti tjè’y ka viré do ba Jéova » (Jérémi 17:5).

   Menm si sé Témwen Jéova-a ni konsidérasion ba dòt moun é ka menm prédié ba yo, yo pa ka mélé adan sé modèl fèt-tala :

   Fèt ki ka gloriyé an chèf oben an lòt moun ki ni enpòwtans. Labib-la ka di : « Sispann mété konfians-ou adan nonm kon’w menm, pas lavi-yo kon an souf ! Poutji ou ka apiyé anlè yo ? » (Izayi 2:22). Kifè, Témwen Jéova pa ka fété, pa èkzanp, nésans an wa oben an rèn.

   Fèt ki ka gloriyé drapo an péyi. Témwen Jéova pa ka fété dat lannivèrsè drapo an péyi. Poutji ? Pas Bib-la ka di  : « Pran pokosion, pa menyen zidòl » (1 Jan 5:21). Pou yonn-dé moun, drapo-a sé pa an zidòl, kivédi an bagay ka sèvi pou ladorasion, men istowyen Karlton Hayes matjé : « Drapo-a sé an piès kapital épi an poto-mitan lafwa èk ladorasion nasionalis. »

   Fèt pou gloriyé an sen. Kisa ki fèt lè an nonm vini ajounou douvan apòt Piè ? Labib-la ka rapòté: « Men Piè rilévé’y épi i di : “Mété kò’w doubout ; man sé an nonm, mwen osi” » (Ak 10:25, 26). Lèfèt kè ni Piè ni piès dòt apòt pa asèpté adorasion oben an lonnè èspésial, kon yo, Témwen Jéova pa ka sélébré fèt ki la pou onoré moun yo ka konsidéré kon sen. Mi yonn-dé èkzanp fèt :

  •  La Toussaint. « An fèt ki ka gloriyé tout sé sen-an [...]. Nou pa sav ki koté fèt-tala sòti » (New Catholic Encyclopedia).

  •  La fête de Notre-Dame de Guadalupe. Fèt-tala ka gloriyé « sent patwòn péyi Mèksik », i ni ki ka pansé sé Mari, manman Jézi. Yo ka di i fè an aparision, yo kriyé mirak, douvan an moun lakanpay an 1531 (The Greenwood Encyclopedia of Latino Literature).

  •  La fête du prénom. Dapré liv Celebrating Life Customs Around the World​—From Baby Showers to Funerals, « La fête du prénom, sé fèt sen-an ki ka pòté non-an yo ba an timanmay, jou batenm-li oben jou konfiwmasion’y ». Liv-la ka ajouté ki « jou-tala ni an plas vréman enpòwtan adan rèlijion-an ».

   Fèt ki ka sélébré mouvman politik oben sosial. « Simié ou kouri séré obò Jéova pasé ou fè nonm konfians » (Sòm 118:8, 9). Pou zafè réglé pwoblèm adan monn-lan, pou Témwen Jéova pa ba lenprésion yo ka fè lézòm konfians plito ki Bondié, yo pa ka mélé adan ni Journée de la femme ni Journée de la jeunesse. Sé pou menm rézon-tala yo pa ka sélébré jour de l’Émancipation oben dòt fèt konsa. Yo, yo plito ka fè wayòm Bondié konfians pou réglé pwoblèm rasiz épi diférans (Women 2:11 ; 8:21).

•   Ès fèt-tala ka ba an péyi oben an ras moun plis lenpòwtans ki an lòt ?

   Prensip Bib-la : « Bondié pa ka fè préférans, men i dakò épi tout moun ki ni lakrent pou’y épi ka fè sa ki jis, kisiswa nasion’y » (Ak 10:34, 35).

   Menm si anlo Témwen Jéova bien enmen péyi-yo, yo pa ka mélé adan fèt ki ka mété an péyi oben an ras moun pli wo ki an lòt. Mi yonn-dé èkzanp :

   Fèt ki ka sélébré lawmé. Olié i ankourajé fè ladjè, Jézi di sé disip li-a : « Enmen lènmi-zòt épi pa sispann prédié ba moun ki ka pèsékitè zòt » (Matié 5:44). Sé pou sa Témwen Jéova pa ka sélébré fèt ki ka gloriyé sòlda, kon sé tala :

  •  La journée de l’Anzac. « Anzac sé inisial pou Australian and New Zealand Army Corps [ansanm réjiman lawmé òstralien épi néo-zélandè]. » Fèt-tala « vini piti-a-piti an jou pou sonjé moun ki mò pandan ladjè » (Historical Dictionary of Australia).

  •  L’Armistice (oben jour du Souvenir). Fèt-tala ka sélébré « ansien konbatan lawmé épi moun ki mò pou défann péyi-yo » (Encyclopædia Britannica).

   Fèt ka sélébré listwa oben lendépandans an péyi. Jézi di asou sé disip-li a : « Yo pa ka pran pa andidan monn-lan, kon mwen man pa ka pran pa andidan monn-lan » (Jan 17:16). Menm si yo ka entérésé kòyo a listwa péyi, sé Témwen Jéova-a pa ka patisipé adan sé fèt-tala :

  •  L’Australia Day (« Jou Òstrali »). Dapré Worldmark Encyclopedia of Cultures and Daily Life, fèt-tala ka konmémoré « jou-a éti, an lanné 1788, sé solda anglé-a planté drapo-yo [asou téritwè Òstrali] épi yo di Òstrali ka vini an koloni ki ta yo ».

  •  Guy Fawkes Day (« Jou Guy Fawkes »). « Fèt nasional-tala ka konmémoré an atanta ki échwé kont wa Jak I^ié Anglitè épi Pawlèman [anglé-a] Guy Fawkes té ka mennen épi dòt katolik lanné 1605 » (A Dictionary of English Folklore).

  •  Le Jour de l’indépendance. Adan anchay péyi, sé an jou pou sélébré koumansman lendépandans nasional.

•   Ès pandan fèt-tala moun ka kité kòyo alé oben yo ni mové konduit sèksièl ?

   Prensip Bib-la : « Zòt ja pasé twòp tan ka fè volonté sé nasion-an, lè zòt té ka kité kò zòt alé pou sa ki mové konduit san piès rèspé, anpil pasion san larèl, brè twòp alkòl, fè lafèt san mizi, soulézon épi lidolatri malonnèt » (1 Piè 4:3).

   Pou obéyi prensip-tala, sé Témwen Jéova-a pa ka alé adan fèt éti moun ka bwè twòp oben ka kité kòyo alé. Yo enmen pasé tan épi zanmi-yo, é si yo bwè alkòl, yo pa ka bwè twòp. Yo ka fè sa yo pé pou suiv konsèy Labib-tala : « Kidonk, kisiswa lè zòt ka manjé, oben lè zòt ka brè, kisiswa sa zòt ka fè dòt, fè tout bagay pou gloriyé Bondié » (1 Korentjen 10:31).

   Sé Témwen Jéova-a pa ka kouri kannaval oben fété tout sé lézòt fèt-la ki ka ankourajé konpòtasion Labib-la ka kondané. Sé kon pa èkzanp fèt juif Pourim. Menm si avan fèt-tala té ka konmémoré libérasion sé Juif-la pandan V^ièm sièk-la avan Jézikri, jòdi-a fèt-tala sé « près kon Madi-gra oben Kannaval » kon liv Essential Judaism ka èsplitjé. Adan fèt-tala an patjé moun « ka dégizé (souvan nonm ka mété rad madanm), yo déchennen menm, yo ka bwè anpil épi yo ka fè an patjé bri ».

 Non. Labib-la ka ansénié nou fòk enmen épi rèspèkté tout moun adan lafanmi-nou, kisiswa rèlijion-yo (1 Piè 3:1, 2, 7). Wi, sa pé rivé lè an Témwen Jéova pa ka sélébré yonn-dé fèt ankò, pé ni moun adan lafanmi’y ki pé égri, ni lapenn oben santi kòyo trayi. Sé pou sa, anpil Témwen Jéova ka pran douvan pou rasiré lafanmi-yo. Yo ka fè yo sav yo enmen yo, ka èsplitjé épi rèspé poutji yo pran désizion-tala épi a dòt moman ka alé wè yo.

 Non. Yo ka pansé sé chak moun ki pou désidé (Jozié 24:15). Yo ka ‘ba tout kalté moun lonnè-yo’, kisiswa rèlijion-yo (1 Piè 2:17).